ចាក់ប្រហារដ៏រន្ធត់ក្នុងមន្ទីរពេទ្យប្រទេសចិន ស្លាប់និងរបួសមនុស្សជាង១០នាក់

តាមសេចក្តីរាយការណ៍របស់ Xinhua, មានហេតុការណ៍ចាក់ប្រហារដ៏រន្ធត់មួយ នៅមន្ទីរពេទ្យ នៃខេត្តយូណាន ភាគនិរតីប្រទេសចិន ខណៈរបាយការណ៍បឋមបង្ហាញថា មានមនុស្សស្លាប់និងរបួសជាង១០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្ត្រីមូលដ្ឋាន, ហេតុការណ៍នេះកើតឡើងនាវេលាម៉ោង ១:២០ នាទីរសៀល ក្នុងមន្ទីរពេទ្យនៅតំបន់ Zhenxiong។

វីដេអូដែលគេបង្ហោះលើប្រព័ន្ធផ្សព្វផ្សាយសង្គម បានបង្ហាញឲ្យឃើញមនុស្សរត់ប្រសាចពេញមន្ទីរពេទ្យ ខណៈមូលហេតុនៅមិនទាន់ត្រូវបានគេដឹងនៅឡើយ។

ស្របពេលជាមួយគ្នានោះ ក្រុមមន្ត្រីបញ្ជាក់ថា ជនសង្ស័យត្រូវបានចាប់ខ្លួន ហើយពេលនេះ សមត្ថកិច្ចកំពុងប្រមូលព័ស្តុតាងនៅកន្លែង កើតហេតុ។

ភ្លាមៗក្រោយកើតហេតុ មិនមានការបញ្ចេញព័ត៌មានក្បោះក្បាយជាងនេះទេ ហើយរឿងរ៉ាវលម្អិតនឹងមានការផ្សាយជូននាពេលក្រោយ។

សូមបញ្ជាក់ថា ឧក្រិដ្ឋកម្ម​ហិង្សា​ទ្រង់ទ្រាយ​ធំបែបនេះ ​គឺ​កម្រកើតឡើងណាស់ ​នៅ​​ចិន ព្រោះប្រទេសនេះមានបំរាម​តឹងរ៉ឹង​មិនឲ្យប្រជាជន​កាន់​អាវុធ ប៉ុន្តែយ៉ាងណា មានករណីមួយចំនួនកើតឡើងក្នុងរយៈពេលប៉ុន្មានឆ្នាំចុងក្រោយនេះ៕

អត្ថបទ៖ សុខ សុវណ្ណ

ចុចអាន៖ ជប៉ុន ជួបហេតុការណ៍រន្ធត់មួយទៀត