យន្តហោះចម្បាំងរុស្ស៊ីដ៏ថ្មីសន្លាងមួយគ្រឿងតម្លៃ ៦៥លានដុល្លារ ត្រូវអ៊ុយក្រែន កម្ទេច

តាមសេចក្តីរាយការណ៍របស់ Daily Mail, កងកម្លាំងអ៊ុយក្រែន បានបញ្ជូនដ្រូន Kamikaze ទៅកម្ទេចយន្តហោះចម្បាំង Su-57 ដ៏ថ្មីសន្លាងរបស់លោក វ្ល៉ាឌីមៀរ ពូទីន ហើយយន្តហោះនេះទៀតសោត មួយគ្រឿងមានតម្លៃ ៦៥លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធរឿងនេះដែរ ចារកម្មយោធាទីក្រុងកៀវ បានបញ្ចេញរូបភាពផ្កាយរណបបង្ហាញពីទិដ្ឋភាព ក្រោយការវាយប្រហារកាលពីថ្ងៃសៅរ៍ទី៨ខែមិថុនា ក្នុងមូលដ្ឋានទ័ពអាកាស Akhtubinsk នៅតំបន់ Astrakhan ភាគខាងត្បូងប្រទេសរុស្ស៊ី។

គេដឹងថា នេះជាលើកដំបូងហើយដែលយន្តហោះចម្បាំង Su-57 ជំនាន់ទី៥ ត្រូវបានកម្ទេច និងក៏ជាលើកដំបូងដែរ ដែលបន្ទាយទ័ពអាកាស Akhtubinsk រងការវាយប្រហារ។ ទោះបីជាយ៉ាងណាក៏ដោយ មកទល់ពេលនេះ ភាគីរុស្ស៊ី មិនទាន់ចេញបកស្រាយអ្វីទេ ពាក់ព័ន្ធការវាយប្រហារខាងលើ។

សូមបញ្ជាក់ថា ដើមឡើយ ទីក្រុងមូស្គូ តែងតែលើកសរសើរម្តងហើយម្តងទៀតថា Su-57 គឺជាយន្តហោះចម្បាំងល្អផ្តាច់គេលើលោក។ Su-57 មានសមត្ថភាពផ្ទុកមីស៊ីលបំបាំងកាយ ហោះបានចម្ងាយរាប់ពាន់គីឡូម៉ែត្រ ហើយ វាក៏ត្រូវបានប្រើប្រាស់ផងដែរ ដើម្បីបាញ់កម្ទេចមីស៊ីល Kh-59 និង Kh-69 របស់អ៊ុយក្រែន។

យោងតាមរបាយការណ៍របស់ទីភ្នាក់ងារសារព័ត៌មានរុស្ស៊ី កងកម្លាំងប្រដាប់អាវុធរបស់ទីក្រុងមូស្គូ ទទួលបានយន្តហោះ Su-57 ថ្មីជាង១០គ្រឿងកាលពីឆ្នាំមុន ខណៈ៧៦គ្រឿងទៀត គ្រោងផលិតនៅឆ្នាំ២០២៨៕

អត្ថបទ៖ សុខ​ សុវណ្ណ

ចុចអាន៖ លោក Macron ប្រកាសបញ្ជូនយន្តហោះចម្បាំង ទៅឲ្យ អ៊ុយក្រែន