សមាជិកណាតូ ព្រមានថា គំនិតលោក Macron អាចបញ្ឆេះសង្គ្រាមលោកលើកទី ៣

រដ្ឋមន្ត្រីការបរទេសហុងគ្រីដែលជាសមាជិកអង្គការណាតូ លោក Peter Szijjarto បានស្តីបន្ទោសចំពោះការលើកឡើងរបស់ប្រធានាធិបតីបារាំង Emmanuel Macron ពាក់ព័ន្ធរឿងបញ្ជូនទ័ពទៅកាន់អ៊ុយក្រែន ដោយព្រមានថា ទង្វើបែបនេះ នឹងបង្កឲ្យមានសង្គ្រាមលោកលើកទី៣ជាក់ជាមិនខានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលត្រូវបានស្នើឲ្យវែកញែកអំពីហានិភ័យពាក់ព័ន្ធគំនិតលោក Macron ដាក់ពង្រាយកងទ័ពបារាំង ទៅគាំទ្រទីក្រុងកៀវ, លោក Szijjarto បានថ្កោលទោស ហើយថ្លែងទៅទូរទស្សន៍បារាំង LCI កាលពីថ្ងៃសុក្រទី៣ខែឧសភាថា ការលើកឡើងរបស់មេដឹកនាំបារាំង នឹងរួមចំណែកធ្វើឲ្យស្ថានការណ៍កាន់តែតានតឹងខ្លាំងឡើងៗ។

លោក Szijjarto ប្រាប់អ្នកសារព័ត៌មានថា ប្រសិនបើសមាជិកណាតូណាមួយ បញ្ជូនទ័ពជើងគោកទៅ វានឹងក្លាយជាការប្រឈមមុខដាក់គ្នាដោយផ្ទាល់រវាងណាតូនិងរុស្ស៊ី ហើយវានឹងក្លាយជាសង្គ្រាមលោកលើកទីបី ជាក់ជាមិនខានឡើយ។ អ្នកការទូតកំពូលហុងគ្រីរូបនេះ ក៏រិះគន់គំនិតរបស់លោក Macron ដែលថា អាវុធនុយក្លេអ៊ែររបស់បារាំង អាចការពារអឺរ៉ុបបានផងដែរ។

លោកព្រមានថា “បើពេលមានសន្តិភាព វាមិនអីទេ ប៉ុន្តែក្នុងសម័យសង្រ្គាម សេចក្តីថ្លែងការណ៍បែបនេះ អាចត្រូវបានបកស្រាយខុស ហើយបង្កផលវិបាកធ្ងន់ធ្ងរ។ ប្រសិនបើស្ថានការណ៍កញ្ជ្រោលធ្លាយដល់សង្រ្គាមនុយក្លេអ៊ែរជាសកលមែន មនុស្សគ្រប់គ្នានឹងចប់”។

ការព្រមាននេះ គឺកើតឡើងក្រោយពេលលោក Macron ផ្តល់បទសម្ភាសដល់សារព័ត៌មាន The Economist ចេញផ្សាយកាលពីថ្ងៃព្រហស្បតិ៍ទី២ខែឧសភា ដែលលោកបានលើកឡើងថា​ ទីក្រុងប៉ារីស អាចបញ្ជូនទ័ព បើរុស្ស៊ី វាយបំបែកខ្សែត្រៀមជួរមុខ ប៉ុន្តែយ៉ាងណា សំណើនេះក៏តម្រូវឲ្យមានការជួយពីសំណាក់ទីក្រុងកៀវផងដែរ។

សូមបញ្ជាក់ នេះមិនមែនជាលើកទីមួយទេ ដែលមានសមាជិកអង្គការណាតូ ចេញមុខគំរាមផ្ទុះសង្គ្រាមលោកលើកទី៣ ជុំវិញការបញ្ជូនទ័ពទៅអ៊ុយក្រែន។ កាលពីខែមីនា រដ្ឋមន្ត្រីការបរទេសអ៊ីតាលី លោក Antonio Tajani និយាយថា ការដាក់ពង្រាយកងទ័ពណាតូ ដឹកនាំដោយសហរដ្ឋអាមេរិក ទៅសមរភូមិក្នុងប្រទេសអ៊ុយក្រែន អាចបណ្តាលឲ្យមានជម្លោះទ្រង់ទ្រាយធំជាសកល រហូតឈានដល់សង្គ្រាមលោកលើកទី៣តែម្តង។

ក្នុងអំឡុងបទសម្ភាសខាងក្រៅកម្មវិធី LetExpo នៅទីក្រុង Verona លោក Tajani បានបញ្ជាក់ច្បាស់ៗ ប្រឆាំងនឹងគំនិតដាក់ពង្រាយកងទ័ពណាតូនៅក្នុងប្រទេសអ៊ុយក្រែន ដោយនិយាយថា “ខ្ញុំគិតថា ណាតូ មិនគួរចូលអ៊ុយក្រែនទេ វានឹងក្លាយជាកំហុសមួយ។ យើង​ត្រូវ​ជួយ​អ៊ុយក្រែន​ការពារ​ខ្លួន ប៉ុន្តែ​ការ​ចូលទៅទីនោះ​ដើម្បី​ធ្វើ​សង្រ្គាម​ប្រឆាំង​រុស្ស៊ី ​មាន​ន័យ​ថា ​ប្រថុយប្រថានបង្ក​សង្រ្គាម​លោក​លើក​ទី​បី ពេកហើយ”។

ស្របពេលជាមួយគ្នានោះ លោក Tajani ក៏បានច្រានចោលនូវលទ្ធភាពបញ្ជូនកងទ័ពអ៊ីតាលី ទៅអ៊ុយក្រែនដែរ។

យ៉ាងណា សហរដ្ឋអាមេរិក អាល្លឺម៉ង់ អង់គ្លេស ប៉ូឡូញ សាធារណរដ្ឋឆែក និងបណ្តាប្រទេសអឺរ៉ុបជាច្រើនទៀត បានប្រកាសថា ពួកគេគ្មានគម្រោងបញ្ជូនទ័ពទៅអ៊ុយក្រែនឡើយ ​ព្រោះមិនចង់ឲ្យកងកម្លាំងរបស់ពួកគេ ចូលរួមដោយផ្ទាល់នៅក្នុងសង្រ្គាម ហើយក៏មិនចង់ឲ្យមានការប៉ះទង្គិចដោយផ្ទាល់ជាមួយរុស្ស៊ី ដែលជាប្រទេសមានអាវុធនុយក្លេអ៊ែរដែរ។

វិមានក្រឹមឡាំងក៏ធ្លាប់ព្រមានដែរថា ប្រសិនបើលោកខាងលិច បញ្ជូនទ័ពទៅអ៊ុយក្រែនមែន ពួកគេច្បាស់ជាប្រថុយ បង្កឲ្យមានការប្រឈមមុខដាក់គ្នាដោយផ្ទាល់មិនអាចចៀសបានរវាងណាតូ និងរុស្ស៊ីហើយ៕

អត្ថបទ៖ សុខ សុវណ្ណ

ចុចអាន៖ សង្គ្រាមលោកលើកទី៣នឹងផ្ទុះ បើណាតូ បញ្ជូនទ័ពទៅអ៊ុយក្រែន