លោក Macron ប្រកាសបញ្ជូនយន្តហោះចម្បាំង ទៅឲ្យ អ៊ុយក្រែន

ក្រៅពីការបង្ហាញគំនិតចង់បញ្ជូនទ័ពទៅជួយកងកម្លាំងលោក វ្ល៉ាឌីមៀរ ហ្សេលេនស្គី, ពេលនេះប្រធានាធិបតីបារាំងលោក Emmanuel Macron ប្រកាសថា ទីក្រុងប៉ារីស នឹងផ្តល់យន្តហោះចម្បាំងប្រភេទ Mirage 2000-5 ទៅឲ្យទីក្រុងកៀវ និងបណ្តុះបណ្តាលពីឡុតអ៊ុយក្រែន ឲ្យបើកយន្តហោះនេះថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ទូរទស្សន៍ TF1 កាលពីថ្ងៃព្រហស្បតិ៍ទី៦ខែមិថុនា លោក Macron និយាយថា “ថ្ងៃស្អែក យើងនឹងចាប់ផ្តើមកិច្ចសហប្រតិបត្តិការថ្មីមួយ និងប្រកាសពីការផ្ទេរយន្តហោះចម្បាំង Mirage 2000-5 ដែលផលិតដោយក្រុមហ៊ុនផលិតបារាំង Dassault ទៅឲ្យអ៊ុយក្រែននិងបណ្តុះបណ្តាលពីឡុតអ៊ុយក្រែន នៅបារាំងថែមទៀត”។

សូមរម្លឹកបន្តិច ក្រៅពីយន្តហោះចម្បាំង F-16 ដែលផលិតដោយសហរដ្ឋអាមេរិក, ទីក្រុងកៀវក៏បានស្នើសុំយន្តហោះចម្បាំង Mirage 2000 ជាយូរមកហើយដែរ ជាក់ស្តែងនៅក្នុងការបង្ហោះលើប្រព័ន្ធផ្សព្វផ្សាយសង្គមកាលពីខែមករា មេបញ្ជាការកងទ័ពអាកាសអ៊ុយក្រែន និយាយថា យន្តហោះទាំងនេះ នឹងជួយបង្កើនសក្តានុពលប្រយុទ្ធនៃកងកម្លាំងសម័យសូវៀតរបស់អ៊ុយក្រែនបាន។

ទោះបីជាយ៉ាងណាក៏ដោយ លោក Macron មិនបញ្ជាក់ឡើយថាតើ ទីក្រុងប៉ារីស នឹងបញ្ជូនយន្តហោះប្រភេទនេះប៉ុន្មានគ្រឿងទៅឲ្យលោក ហ្សេលេនស្គី។

យោងតាមទិន្នន័យទ័ពអាកាសរបស់គេហទំព័រ Flight International, ប្រទេសបារាំង មានយន្តហោះ Mirage 2000-5 ចំនួន២៦គ្រឿង និងយន្តហោះ Mirage 2000-D ចាស់ៗចំនួន៦៥គ្រឿង ដែលកំពុងដាក់ឲ្យធ្វើប្រតិបត្តិការ ហើយគេមិនច្បាស់ទេថាតើ បារាំងនឹងប្រគល់យន្តហោះថ្មីឬចាស់ ទៅឲ្យអ៊ុយក្រែន។

ក្រៅពីការប្រកាសផ្តល់យន្តហោះចម្បាំងទៅឲ្យទីក្រុងកៀវ កាលពីខែមុន លោក Macron ក៏លើកឡើងដែរថា​ ទីក្រុងប៉ារីស អាចបញ្ជូនទ័ពទៅអ៊ុយក្រែន បើរុស្ស៊ី វាយបំបែកខ្សែត្រៀមជួរមុខ។

យ៉ាងណា សហរដ្ឋអាមេរិក អាល្លឺម៉ង់ អង់គ្លេស ប៉ូឡូញ សាធារណរដ្ឋឆែក និងបណ្តាប្រទេសអឺរ៉ុបជាច្រើនទៀត បានប្រកាសថា ពួកគេគ្មានគម្រោងបញ្ជូនទ័ពទៅអ៊ុយក្រែនឡើយ ​ព្រោះមិនចង់ឲ្យកងកម្លាំងរបស់ពួកគេ ចូលរួមដោយផ្ទាល់នៅក្នុងសង្រ្គាម ហើយក៏មិនចង់ឲ្យមានការប៉ះទង្គិចដោយផ្ទាល់ជាមួយរុស្ស៊ី ដែលជាប្រទេសមានអាវុធនុយក្លេអ៊ែរដែរ៕

អត្ថបទ៖ សុខ សុវណ្ណ

ចុចអាន៖ សមាជិកណាតូ ព្រមានថា គំនិតលោក Macron អាចបញ្ឆេះសង្គ្រាមលោកលើកទី ៣