ក្រោយប្រកាសលែងហុចគ្រាប់ ពេលនេះ អាមេរិក ព្រមានឈប់ផ្តល់អាវុធឲ្យអ៊ីស្រាអែល តែម្តង

ក្នុងបទសម្ភាសជាមួយ CNN ផ្សាយនៅថ្ងៃពុធទី៨ខែឧសភា ប្រធានាធិបតីសហរដ្ឋអាមេរិក លោក ចូ បៃដិន បានព្រមានទៅអ៊ីស្រាអែលថា ទីក្រុងវ៉ាស៊ីនតោន នឹងឈប់ផ្តល់អាវុធមួយចំនួន ប្រសិនបើទីក្រុងហ្ស៊េរុយសាឡិម បើកប្រតិបត្តិការជើងគោកទ្រង់ទ្រាយធំនៅទីក្រុង Rafah ក្នុងតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីលោក បៃដិន, “ប្រសិនបើពួកគេចូលទៅក្នុង Rafah ខ្ញុំមិនផ្តល់អាវុធឲ្យយកទៅប្រើ ដើម្បីដោះស្រាយបញ្ហានៅ Rafah ឡើយ ប៉ុន្តែសហរដ្ឋអាមេរិក ​នឹង​បន្ត​ធ្វើគ្រប់យ៉ាង ដើម្បី​ឲ្យ​ប្រាកដ​ថា ​អ៊ីស្រាអែល​មាន​សុវត្ថិភាព”។

លោកបន្ថែមថា កងទ័ពរបស់លោក Netanyahu អាចចូលទៅ Rafah ដើម្បីធ្វើប្រតិបត្តិការនៅតាមជាយដែន ប៉ុន្តែបើពួកគេចូលទៅក្នុងមជ្ឈមណ្ឌលនៃបណ្តុំប្រជាជនមែន ពួកគេនឹងមិនទទួលបានការគាំទ្រពីយើងទេ។

ស្របពេលជាមួយគ្នានោះ លោក បៃដិន ក៏​ទទួល​ស្គាល់ដែរ​ថា អាវុធ​របស់​អាមេរិក ពិតជា​ត្រូវ​បាន​អ៊ីស្រាអែល យកទៅ​ប្រើ​ដើម្បី​សម្លាប់​ជន​ស៊ីវិល​នៅ​តំបន់ ហ្គាហ្សា មែន។

ការព្រមានរបស់លោក បៃដិន ឈប់ផ្តល់សព្វាវុធនេះ កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីប្រភពមួយទម្លាយថា ផែនការដឹកជញ្ជូនគ្រាប់រំសេវពីសំណាក់សហរដ្ឋអាមេរិក ទៅឲ្យអ៊ីស្រាអែលត្រូវបញ្ឈប់ជាបន្ទាន់ ហើយក៏មិនមានការបញ្ជាក់ពីពេលវេលាចាប់ផ្ដើមហុចជំនួយសាជាថ្មីទៅឲ្យរដ្ឋាភិបាលទីក្រុងហ្ស៊េរុយសាឡិមដែរ។

ត្បិតតែសហរដ្ឋអាមេរិក បានបង្ហាញការមិនពេញចិត្តនិងប្រឆាំងដាច់ខាត ចំពោះប្រតិបត្តិការនៅ Rafah ក៏ដោយ ប៉ុន្តែអ៊ីស្រាអែល មិនខ្វល់ឡើយ ហើយនៅតែរឹងចចេសធ្វើសកម្មភាពនៅទីនោះដដែល។

សូមរម្លឹកថា លោក Netanyahu បានប្រកាសសង្រ្គាមលើក្រុមហាម៉ាស បន្ទាប់ពីចលនាប្រដាប់អាវុធប៉ាឡេស្ទីនមួយនេះ បើកប្រតិបត្តិការវាយប្រហារដ៏គួរឲ្យភ្ញាក់ផ្អើលកាលពីថ្ងៃទី៧ ខែតុលាឆ្នាំមុន ដោយសម្លាប់មនុស្សប្រហែល ១ ២០០ នាក់ និងចាប់ឈ្លើយសឹក ២៥០ នាក់ហើយជាការសងសឹក អ៊ីស្រាអែលក៏បានបើកការវាយប្រហារទ្រង់ទ្រាយធំ សម្លាប់ប្រជាពលរដ្ឋស្លូតត្រង់ជាង ៣៥ ០០០ នាក់៕

អត្ថបទ៖ សុខ សុវណ្ណ

ចុចអាន៖ អាមេរិក ប្រកាសលែងហុចគ្រាប់ឲ្យ អ៊ីស្រាអែល