កូរ៉េខាងជើង បាញ់មីស៊ីល ៣ គ្រាប់ទៀត ក្រោយ អាមេរិក-កូរ៉េខាងត្បូង បញ្ចប់សមយុទ្ធយោធា

ប្រទេសកូរ៉េខាងជើងនៅថ្ងៃចន្ទនេះបានបាញ់មីស៊ីលផ្លោងរយៈចម្ងាយជិតជាច្រើនគ្រាប់ឆ្ពោះទៅកាន់ដែនទឹកភាគខាងកើតរបស់ខ្លួន ពោលប៉ុន្មានថ្ងៃ បន្ទាប់ពីការបញ្ចប់នៃសមយុទ្ធយោធារវាងកូរ៉េខាងត្បូង និងសហរដ្ឋអាមេរិក ដែលកូរ៉េខាងជើងចាត់ទុកថាជាការហាត់សមឈ្លានពាន ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី​១៨ ខែមីនា​នេះ ។

ក្រសួងការពារជាតិជប៉ុនបាននិយាយថា កូរ៉េខាងជើងបានបាញ់មីស៊ីលចំនួន ៣ គ្រាប់ ពោល ២ គ្រាប់នៅម៉ោង ៧ និង ៤៤ នាទីព្រឹក និងមួយគ្រាប់ទៀតកើតឡើងប្រហែល ៣៧ នាទីក្រោយមក ហើយបានធ្លាក់ក្នុងដែនទឹករវាងឧបទ្វីបកូរ៉េ និងជប៉ុន តែមិនមានការខូចខាត ឬរបួសណាមួយត្រូវបានរាយការណ៍នោះឡើយ ។

ពាក់ព័ន្ធនឹងបញ្ហានេះដែរ នាយករដ្ឋមន្ត្រីជប៉ុន លោក Fumio Kishida បានថ្កោលទោសការធ្វើតេស្តមីស៊ីលផ្លោងម្តងហើយម្តងទៀតរបស់កូរ៉េខាងជើងថាជាសកម្មភាព “គំរាមកំហែងដល់សន្តិភាព និងសុវត្ថិភាពរបស់ប្រទេសជប៉ុន រួមទាំងក្នុងតំបន់ និងសង្គមអន្តរជាតិ” ផងដែរ ។

ចំណែកយោធាកូរ៉េខាងត្បូងក៏បានអះអាងពីការបាញ់សាកល្បងមីស៊ីលរយៈចម្ងាយជិតរបស់កូរ៉េខាងជើងផងដែរ ។ អគ្គសេនាធិការចម្រុះបានហៅការបាញ់បង្ហោះនេះថា “មានបំណងបង្កហេតុ ” ដែលគំរាមកំហែងដល់សន្តិភាពនៅលើឧបទ្វីបកូរ៉េ ។ កូរ៉េខាងត្បូងក៏នឹងរក្សាការត្រៀមខ្លួនដើម្បីទប់ទល់រាល់ការបង្កហេតុដោយកូរ៉េខាងជើង ដោយផ្អែកលើសម្ព័ន្ធភាពយោធាដ៏រឹងមាំរបស់ខ្លួនជាមួយសហរដ្ឋអាមេរិក ។

យោងតាមការវាយតម្លៃរបស់ជប៉ុន និងកូរ៉េខាងត្បូង មីស៊ីលដែលកូរ៉េខាងជើងបានបាញ់ចេញពីតំបន់រដ្ឋធានីរបស់ខ្លួនបានហោះហើរក្នុងចម្ងាយពី ៣០០ ទៅ ៣៥០ គីឡូម៉ែត្រ និងឈានដល់រយៈកម្ពស់អតិបរមា ៥០ គីឡូម៉ែត្រ ខណៈចម្ងាយបាញ់បង្ហោះបង្ហាញថា មីស៊ីលនេះសំដៅលើមូលដ្ឋានសំខាន់ៗនៅក្នុងប្រទេសកូរ៉េខាងត្បូង ដូចជាទីបញ្ជាការយោធាជាដើម ។

ទន្ទឹមនោះក្រសួងការបរទេសសហរដ្ឋអាមេរិកក៏បានថ្កោលទោសការបាញ់បង្ហោះនេះថា ជាការគំរាមកំហែងដល់ប្រទេសជិតខាង និងធ្វើឲ្យប៉ះពាល់ដល់សន្តិសុខក្នុងតំបន់ផងដែរ ហើយសហរដ្ឋអាមេរិកនៅតែប្តេជ្ញាចិត្តការពារប្រទេសកូរ៉េខាងត្បូង និងជប៉ុន ប្រសិនបើមានការឈ្លានពានមែននោះ ។

គួរបញ្ជាក់ថា ការព្រួយបារម្ភអំពីចលនាយោធារបស់កូរ៉េខាងជើងបានកើនឡើងកាន់តែខ្លាំងឡើង ចាប់តាំងពីលោក គីម ចុងអ៊ុន បានថ្លែងសុន្ទរកថាកាលពីខែមករា ដោយប្តេជ្ញាថា គ្មានការបង្រួបបង្រួមដោយសន្តិវិធីនៅឧបទ្វីបកូរ៉េនោះទេ និងដាក់គោលដៅកូរ៉េខាងត្បូងជាសត្រូវលេខមួយរបស់ខ្លួន ដោយនឹងរកគ្រប់វីធីដើម្បីកម្ចាត់កូរ៉េខាងត្បូង ប្រសិនបើសង្គ្រាមមួយទៀតផ្ទុះឡើង ៕

អត្ថបទ ៖ ប៊ុន សុភាព