Connect with us

ព័ត៌មានអន្ដរជាតិ

លោក Netanyahu ថា អ៊ីស្រាអែល សម្លាប់បុគ្គលិកជំនួយ ជារឿង អចេតនា

បានផុស

នៅ

តាមការចុះផ្សាយរបស់ AFP កាលពីថ្ងៃអង្គារទី២ខែមេសា នាយករដ្ឋមន្ត្រីអ៊ីស្រាអែល លោក Benjamin Netanyahu បានចេញមុខបញ្ជាក់ថា កងកម្លាំងប្រដាប់អាវុធរបស់ខ្លួន គ្មានចេតនា សម្លាប់បុគ្គលិកជំនួយចំនួន៧នាក់ ក្នុងការវាយប្រហារតាមអាកាសលើតំបន់ហ្គាហ្សា ទេ។

នាយករដ្ឋមន្ត្រីអ៊ីស្រាអែល លោក Benjamin Netanyahu (រូបថត៖ Turkiye Newspaper)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយចេញពីមន្ទីរពេទ្យក្រុងហ្ស៊េរុយសាឡិម លោកអះអាងថា “សោកស្តាយណាស់ មានករណីសោកនាដកម្មដែលកងកម្លាំងរបស់យើង បានវាយប្រហារដោយអចេតនាលើប្រជាជនស្លូតត្រង់នៅជ្រោយហ្គាហ្សា។ រឿងបែបនេះ បែរជាកើតឡើងនៅក្នុងសង្គ្រាម យ៉ាងណា យើងនឹងស៊ើបអង្កេតឲ្យដល់ទីបញ្ចប់។ យើងកំពុងទាក់ទងជាមួយរដ្ឋាភិបាលនានា ហើយនឹងធ្វើគ្រប់យ៉ាង ដើម្បីកុំឲ្យរឿងនេះកើតឡើងជាថ្មីម្តងទៀត”។

សូមបញ្ជាក់ ជនរងគ្រោះទាំង៧នាក់ គឺជាបុគ្គលិកធ្វើការឲ្យអង្គការ World Central Kitchen (WCK) មានមូលដ្ឋាននៅសហរដ្ឋអាមេរិក ដែលបាននិងកំពុងផ្តល់ជំនួយស្បៀងអាហារ ដល់តំបន់ហ្គាហ្សា តាមសមុទ្រពីប្រទេសស៊ីប ហើយក្រោយសោកនាដកម្មកាលពីថ្ងៃចន្ទ អង្គការនេះសម្រេចផ្អាកប្រតិបត្តិការនៅតំបន់ហ្គាហ្សា ក្នុងអ្វីដែលខ្លួនហៅថាជា “ការវាយប្រហារកំណត់គោលដៅដោយអ៊ីស្រាអែល”។ 

(រូបថត៖ Getty)

ទាក់ទិនបញ្ហានេះ រដ្ឋាភិបាលអង់គ្លេស បានកោះហៅឯកអគ្គរដ្ឋទូតអ៊ីស្រាអែលឲ្យមកបំភ្លឺ ជុំវិញការស្លាប់របស់បុគ្គលិកជំនួយ។

រដ្ឋមន្ត្រីការបរទេសអង់គ្លេសលោក David Cameron បានបង្ហោះលើបណ្តាញសង្គម X ថា “ខ្ញុំសូមស្នើសុំឲ្យមានការស៊ើបអង្កេតរហ័សនិងប្រកបដោយតម្លាភាព ហើយចែករំលែកជាមួយសហគមន៍អន្តរជាតិនិងការទទួលខុសត្រូវពេញលេញ។ អ៊ីស្រាអែលត្រូវតែពន្យល់ជាបន្ទាន់ថា តើរឿងនេះកើតឡើងបានដោយរបៀបណា ហើយត្រូវធ្វើរឿងចាំបាច់ដើម្បីធានាសុវត្ថិភាពបុគ្គលិកជំនួយនៅលើដី”។

រដ្ឋមន្ត្រីការបរទេសអង់គ្លេសលោក David Cameron (រូបថត៖ AP)

សូមជម្រាបជាថ្មី សង្គ្រាមដ៏បង្ហូរឈាមបំផុតមិនធ្លាប់មាននៅតំបន់ហ្គាហ្សា បានផ្ទុះឡើងក្រោយការវាយប្រហារថ្ងៃទី៧ខែតុលារបស់ក្រុមហាម៉ាស ដែលបណ្តាលឲ្យមនុស្សប្រហែល ១ ១៦០នាក់បាត់បង់ជីវិតក្នុងប្រទេសអ៊ីស្រាអែល ដោយភាគច្រើនជាជនស៊ីវិល។

ជាការសងសឹក​ អ៊ីស្រាអែល​​បាន​សម្លាប់​មនុស្ស​យ៉ាងតិច ៣២ ៩១៦ នាក់ ​ភាគច្រើន​ជា​ស្ត្រី និង​កុមារ។ នេះ​បើ​យោង​តាមតួលេខ​ក្រសួង​សុខាភិបាលហ្គាហ្សា ​ដែល​គ្រប់គ្រង​ដោយ​ចលនាប្រដាប់អាវុធប៉ាឡេស្ទីន៕

អត្ថបទ៖ សុខ សុវណ្ណ

ចុចអាន៖ សភា អ៊ីស្រាអែល អនុម័តច្បាប់ឲ្យបិទទូរទស្សន៍ Al Jazeera

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម