ហេតុផលនៅពីក្រោយ រុស្ស៊ី បញ្ចប់តំណែងរដ្ឋមន្ត្រីការពារជាតិ 

តាមសេចក្តីរាយការណ៍របស់ RT កាលពីរាត្រីថ្ងៃអាទិត្យទី១២ខែឧសភា, ប្រធានាធិបតីរុស្ស៊ី លោកវ្ល៉ាឌីមៀរ ពូទីន បានបណ្តេញលោក Sergei Shoigu ចេញពីតំណែងជារដ្ឋមន្ត្រីក្រសួងការពារជាតិ ដោយជំនួសវិញដោយឧបនាយករដ្ឋមន្ត្រីស្តីទី Andrei Belousov។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ យោងតាមការបញ្ជាក់ពីក្រុមប្រឹក្សាសហព័ន្ធ, ក្រោយចេញពីក្រសួងការពារជាតិ លោក Shoigu ត្រូវបានតែងតាំងជាលេខាធិការនៃក្រុមប្រឹក្សាសន្តិសុខរុស្ស៊ីជំនួសវិញ។

ទោះបីជាយ៉ាងណាក៏ដោយ ការផ្លាស់ប្តូរតំណែងនេះ ត្រូវបានគេមើលឃើញថា ជាផ្នែកមួយនៃការរុះរើគណរដ្ឋមន្ត្រីថ្មី ស្របពេលដែលសង្គ្រាមនៅអ៊ុយក្រែន កំពុងបន្តគ្មានសញ្ញាថយកម្តៅទាល់តែសោះ។

ពាក់ព័ន្ធបញ្ហាផ្លាស់ប្តូររដ្ឋមន្ត្រីនេះដែរ បើយោងតាមអ្នកនាំពាក្យវិមានក្រឹមឡាំង លោក Dmitry Peskov បានពន្យល់ថា “ពិតណាស់ហេតុផលនៅពីក្រោយរឿងនេះគឺបញ្ហាសេដ្ឋកិច្ច។ ស្របពេលដែលថវិកាយោធារុស្ស៊ី ត្រូវចំណាយច្រើនក្នុងល្បឿនយ៉ាងឆាប់រហ័ស វាពិតជាមានសារៈសំខាន់បំផុត ដែលត្រូវដាក់បញ្ចូលអ្នកខ្លាំងខាងសេដ្ឋកិច្ចយោធា ឲ្យចូលទៅដោះស្រាយបញ្ហាសេដ្ឋកិច្ចជាតិ”។

យោងតាមលោក Peskov, ថវិកាយោធារុស្ស៊ី បានកើនឡើងពី៣% ទៅ ៦.៧% នៃផលិតផលក្នុងស្រុកសរុបថ្នាក់ជាតិ គិតចាប់តាំងពីជម្លោះអ៊ុយក្រែនផ្ទុះឡើង។ លោកបន្ថែមថា វាមិនជាធ្ងន់ធ្ងរអ្វីពេកទេសម្រាប់សេដ្ឋកិច្ចរុស្ស៊ី ប៉ុន្តែស្ថានភាពនៅតែស្រដៀងនឹងចុងសម័យសូវៀត ពេលដែលការចំណាយយោធារបស់សហភាពសូវៀតមានចំនួន ៧.៤% នៃផលិតផលក្នុងស្រុកសរុបរបស់ខ្លួន។ ស្ថានភាពបែបនេះនៅតែសំខាន់ខ្លាំង ហើយទាមទារឲ្យមានការឆ្លើយតបគ្រប់គ្រាន់ពីអាជ្ញាធរ។

សូមបញ្ជាក់ថា លោក Sergei Shoigu ត្រូវបានតែងតាំងជារដ្ឋមន្ត្រីក្រសួងការពារជាតិនៅក្នុងឆ្នាំ ២០១២។

កើតនៅឆ្នាំ១៩៥៥ ក្នុងទីក្រុង Tuva នៃតំបន់ស៊ីបេរី ជិតប្រទេសម៉ុងហ្គោលី, ដំបូងឡើយ បុរសវ័យ៦៨ឆ្នាំរូបនេះ ត្រឹមជាមន្ត្រីតូចទាបប៉ុណ្ណោះក្រោយការដួលរលំសហភាពសូវៀត ប៉ុន្តែលោកបានវិវឌ្ឍន៍ខ្លួនដោយធ្វើដំណើរមកទីក្រុងមូស្គូ ចូលរួមក្នុងជួររដ្ឋាភិបាលរបស់ប្រធានាធិបតីសហព័ន្ធរុស្ស៊ី Boris Yeltsin រួចក៏ក្លាយជារដ្ឋមន្ត្រីក្រសួងគ្រាអាសន្ន នាពេលនោះ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការពារជាតិរុស្ស៊ី រាយការណ៍ជូនលោក ពូទីន ក្រោយធ្វើទស្សនកិច្ច កូរ៉េខាងជើង