ទីក្រុង ហាណូយ ជួបបាតុភូតកម្រ “ធ្លាក់ទឹកកក”

តាមការចុះផ្សាយរបស់ VN Express, កាលពីរាត្រីថ្ងៃសៅរ៍ ទីក្រុងហាណូយ បានជួបព្យុះដ៏ខ្លាំងមួយ បោកបក់ផ្តួលរំលំដើមឈើ ហើយជាពិសេសមានទាំងធ្លាក់ទឹកកកទៀតផង ដែលនេះជាបាតុភូតដ៏កម្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះនេះវាយប្រហារនៅម៉ោង៧:៣០នាទីយប់ ដោយពាំនាំមកជាមួយខ្យល់កន្ត្រាក់ ភ្លៀង ផ្គររន្ទះ និងទម្លាក់ទឹកកកអស់រយៈពេលប្រហែល ១៥ទៅ២០នាទី ជាហេតុបង្កការភ្ញាក់ផ្អើល យ៉ាងខ្លាំង។

វាក៏បោកបំបាក់ដើមឈើដួលសង្កត់យានយន្ត និងផ្តាច់ចរន្តអគ្គិសនីផងដែរ ប៉ុន្តែមកទល់ពេលនេះ មិនទាន់មានសេចក្តីរាយការណ៍អំពីមនុស្សរងរបួស ឬបាត់បង់ជីវិតនោះទេ។

តាមការបញ្ជាក់ពីអ្នកក្រុងហាណូយ, ត្បិតព្យុះខ្លាំងបែបនេះ គឺជារឿងតែងកើតមានពិតមែន តែការធ្លាក់ទឹកកកគឺកម្រកើតឡើងណាស់ ហើយទឹកកកនោះទៀតសោតមានទំហំប៉ុនៗមេដៃ។

ទោះបីជាយ៉ាងណាក៏ដោយ អ្នកក្រុងហាណូយ បែរជាសប្បាយរីករាយទៅវិញ ដោយនាំគ្នាចេញក្រៅផ្ទះទៅរើសយកដុំទឹកកក ព្រោះតែនេះគឺជាបាតុភូតកម្រ។ 

មជ្ឈមណ្ឌលជាតិសម្រាប់ការព្យាករធនធានជលសាស្ត្រ បានប្រកាសថា ព្យុះនេះគឺបណ្តាលមកពីប្រព័ន្ធសម្ពាធទាបនៅភាគខាងត្បូង ប្រទេសចិន ហើយបើតាម​ការ​ព្យាករ, ភ្លៀង និង​ផ្គរ​រន្ទះ នឹងបន្តប៉ុន្មានថ្ងៃទៀត អាស្រ័យហេតុនេះ ប្រជាជន ត្រូវប្រុងប្រយ័ត្ន៕

អត្ថបទ៖ សុខ សុវណ្ណ

ចុចអាន៖ ទីក្រុងហាណូយ ជួបគ្រោះរញ្ជួយដីកម្រិត ៤រ៉ិចទ័រ