ម៉ិកស៊ិក ចាប់ខ្លួនបងប្រុសស្ដេចគ្រឿងញៀន El Mencho

អាជ្ញាធរម៉ិកស៊ិកបានចាប់ខ្លួនលោក Abraham Oseguera ដែលជាបងប្រុសរបស់ស្តេចគ្រឿងញៀនដ៏កក្រើក El Mencho នៅរដ្ឋ Michoacán ហើយបច្ចុប្បន្នកំពុងស្ថិតក្នុងការឃុំឃាំងរបស់ការិយាល័យអគ្គមេធាវីម៉ិកស៊ិក ។ នេះបើយោងតាមការចេញផ្សាយដោយសារព័ត៌មាន CNN នៅថ្ងៃទី​២៣ ខែ​មេសានេះ ។

យោងតាមសេចក្តីថ្លែងការណ៍របស់ប្រធានាធិបតីម៉ិកស៊ិកលោក Andres Manuel Lopez Obrador ក៏បានបញ្ជាក់ពីការចាប់ខ្លួនបងប្រុសស្ដេចគ្រឿងញៀនដ៏កក្រើក Abraham Oseguera ដែលមានឈ្មោះក្រៅហៅថា Don Rondo ហើយរដ្ឋាភិបាលនឹងផ្តល់ព័ត៌មានបន្ថែមនៅពេលក្រោយ ខណៈមិនទាន់មានព័ត៌មានច្បាស់ការថា លោក Oseguera ស្ថិតក្រោមការចោទប្រកាន់ពីបទអ្វីនោះទេ ទើបត្រូវបានចាប់ឃុំខ្លួនបែបនេះ ។

កន្លងមកលោក Abraham Oseguera គឺជាមេគ្រឿងញៀនម៉ិកស៊ិក និងជាអតីតមេដឹកនាំកំពូលនៃក្រុមជូញដូរគ្រឿងញៀន Jalisco New Generation Cartel (CJNG) ដែលមានមូលដ្ឋាននៅរដ្ឋ Jalisco ។ លោកក៏មានបងប្រុសម្នាក់ទៀតផងដែរឈ្មោះ Nemesio Oseguera Cervantes ក៏ជាសមាជិកនៃមេដឹកនាំ CJNG និងជាមេដឹកនាំគ្រឿងញៀនដែលស្ថិតក្នុងបញ្ជីខ្មៅរបស់រដ្ឋាភិបាលម៉ិកស៊ិកផងដែរ ។

គួរបញ្ជាក់ថា កាលពីមុន រដ្ឋាភិបាលម៉ិកស៊ិកបានដាក់ឈ្មោះក្រុម Jalisco New Generation Cartel ជាក្រុមជួញដូរគ្រឿងញៀនដ៏គ្រោះថ្នាក់បំផុតមួយនៅក្នុងប្រទេស ខណៈមេក្រុមលោក El Mencho គឺជាស្តេចគ្រឿងញៀនដ៏មានឥទ្ធិពលដែលមានសមាជិកចំនួន ៥,០០០ នាក់ និងនៅគ្រប់ទ្វីបទាំងអស់ លើកលែងតែអង់តាក់ទិក ខណៈក្រុមជួញដូរដ៏ឃោរឃៅនេះថែមទាំងប្រព្រឹត្តិអំពើអមនុស្សធម៌ជាច្រើនផងដែរដូចជា ការធ្វើទារុណកម្ម និងឃាតកម្ម ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ ៖ ប៊ុន សុភាព