ដំណឹងល្អ! អត្រាអ្នកឆ្លងកូវីដចូលសម្រាកព្យាបាលក្នុងមន្ទីរពេទ្យធ្លាក់ចុះខ្លាំង ក្រោយចាក់វ៉ាក់សាំងដូសដំបូង

ការស្រាវជ្រាវមួយបានរកឃើញថា វ៉ាក់សាំងការពារជំងឺកូវីដ ១៩ របស់ក្រុមហ៊ុន Pfizer-BioNTech និងក្រុមហ៊ុន AstraZeneca-Oxford កាត់បន្ថយយ៉ាងខ្លាំងនូវហានិភ័យនៃការចូលសម្រាកនៅមន្ទីរពេទ្យចំពោះអ្នកកើតជំងឺកូវីដ ១៩ បន្ទាប់ពីការចាក់ដូសដំបូង ។

ការសិក្សានេះបានអនុវត្តទៅលើអ្នកជំងឺដែលបានឆ្លងកូវីដ បន្ទាប់ពីទទួលការចាក់វ៉ាក់សាំងដូសដំបូងក្នុងចំណោមការចាក់ ២ ដូសក្នុងប្រទេសស្កុតលែនបានបង្ហាញថា ហានិភ័យនៃការចូលសម្រាកព្យាបាលនៅមន្ទីរពេទ្យដោយសារជំងឺនេះបានធ្លាក់ចុះរហូតដល់ ៨៥ ភាគរយជាមួយនឹងការចាក់វ៉ាក់សាំងរបស់ក្រុមហ៊ុន Pfizer-BioNTech និង ៩៤ ភាគរយជាមួយវ៉ាក់សាំងក្រុមហ៊ុន AstraZeneca-Oxford បួនសប្តាហ៍ក្រោយការចាក់ ។

ទន្ទឹមនោះការសិក្សានេះពាក់ព័ន្ធនឹងទិន្នន័យដែលទទួលបានពីប្រជាជនស្កុតលែនទាំងអស់ចំនួន ៥.៤ លាននាក់ ហើយបន្ទាប់មកត្រូវបានវិភាគដោយអ្នកជំនាញមកពីសាកលវិទ្យាល័យ Edinburgh, Strathclyde, Aberdeen, Glasgow និង St Andrew ក៏ដូចជាសុខភាពសាធារណៈស្កុតលែន (PHS) ។

លោកសាស្រ្តាចារ្យ Aziz Sheikh អ្នកដឹកនាំការស្រាវជ្រាវនេះបាននិយាយថា “លទ្ធផលទាំងនេះគឺជាការលើកទឹកចិត្តខ្លាំងណាស់ ហើយបានផ្តល់ឲ្យយើងនូវហេតុផលជាច្រើនដើម្បីធ្វើឲ្យមានសុទិដ្ឋិនិយមសម្រាប់អនាគត” ។

លោកបន្តថា “ឥឡូវយើងមានភ័ស្តុតាងច្បាស់លាស់នៅទូទាំងប្រទេសថា ការចាក់វ៉ាក់សាំងគឺផ្តល់ការការពារប្រឆាំងនឹងការចូលសម្រាកព្យាបាលនៅមន្ទីរពេទ្យពីជំងឺកូវីដ ១៩” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ការចាក់វ៉ាក់សាំងលើកទីមួយ កាត់បន្ថយការឆ្លងកូវីដបាន ២ ភាគ ៣

ចុចអាន ៖ WHO អំពាវនាវដល់ប្រទេសអ្នកមានកុំទិញវ៉ាក់សាំងកូវីដបន្ថែម