ព័ត៌មានអន្ដរជាតិ

កូរ៉េខាងជើង បង្ហោះប៉េងប៉ោងចងភ្ជាប់សំរាម និងលាមក ចូលកូរ៉េខាងត្បូង

បានផុស

២ years មុន

នៅ

ថ្ងៃពុធ ២៩ ឧសភា ២០២៤

ដោយ

Chheang

រដ្ឋាភិបាលក្រុងសេអ៊ូល បានក្រើនរំឭកប្រជាជនខ្លួន ដែលរស់នៅតាមបន្ទាត់ព្រំដែនជាមួយកូរ៉េខាងជើង ឲ្យមានការប្រុងប្រយ័ត្ន ក្រោយពីមានប៉េងប៉ោងជាង៩០ ត្រូវបានបង្ហោះចូលទឹកដីកូរ៉េខាងត្បូង។ បើតាមការចុះផ្សាយរបស់សារព័ត៌មាន Yonhap នៅថ្ងៃទី២៩ ខែឧសភា នេះ បានឲ្យដឹងថា នៅលើប៉េងប៉ោងមានចងភ្ជាប់ជាមួយវត្ថុផ្សេងៗគ្នា ហើយក្នុងនោះមានទាំងសំរាម និងលាមកផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាកូរ៉េខាងត្បូង បាននិយាយថា ប៉េងប៉ោងទាំងនេះ ត្រូវបានបង្ហោះចេញពីកូរ៉េខាងជើង នៅត្រង់ព្រំដែនជម្លោះរវាងប្រទេសទាំង២ ដែលចាំបាច់តម្រូវឲ្យប្រជាជនកូរ៉េខាងត្បូងមានការប្រុងប្រយ័ត្ន និងត្រូវរាយការណ៍ទៅប៉ូលិស ឬយោធា ក្នុងករណីប្រទះឃើញណាមួយ។

Yonhap បានផ្សាយថា ប៉េងប៉ោងច្រើនជាង៩០ ត្រូវបានរកឃើញ ខណៈមានខ្លះបានធ្លាក់ចុះដល់ដី ឯខ្លះទៀតកំពុងហោះនៅលើមេឃនៅឡើយ។ បើតាមរូបភាពដែលថតបាន បង្ហាញថា នៅលើប៉េងប៉ោងមានខិត្តប័ណ្ណឃោសនា ថង់ប្លាស្ទិកពោរពេញដោយសំរាម និងខ្លះទៀតជាលាមក។

ការបង្ហោះប៉េងប៉ោងចូលដីកូរ៉េខាងត្បូង ធ្វើឡើងបន្ទាប់ពីមានសុន្ទរកថារបស់អនុរដ្ឋមន្ត្រីក្រសួងការពារជាតិក្រុងសេអ៊ូល ដែលរៀបរាប់ថា នឹងមានការធ្វើសមយុទ្ធការពារជាតិខ្នាតធំមួយ នៅថ្ងៃចន្ទ ដើមសប្ដាហ៍នេះ និងការព្រមានថា កូរ៉េខាងជើងអាចនឹងបញ្ជូនរបស់កខ្វក់ ឬសំរាមចូលតំបន់ព្រំដែន ដើម្បីជាការឆ្លើយតបនឹងសកម្មជនកូរ៉េខាងត្បូងមួយចំនួន។ ក្នុងរយៈពេលជាច្រើនឆ្នាំកន្លងមក សកម្មជនកូរ៉េខាងត្បួង បាននាំគ្នាបង្ហោះប៉េងប៉ោងចូលក្នុងប្រទេសកូរ៉េខាងជើង ដើម្បីបង្ហាញពីខិត្តប័ណ្ណរិះគន់លោក គីម ជុងអ៊ុន មេដឹកនាំកូរ៉េខាងជើង និងមានខ្លះជាបន្ទះ USB ផ្ទុកនូវវីដេអូចម្រៀង K-Pop។

គួររំឭកថា កូរ៉េខាងត្បូង និងកូរ៉េខាងជើង នៅតែមើលមុខគ្នាមិនចំដដែល បើទោះជាមានកិច្ចព្រមព្រៀងឈប់បាញ់ ដើម្បីបញ្ចប់សង្គ្រាមកូរ៉េឆ្នាំ១៩៥០-១៩៥៣ ក៏ដោយ។ ការប៉ះទង្គិចគ្នាធ្វើឡើងនៅតាមតំបន់ព្រំដែនអន្តរកូរ៉េ ហើយក្រុងព្យុងយ៉ាងតែងដាក់ពង្រាយគ្រាប់មីស៊ីល និងគ្រាប់រ៉ុក្កែតតម្រង់ទៅកាន់កូរ៉េខាងត្បូង ព្រមទាំងការគំរាមវាយលុកជារឿយៗទៅលើរដ្ឋាភិបាលក្រុងសេអ៊ូល៕

ដោយ៖ ឈាង