លោក Netanyahu មិនព្រមឲ្យផ្អាកការវាយប្រហារ ដើម្បីផ្ដល់ជំនួយនៅហ្គាហ្សា

នាយករដ្ឋមន្ត្រីអ៊ីស្រាអែល លោក Benjamin Netanyahu ជំទាស់នឹងផែនការដែលបានប្រកាសដោយយោធា ឱ្យផ្អាកយុទ្ធសាស្ត្រប្រចាំថ្ងៃ ក្នុងការប្រយុទ្ធគ្នានៅតាមដងផ្លូវធំមួយ ចូលទៅក្នុងតំបន់ហ្គាហ្សា ដើម្បីជួយសម្រួលដល់ការផ្តល់ជំនួយ ចូលទៅក្នុងតំបន់ប៉ាឡេស្ទីន។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៧​ខែ​មិថុនា​នេះ។

យោធាអ៉ីស្រាអែល បានប្រកាសការផ្អាកនេះជារៀងរាល់ថ្ងៃចាប់ពីម៉ោង៥​ព្រឹក រហូតដល់ម៉ោង ៤រសៀល នៅក្នុងតំបន់ពី Karem Abu Salem (Kerem Shalom) ឆ្លងកាត់ទៅកាន់ផ្លូវ Salah al-Din ឆ្ពោះទៅភាគខាងជើង។ ប៉ុន្តែបន្ទាប់ពីនាយករដ្ឋមន្ត្រីលោក​ Benjamin Netanyahu បានដឹងពីការផ្អាកនេះ លោកបានបញ្ជាក់យ៉ាងច្បាស់ថា មិនអាចទទួលយកបានទេនិងបញ្ជាឲ្យមានប្រតិបត្តិការធម្មតានៅ Rafah ដែលជាការផ្តោតសំខាន់នៃការវាយលុកដែលកំពុងបន្តនៅតំបន់ហ្គាហ្សាភាគខាងត្បូង។

ក្នុងរយៈពេលថ្មីៗនេះ កងកម្លាំងអ៊ីស្រាអែល បានវាយឆ្មក់តាមផ្ទះក្នុងតំបន់ហ្គាហ្សា។ បើយោងតាមទីភ្នាក់ងារសារព័ត៌មានរដ្ឋប៉ាឡេស្ទីន Wafa បានឱ្យដឹងថា ការវាយប្រហាររបស់អ៊ីស្រាអែលទៅលើផ្ទះពីរ​ខ្នង​នៅក្នុងជំរុំជនភៀសខ្លួន Bureij នៅកណ្តាលហ្គាហ្សាបានសម្លាប់មនុស្ស ៩ នាក់ក្នុងនោះមានកុមារ ៦ នាក់។ ទន្ទឹមនឹងនេះដែរ យ៉ាងហោចណាស់ជនជាតិប៉ាឡេស្ទីនពីរនាក់នៅក្នុងសង្កាត់ Tal as-Sultan ភាគខាងលិច Rafah ក៏ត្រូវបានសម្លាប់នៅក្នុងការវាយប្រហារមួយផ្សេងទៀតរបស់អ៊ីស្រាអែល។

គួរបញ្ជាក់ថា ការប្រឆាំងរបស់លោក Netanyahu ចំពោះការផ្អាកយុទ្ធសាស្ត្របានគូសបញ្ជាក់ពីភាពតានតឹងផ្នែកនយោបាយជុំវិញបញ្ហាជំនួយដែលចូលមកក្នុងតំបន់ហ្គាហ្សា ជាកន្លែងដែលអង្គការអន្តរជាតិបានព្រមានអំពីវិបត្តិមនុស្សធម៌ដែលកំពុងកើនឡើង និងគ្រោះទុរ្ភិក្សដែលកំពុងកើតមាន។

ស្របពេលដែលការប្រយុទ្ធគ្នានៅតំបន់ហ្គាហ្សាបានបន្ត ជម្លោះនៅទូទាំងព្រំដែនអ៊ីស្រាអែល-លីបង់ ឥឡូវនេះក៏កំពុងគម្រាមកំហែងឈានទៅរកសង្រ្គាមកាន់តែធំ ខណៈដែលការបាញ់ប្រហារស្ទើរតែរាល់ថ្ងៃរវាងកងកម្លាំងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់បានកើនឡើងផងដែរ៕

អត្ថបទ៖ ប៊ុន សុភាព