ម៉ាឡេស៊ី បង្ក្រាបថ្នាំញៀនបម្រុងយកទៅ អូស្ត្រាលី ប្រមាណ ៣៨០ គីឡូក្រាម

នាយកដ្ឋានគយម៉ាឡេស៊ី កាលពីថ្ងៃអង្គារ បានបង្ក្រាបក្រុមជួញដូរគ្រឿងញៀនអន្តរជាតិមួយ និងរឹបអូសបានថ្នាំញៀនមេតំហ្វេតាមីន ៣៨០គីឡូក្រាម ដែលមានតម្លៃ ១២.៥៤លានម៉ាឡេស៊ី (២.៧លានដុល្លារ) នៅអាកាសយានដ្ឋានអន្តរជាតិគូឡាឡាំពួ។

យោងតាមការចុះផ្សាយពី Bernama បានដកស្រង់នូវសម្ដីរបស់អគ្គនាយករងនៃនាយកដ្ឋាន លោក Datuk Sazali Mohamad និយាយថា មន្ត្រីអនុវត្តច្បាប់បានរឹបអូសប្រអប់ប៉ាឡេដែលមើលទៅគួរឲ្យសង្ស័យ​ មានស្លាកថាជាតែរុក្ខជាតិរបស់ចិន ដោយជំនួសមកវិញនូវសារធាតុគ្រីស្តាល់​ជាថ្នាំគ្រោះថ្នាក់ដូចជាមេតំហ្វេតាមីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sazali បាននិយាយបន្ថែមទៀតថា ការស៊ើបអង្កេតបឋមបង្ហាញថា ទំនិញត្រូវគេប្រកាសថាជាថាសរឹងម៉ាញេទិកពីឃ្លាំងទំនិញ Bayan Lepas នៅទីក្រុង Penang កាលពីថ្ងៃទី ១៨ ខែមីនា ហើយបន្ទាប់មកដឹកជញ្ជូនតាមផ្លូវទៅកាន់កន្លែងដឹកទំនិញរបស់អាកាសយានដ្ឋានអន្តរជាតិ Kuala Lumpur តាំងពីថ្ងៃទី ១៩ ខែមីនា មក។

លើសពីនេះទៀតដែរ ខាងផ្នែកស៊ើបអង្កេតបានបញ្ចាក់ដែរថា វាច្បាស់ណាស់ថា ទំនិញមួយនេះគ្រោងនឹងត្រូវនាំចេញតាមផ្លូវអាកាសទៅកាន់ទីក្រុងស៊ីដនី ប្រទេសអូស្ត្រាលី។ ចំណែកព័ត៌មាន​អំពី​អ្នក​នាំ​ចេញ​ទំនិញ​ គឺ​ជា​ក្រុមហ៊ុន​ផលិត​ថាស​រឹង​នៅ​ក្រុង​គូលីម រដ្ឋ Kedah ប៉ុន្តែ​ត្រូវ​​គេ​សង្ស័យ​ថា​ ត្រូវ​បាន​រំលោភ​បំពាន​ដោយ​ក្រុម​ជួញ​ដូរ​គ្រឿង​ញៀនទៅវិញ។

យ៉ាងណាមិញ ​មកដល់ពេលនេះប៉ូលិសមិនទាន់ចាប់ខ្លួនជនសង្ស័យនូវឡើយទេ ខណៈគេសង្ស័យថាគ្រឿងញៀនអាចមកពីតំបន់ត្រីកោណមាស ស្របពេលដែលកំពុងតែបន្តស៊ើបអង្កេតបន្ថែមទៀត ដោយផ្អែកលើមាត្រា៣៩ និងច្បាប់ឆ្នាំ១៩៥២ របស់ប្រទេសម៉ាឡេស៊ី៕

អត្ថបទ៖​ សាង ​ស្រីល័ក្ខ

ចុចអាន៖បុរស អាមេរិក ម្នាក់ ដើរកាន់សាកសពជើងមនុស្ស និងហែកទំពាដូចចំណី