ព័ត៌មានអន្ដរជាតិ

តើនរណាអាចនឹងក្លាយជានាយករដ្ឋមន្ត្រីថ្មីរបស់ ថៃ បើលោក សេដ្ឋា អស់តំណែង?

បានផុស

៣ សប្តាហ៍ មុន

នៅ

ថ្ងៃអាទិត្យ ២៦ ឧសភា ២០២៤

ដោយ

បច្ចុប្បន្នប្រទេសថៃកំពុងស្ថិតក្នុងភាពចលាចលផ្នែកនយោបាយ ជាពិសេសពាក់ព័ន្ធនឹងការរង្គោះរង្គើតំណែងនាយករដ្ឋមន្ត្រី បន្ទាប់ពីលោក សេដ្ឋា ថាវីស៊ីន អាចប្រឈមនឹងអស់កៅអីមួយនេះ ក្រោយរឿងតែងតាំងរដ្ឋមន្ត្រីទៅឲ្យអតីតមេធាវីដែលជាប់ក្ដីក្ដាំព្រហ្មទណ្ឌ ។ នេះបើយោងតាមការចេញផ្សាយដោយសារព័ត៌មាន The Nation កាលពីថ្ងៃទី២៥ ខែឧសភាកន្លងទៅ ។

សមាជិកព្រឹទ្ធសភាចំនួន ៤០ រូបបានដាក់ញត្តិទៅតុលាការឲ្យដកតំណែងលោក សេដ្ឋា ដោយសារតែបានបំពានរដ្ឋធម្មនុញ្ញ បន្ទាប់ពីលោកនាយករដ្ឋមន្ត្រីបានតែងតាំងលោក Pichit Chuenban ធ្វើជារដ្ឋមន្ត្រីទីស្តីការនាយករដ្ឋមន្ត្រីកាលពីខែមុន ព្រោះអតីតមេធាវីរូបនេះខ្វះសុចរិតភាព និងបទដ្ឋានសីលធម៌ដែលតម្រូវដោយរដ្ឋធម្មនុញ្ញ ជាពិសេសលោកជាប់ពាក់ព័ន្ធទោសព្រហ្មទណ្ឌ ។

ក្នុងនោះចៅក្រមតុលាការធម្មនុញ្ញចំនួន ៦ រូប ក្នុងចំណោមចៅក្រមទាំង ៩ រូបបានបោះឆ្នោតគាំទ្រ ក៏ដូចជាទទួលយកញត្តិពីសមាជិកព្រឹទ្ធសភាទាំង ៤០ រូប ដោយលើកហេតុផលថា លោក Pichit ត្រូវបានផ្តន្ទាទោសឲ្យជាប់ពន្ធនាគាររយៈពេល ៦ ខែកាលពីឆ្នាំ ២០០៨ ពីបទមិនគោរពតុលាការ ក្រោយមានការចោទប្រកាន់ថា បានប៉ុនប៉ងសូកប៉ាន់មន្ត្រីតុលាការចំនួន ២ លានបាត (៥៥,២១៨ ដុល្លារ) ដោយលាក់លុយនៅក្នុងថង់គ្រឿងទេសមួយ ខណៈអាជ្ញាប័ណ្ណច្បាប់របស់លោកក៏ត្រូវបានក្រុមប្រឹក្សាមេធាវីនៃប្រទេសថៃព្យួររយៈពេល ៥ ឆ្នាំផងដែរ បន្ទាប់ពីមានករណីនេះ ។

ទន្ទឹមនោះ ប្រសិនបើលោក សេដ្ឋា ត្រូវដកចេញពីតំណែងមែននោះ រដ្ឋធម្មនុញ្ញថៃបានចែងហើយថា សភាត្រូវបោះឆ្នោតជ្រើសរើសនាយករដ្ឋមន្ត្រីថ្មីពីបេក្ខជននាយករដ្ឋមន្ត្រីដែលស្នើឡើងក្នុងការបោះឆ្នោតលើកចុងក្រោយដោយគណបក្សនយោបាយដែលមានសមាជិកសភាយ៉ាងតិច ២៥ រូប ហើយអ្នកឈ្នះត្រូវតែទទួលបានសំឡេងច្រើនជាងពាក់កណ្តាលពីសភាជាន់ទាប ឬ ២៥០ សំឡេងក្នុងចំណោមសមាជិកសភាចំនួន ៥០០ រូប ។

ស្របពេលជាមួយគ្នានេះ ផ្អែកលើបេក្ខជននាយករដ្ឋមន្ត្រីដែលស្នើឡើងក្នុងការបោះឆ្នោតកាលពីខែឧសភា ឆ្នាំ២០២៣ និងមានសមាជិកសភាគ្រប់ ២៥ រូបអាចមាន ៥ គណបក្សនយោបាយដូចជា៖

