អាមេរិក ប្រកាសលែងហុចគ្រាប់ឲ្យ អ៊ីស្រាអែល

ផែនការដឹកជញ្ជូនគ្រាប់រំសេវពីសំណាក់បងធំសហរដ្ឋអាមេរិកទៅកាន់ប្រទេសអ៊ីស្រាអែលត្រូវបានបញ្ឈប់ជាបន្ទាន់ ហើយក៏មិនមានការបញ្ជាក់ពីពេលវេលាចាប់ផ្ដើមហុចជំនួយសាជាថ្មីទៅឲ្យរដ្ឋាភិបាលទីក្រុងហ្ស៊េរុយសាឡិមនោះដែរ ស្របពេលដែលសេតវិមានកាន់តែថ្នាំងថ្នាក់ចិត្តចំពោះសកម្មភាពគ្មានត្រាប្រណីរបស់អ៊ីស្រាអែលនៅតំបន់ហ្គាហ្សា ។

ពាក់ព័ន្ធនឹងបញ្ហានេះដែរ មន្ត្រីអ៊ីស្រាអែល ២ រូបបានប្រាប់គេហទំព័រព័ត៌មានអាមេរិក Axios កាលពីថ្ងៃអាទិត្យថា “រដ្ឋាភិបាលអ៊ីស្រាអែលកំពុងតិះដៀលទៅដល់សម្ព័ន្ធមិត្តអាមេរិក ហើយសូមឲ្យរដ្ឋាភិបាលទីក្រុងវ៉ាស៊ីនតោនបញ្ជាក់ពីដើមចមនៃការផ្អាកដឹកជញ្ជូនគ្រាប់រំសេវមកឲ្យខ្លួនដែលកំពុងជាប់ដៃធ្វើសង្គ្រាមជាមួយក្រុមប្រដាប់អាវុធប៉ាឡេស្ទីនហាម៉ាស ជាពិសេសគឺផ្ទាំងស៊ីបនៅទីក្រុង Rafah ភាគខាងត្បូងតំបន់ហ្គាហ្សាតែម្ដង” ។

ស្របពេលជាមួយគ្នានេះ លោកប្រធានាធិបតីអាមេរិក Joe Biden បានប្រកាសថា សង្គ្រាមលុកលុយរបស់អ៊ីស្រាអែលទៅលើទីក្រុង Rafah ដែលសម្បូរដោយជនស៊ីវិលនឹងក្លាយជា “បន្ទាត់ក្រហម” ហើយលោកប្រធានាធិបតីថែមទាំងបានស្តីបន្ទោសជាសាធារណៈចំពោះយុទ្ធនាការទម្លាក់គ្រាប់បែកសម្លាប់មនុស្សមិនរើសមុខលើតំបន់ហ្គាហ្សាផងដែរ ។

បើទោះបីជា សហរដ្ឋអាមេរិកបានគ្រហឹម និងបង្ហាញវោហារសាស័ព្ទបែបនេះក្ដី ប៉ុន្តែយោងតាមការចុះផ្សាយដោយសារព័ត៌មាន CNN បានឲ្យដឹងថា ចាប់តាំងពីផ្ទុះព្រឹត្តិការណ៍ ៧ តុលា ២០២៣ មក រដ្ឋបាលលោក Biden បានហុចអាវុធ និងគ្រាប់រំសេវជាហូរហែទៅកាន់ប្រទេសអ៊ីស្រាអែល ខណៈគិតត្រឹមពេលនេះ ទីក្រុងវ៉ាស៊ីនបានអនុម័តការដឹកអាវុធជាង ១០០ ដងទៅហើយឲ្យរដ្ឋជ្វីហ្វមួយនេះ ។

ចំណែកទាក់ទិននឹងហេតុអ្វីបានជាការផ្ដល់កញ្ចប់ជំនួយជាង ១០០ ដងមកនេះ មិនមានការចុះផ្សាយជាព័ត៌មាន នោះក៏ដោយសារតែជាទូទៅរាល់ការប្រកាសជាសាធារណៈក្នុងការហុចជំនួយណាមួយទៅបរទេស គឺលុះត្រាតែកញ្ចប់ជំនួយទាំងនោះមានតម្លៃលើសពី ២៥០ លានដុល្លារ ។ កញ្ចប់ធំទាំងនេះត្រូវបានអនុម័តកាលពីខែមុន ដែលរួមមានគ្រាប់បែក MK84 ទម្ងន់ជិត ១ តោន និងគ្រាប់បែក MK82 ទម្ងន់ជិត ២៣០ គីឡូក្រាម ក៏ដូចជាគ្រាប់បែកខ្នាតតូចជាង ១,០០០ គ្រាប់ផងដែរ ។

គួរបញ្ជាក់ថា លោកនាយករដ្ឋមន្ត្រីអ៊ីស្រាអែល Benjamin Netanyahu បានប្រកាសសង្រ្គាមលើក្រុមហាម៉ាស បន្ទាប់ពីចលនប្រដាប់អាវុធរបស់ប៉ាឡេស្ទីនមួយនេះបានបើកប្រតិបត្តិការវាយប្រហារដ៏គួរឲ្យភ្ញាក់ផ្អើលមួយកាលពីថ្ងៃទី៧ ខែតុលាឆ្នាំមុន ដោយបានសម្លាប់មនុស្សប្រហែល ១,២០០ នាក់ និងចាប់ឈ្លើយសឹកប្រហែល ២៥០ នាក់ផងដែរ ។

ទន្ទឹមនោះ ក្នុងភ្នក់ភ្លើងសង្គ្រាមជិត ៧ ខែក្រោយមកនេះ អ៊ីស្រាអែលក៏បានប្រើថ្នាំខ្លាំងសងសឹកទៅលើតំបន់ហ្គាហ្សាយ៉ាងចាស់ដៃដូចគ្នា ដោយរហូតមកដល់ពេលនេះបានសម្លាប់ប្រជាពលរដ្ឋស្លូតត្រង់ជាង ៣៥,០០០ នាក់ហើយ ខណៈលោក Biden និងមន្ត្រីអ្នកមុខអ្នកការរបស់លោកកាន់តែសង្គ្រឺតធ្មេញរិះគន់ទៅដល់នាយករដ្ឋមន្ត្រីអ៊ីស្រាអែលចំពោះអំពើដ៏សាហាវយង់ឃ្នងមួយនេះ ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល ចូលឆែកឆេរការិយាល័យ Al Jazeera ក្រោយសម្រេច បិទការផ្សាយ