ទាហានរុស្ស៊ីរូបណា សម្លាប់បានទ័ពណាតូ នៅអ៊ុយក្រែន នឹងទទួលប្រាក់រង្វាន់ជាទីគាប់ចិត្ត 

កងទ័ពរុស្ស៊ីនឹងទទួលប្រាក់រង្វាន់ជាទីគាប់ចិត្តបើសម្លាប់បានទាហានណាតូ ពេលពួកគេពិតជាត្រូវបញ្ជូនមកជួយប្រយុទ្ធឲ្យអ៊ុយក្រែនមែន។​ នេះបើតាមសេចក្តីប្រកាសរបស់លោក Dmitry Medvedev។ ទោះបីជាយ៉ាងណាក៏ដោយ អតីតប្រធានាធិបតីរុស្ស៊ីរូបនេះ មិនបញ្ជាក់ទេថាតើ ប្រាក់រង្វាន់នោះមានតម្លៃប៉ុន្មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ី កាន់តែមានកំហឹងខ្លាំងចំពោះរឿងពាក់ព័ន្ធវត្តមានទាហានណាតូ លើទឹកដីអ៊ុយក្រែន ដល់ថ្នាក់ពេលនេះ នៅក្នុងការបង្ហោះលើប្រព័ន្ធផ្សព្វផ្សាយសង្គមដែលផ្សាយបន្តដោយសារព័ត៌មាន RT កាលពីថ្ងៃព្រហស្បតិ៍ទី៤ខែមេសា លោក Medvedev បានរិះគន់ខ្លាំងៗចំពោះអ្នកគាំទ្រទីក្រុងកៀវ នៅលោកខាងលិចថា គ្រោះកាចនឹងកើតឡើង បើទ័ពបរទេសឈានជើងដល់ដីអ៊ុយក្រែន។

លោក Medvedev ដែលបច្ចុប្បន្នក៏មានតួនាទីជាអនុប្រធានក្រុមប្រឹក្សាសន្តិសុខរុស្ស៊ី ផងដែរនោះ បានសរសេរថា “ទ័ពណាតូ នឹងក្លាយជាផ្នែកមួយនៃកងកម្លាំងធម្មតាដែលកំពុងប្រយុទ្ធប្រឆាំងយើង។ នោះហើយជាមូលហេតុដែលពួកគេ នឹងត្រូវចាត់ទុកជាសត្រូវតែមួយមុខគត់។ យើង​មិន​គួរ​ចាប់​អ្នក​ទោស​ទេ! ទ័ពរុស្ស៊ីណា សម្លាប់បានទ័ពណាតូ នឹងទទួលបានរង្វាន់ខ្ពស់បំផុត”។

នេះមិនមែនជាលើកដំបូងឡើយដែល ទាហានរុស្ស៊ី ត្រូវបានលើកទឹកចិត្តជាមួយការផ្តល់រង្វាន់បែបនេះ ពោលពីមុន អ្នកជំនួញនិងសកម្មជនរុស្ស៊ី ក៏ធ្លាប់ប្រកាសផ្តល់ប្រាក់រង្វាន់ផងដែរ ដល់ទាហានរូបណាដែលអាចកម្ទេចរថក្រោះ ផលិតដោយលោកខាងលិចនៅប្រទេសអ៊ុយក្រែន។

សេចក្តីប្រកាសរបស់លោក Medvedev កើតឡើងមួយថ្ងៃបន្ទាប់ពីរដ្ឋមន្ត្រីការពារជាតិរុស្ស៊ីលោក Sergey Shoigu ចេញការព្រមានដោយផ្ទាល់ទៅសមភាគីបារាំង Sebastien Lecornu ថា ការបញ្ជូនទ័ពទៅអ៊ុយក្រែន នឹងបង្កមហន្តរាយដល់ទីក្រុងប៉ារីស ជាក់ជាមិនខានឡើយ។

លោក Shoigu បានព្រមានបែបនេះ ក្នុងអំឡុងការពិភាក្សាតាមទូរស័ព្ទដ៏កម្ររយៈពេលមួយម៉ោង និងជាកិច្ចសន្ទនាលើកដំបូងរវាងប្រមុខការពារជាតិនៃប្រទេសទាំងពីរ ចាប់តាំងពីខែតុលាឆ្នាំ២០២២មក។

ស្របពេលបញ្ហានៅតែចាក់ស្រេះ គេនៅតែតាមមើលប្រធានាធិបតីបារាំងលោក Emmanuel Macron ដែលអះអាងម្តងហើយម្តងទៀតថា លោកនៅតែចង់ឲ្យទាហានណាតូបញ្ជូនទៅអ៊ុយក្រែន ទោះ​លោក​សង្កត់​ធ្ងន់​ថា ផែនការនេះ នឹងមិនកើតឡើងនាពេលអនាគតដ៏ខ្លីខាងមុខក៏ដោយ។

យ៉ាងណា សហរដ្ឋអាមេរិក អាល្លឺម៉ង់ អង់គ្លេស ប៉ូឡូញ សាធារណរដ្ឋឆែក និងបណ្តាប្រទេសអឺរ៉ុបជាច្រើនទៀត បានប្រកាសថា ពួកគេគ្មានគម្រោងបញ្ជូនទ័ពទៅអ៊ុយក្រែនឡើយ ​ព្រោះមិនចង់ឲ្យកងកម្លាំងរបស់ពួកគេ ចូលរួមដោយផ្ទាល់នៅក្នុងសង្រ្គាម ហើយក៏មិនចង់ឲ្យមានការប៉ះទង្គិចដោយផ្ទាល់ជាមួយរុស្ស៊ី ដែលជាប្រទេសមានអាវុធនុយក្លេអ៊ែរដែរ។

ទាក់ទិនបញ្ហានេះ ទីក្រុងមូស្គូបានគំរាមមិនដាច់មាត់ឡើយថា ខ្លួននឹងចាត់ទុកកងទ័ពលោកខាងលិច និងប្រព័ន្ធសព្វាវុធដែលផ្គត់ផ្គង់ដោយបរទេសនៅលើទឹកដីអ៊ុយក្រែន ជាគោលដៅស្របច្បាប់ ហើយអ្នកនាំពាក្យវិមានក្រឹមឡាំង លោក Dmitry Peskov ក៏ព្រមានផងដែរកាលពីខែមុនថា ការដាក់ពង្រាយកងកម្លាំងបរទេស នឹងរុញស្ថានការណ៍ឲ្យពុះកញ្ជ្រោល នាំទៅរកផលវិបាកដែលគ្មាននរណានឹកស្មានដល់៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមថា បារាំង នឹងជួបមហន្តរាយ បើហ៊ានបញ្ជូនទ័ពទៅ អ៊ុយក្រែន