ហុងកុង ជួបខែមេសាក្តៅបំផុត មិនធ្លាប់មានក្នុងប្រវត្តិសាស្រ្ត ១៤០ឆ្នាំ

ត្បិតតែឈានចូលខែឧសភាហើយក៏ពិតមែន ប៉ុន្តែរបាយការណ៍ទើបបញ្ចេញរបស់ហុងកុង បានបង្ហាញថា ខែមុនគឺជាខែមេសាដែលក្តៅបំផុត ដែលទីក្រុងនេះមិនធ្លាប់ជួបប្រទះសោះចាប់តាំងពីឆ្នាំ១៨៨៤មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបញ្ជាក់ពីភ្នាក់ងារអាកាសធាតុរបស់ទីក្រុងនេះកាលពីថ្ងៃព្រហស្បតិ៍ទី២ខែឧសភា, សីតុណ្ហភាពជាមធ្យមកាលពីខែមុនគឺ ២៦.៤អង្សាសេ បានធ្វើឲ្យវាក្លាយជាខែមេសាក្តៅបំផុត គិតចាប់តាំងពីកំណត់ត្រា បានចាប់ផ្តើមកាលពី១៤០ឆ្នាំមុន។

ភ្នាក់ងារអាកាសធាតុ បានប្រកាសនៅលើប្រព័ន្ធផ្សព្វផ្សាយសង្គមថា “ត្បិតរដូវក្តៅមិនទាន់បញ្ចប់ក៏ពិតមែន ប៉ុន្តែខែមេសាគឺក្តៅខ្លាំងបំបែកកំណត់ត្រារួចទៅហើយ”។

ក្នុងរយៈពេលប៉ុន្មានឆ្នាំចុងក្រោយ ទីក្រុងរបស់ចិនមួយនេះ បានប្រឈមមុខនឹងកម្តៅក្តៅខ្លាំង ​ជាមួយសីតុណ្ហភាពហក់ឡើងខ្ពស់បំបែកកំណត់ត្រារៀងរាល់ឆ្នាំ ចាប់តាំងពីឆ្នាំ២០១៩មក។

នៅថ្ងៃទី២៧ខែមេសា ទីក្រុងហុងកុង ក៏បានជួបប្រទះសីតុណ្ហភាពខែមេសាខ្ពស់បំផុតផងដែរ ពោលគឺឈានដល់ ២៨.៨អង្សាសេ ផ្ទុយពីចន្លោះឆ្នាំ១៩៩១ ដល់ឆ្នាំ២០២០ ដែលសីតុណ្ហភាពប្រចាំថ្ងៃជាមធ្យមក្នុងខែមេសាគឺត្រឹមចន្លោះ២១.១ដល់២៥.៦អង្សាសេប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ ហុងកុង រងការវាយប្រហារ ដោយភ្លៀងធ្លាក់ខ្លាំងមិនធ្លាប់មាន ក្នុងរយៈពេល ១៤០ឆ្នាំ