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. គណបក្សភឿថៃ ដែលមានអាសនៈសមាជិកសភាចំនួន ១៤១ បានស្នើបេក្ខភាពនាយករដ្ឋមន្ត្រីចំនួន ៣ រូបគឺលោក សេដ្ឋា, លោកស្រី ផេថងថាន ស៊ីណាវ៉ាត្រា និងលោក Chaikasem Nitisiri ។ លោកស្រី ផេថងថាន ដែលជាកូនស្រីរបស់ស្ថាបនិកបក្សភឿថៃ និងជាអតីតនាយករដ្ឋមន្ត្រី ថាក់ស៊ីន អាចមានឱកាសច្រើនជាងលោក Chaikasem ដែលជាអតីតរដ្ឋមន្ត្រីក្រសួងយុត្តិធម៌ និងជាប្រធានយុទ្ធសាស្ត្រនយោបាយរបស់បក្សភឿថៃ ។

២. គណបក្សចលនាឆ្ពោះទៅមុខ (MF) ដែលមានអាសនៈសមាជិកសភាចំនួន ១៥១ រូបបានស្នើតែលោក Pita Limjaroenrat ប៉ុណ្ណោះជាបេក្ខជននាយករដ្ឋមន្ត្រី ។ ស្របពេលបច្ចុប្បន្នបក្សនេះស្ទើរតែផុតដង្ហើមទៅទៀត ជុំវិញគោលនយោបាយធ្វើវិសោធនកម្មច្បាប់ស្ដីពីការប្រមាថព្រះមហាក្សត្រ ដូច្នេះឱកាសនៃការឡើងកាន់តំណែងជានាយករដ្ឋមន្ត្រីនោះ គឺតិចតួចស្ដួចស្ដើងមែនទែន ។

៣. គណបក្សភូមិចៃថៃ ដែលមាន ៧១ អាសនៈបានដាក់មេដឹកនាំរបស់ខ្លួនគឺលោក Anutin Charnvirakul ជាបេក្ខជននាយករដ្ឋមន្ត្រី ។ លោក Anutin អាចនឹងមានទឹកមាត់លេបក្នុងការកាន់តំណែងជានាយករដ្ឋមន្ត្រីទី៣១ របស់ថៃ ប្រសិនបើគណបក្សរបស់លោកទទួលបានសំឡេងភាគច្រើនក្នុងរដ្ឋាភិបាលចម្រុះ ។

៤. គណបក្សប៉ាឡាំង ប្រ៉ាឆារដ្ឋ ដែលមានអាសនៈសមាជិកសភាចំនួន ៤០ បានស្នើមេដឹកនាំរបស់ខ្លួនគឺលោកឧត្តមសេនីយ៍ Prawit Wongsuwan ជាបេក្ខជននាយករដ្ឋមន្ត្រី ។ លោកត្រូវបានគេជឿថាជាអ្នកនៅពីក្រោយរដ្ឋប្រហារយោធាឆ្នាំ ២០១៤ ខណៈឱកាសរបស់លោក Prawit ក្នុងការក្លាយជានាយករដ្ឋមន្ត្រីគឺពិបាកនឹងគួរឲ្យជឿណាស់ ។

៥. គណបក្សរួបរួមជាតិថៃ ដែលមានអាសនៈសមាជិកសភាចំនួន ៣៦ បានស្នើអតីតនាយករដ្ឋមន្ត្រី ប្រាយុទ្ធ ចាន់អូចា និងលោក Pirapan Salirathavibhaga ជាបេក្ខជននាយករដ្ឋមន្ត្រី ។ យ៉ាងណាក៏ដោយ លោក ប្រាយុទ្ធ មិនមានសិទ្ធិទទួលបានតំណែងនេះទៀតនោះទេ ខណៈពេលនេះលោកជាទីប្រឹក្សាឲ្យក្រុមហ៊ុនឯកជនមួយកន្លែង ។

គួរបញ្ជាក់ថា លោក សេដ្ឋា ថាវីស៊ីន បានឡើងកាន់តំណែងជានាយករដ្ឋមន្ត្រីថៃកាលពីថ្ងៃទី២២ ខែសីហា ឆ្នាំ២០២៣ ហើយពាក់ព័ន្ធនឹងរឿងរ៉ាវដកតំណែងរបស់អតីតឧកញ៉ាសេដ្ឋីអចលនទ្រព្យរូបនេះដែរ តុលាការសុំឲ្យមានការពន្យល់ជាលាយលក្ខណ៍អក្សរពីលោក សេដ្ឋា នៅថ្ងៃទី៧ ខែមិថុនា ហើយតុលាការក៏នឹងពិចារណាលើសំណុំរឿងនេះរយៈពេល ២ ទៅ ៣ ខែ មុននឹងចេញសាលក្រមសម្រេចជាផ្លូវការផងដែរ ៕