G7 ឯកភាពយកទ្រព្យសម្បត្តិបង្កករបស់រុស្ស៊ី ជួយអ៊ុយក្រែន

មេដឹកនាំប្រទេសអ្នកមានទាំង៧ ឬគេស្គាល់ថា G7 បានព្រមព្រៀងគ្នាហើយថា ពួកគេនឹងយកទ្រព្យសម្បត្តិបង្កករបស់រុស្ស៊ី ដើម្បីផ្តល់ជំនួយក្នុងទំហំទឹកប្រាក់៥០ពាន់លានដុល្លារទៅឲ្យអ៊ុយក្រែន ហើយផែនការនេះនឹងត្រូវប្រកាសក្នុងកិច្ចប្រជុំកំពូល នៅប្រទេសអ៊ីតាលីតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹងទេ បើតាមសំណើដែលលើកឡើងដោយសហរដ្ឋអាមេរិក និងត្រូវបានចុះផ្សាយដោយ AFP នៅថ្ងៃព្រហស្បតិ៍ទី១៣ខែមិថុនា, G7 ក៏នឹងបង្កើនសម្ពាធសេដ្ឋកិច្ចថ្មីៗទៅលើប្រទេសរុស្ស៊ី ផងដែរ។

សហភាពអឺរ៉ុប (EU) និង G7 បានបង្កកទ្រព្យសកម្មរបស់ធនាគារកណ្តាលរុស្ស៊ីជាង ៣២០ពាន់លានដុល្លារ ហើយថែមទាំងបានរឹបអូសទ្រព្យសម្បត្តិឯកជនដូចជា នាវាប្រណីត អចលនទ្រព្យ និងទ្រព្យសម្បត្តិផ្សេងៗពីមន្ត្រីរដ្ឋការទាំងឡាយដែលជិតស្និទ្ធនឹងប្រធានាធិបតីរុស្ស៊ី លោក វ្ល៉ាឌីមៀរ ពូទីន ទៀតផង។

ទន្ទឹមនោះ វិទ្យាស្ថានច្បាប់អ៊ុយក្រែន ប៉ាន់ស្មានថា ទ្រព្យសម្បត្តិទាំងនេះមានតម្លៃសរុប ៣៩៧ពាន់លានដុល្លារ ខណៈធនាគារពិភពលោកប៉ាន់ស្មានថា ថ្លៃកសាងប្រទេសដែលហែកហួរដោយសង្រ្គាមឡើងវិញ នឹងត្រូវចំណាយអស់ជាង ៤៨៦ពាន់លានដុល្លារឯណោះ។

ដំបូងឡើយ សហរដ្ឋអាមេរិកបានខិតខំយ៉ាងខ្លាំង ដើម្បីជំរុញឲ្យមានការរឹបអូសទ្រព្យសម្បត្តិរុស្ស៊ីដោយផ្ទាល់ ប៉ុន្តែឥឡូវបែរជាសម្របតាមផែនការអឺរ៉ុបទៅវិញ។

ផ្នែកដ៏សំខាន់នៃទ្រព្យសម្បត្តិដែលបង្កក គឺត្រូវបានកាន់កាប់នៅក្នុង EU ខណៈគ្រាន់តែអង្គការដាក់ប្រាក់អន្តរជាតិដែលមានមូលដ្ឋាននៅប្រទេសបែលហ្សិកឈ្មោះថា Euroclear មានកាន់កាប់ទឹកប្រាក់ដល់ទៅប្រហែល២០០ពាន់លានដុល្លារទៅហើយ។ ដូចនេះមានន័យថា អឺរ៉ុបមានតួនាទីយ៉ាងសំខាន់ ក្នុងការចាត់ចែងទ្រព្យសម្បត្តិបង្កកទាំងនេះ។

សូមបញ្ជាក់ថា ក្រៅពីបញ្ហាទាំងប៉ុន្មានខាងលើ របៀបវារៈសំខាន់នៅឯកិច្ចប្រជុំកំពូល G7 ក្នុងទីក្រុង Apulia នៃប្រទេសអ៊ីតាលី ចាប់ពីថ្ងៃទី១៣ដល់១៥ខែមិថុនានេះ ក៏រួមបញ្ចូលទាំងសង្រ្គាមនៅតំបន់ហ្គាហ្សា ការធ្វើចំណាកស្រុក សន្តិសុខសេដ្ឋកិច្ច និងបញ្ញាសិប្បនិម្មិត (AI) ផងដែរ៕

ចុចអាន៖ សុខ សុវណ្ណ

ចុចអាន៖ អាមេរិក ថា កិច្ចព្រមព្រៀង​សន្តិសុខ​ថ្មី នឹង​ក្លាយ​ជា​ស្ពាន​ចម្លង​អ៊ុយក្រែន​ឲ្យ​ចូល NATO