ព័ត៌មានអន្ដរជាតិ

កាណាដា ជម្លៀសអ្នកទោសកម្រិតធ្ងន់ជាង២០០នាក់ពីគុក ព្រោះភ្លើងឆេះព្រៃខ្លាំង

បានផុស

២ years មុន

នៅ

ថ្ងៃចន្ទ ២៤ មិថុនា ២០២៤

ដោយ

Chheang

មន្ត្រីកាណាដា បានជម្លៀសអ្នកទោសចំនួន ២២៥នាក់ ចេញពីពន្ធនាគារកម្រិតធ្ងន់ Port-Cartier នៅទីក្រុង Quebec ដោយសារតែនៅតំបន់ក្បែរនោះកំពុងកើតមានភ្លើងឆេះព្រៃយ៉ាងសន្ធោរសន្ធៅ។ នេះបើយោងតាមសេចក្ដីថ្លែងការណ៍របស់មណ្ឌលកែប្រែកាណាដា CSC កាលពីថ្ងៃទី២៣ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Anne Kelly ប្រធានមណ្ឌល CSC បានប្រកាសថា ការជម្លៀសខ្លួននេះ មិនមានបញ្ហាចោទអ្វីនោះទេ ពោលគឺទទួលបានជោគជ័យល្អ ហើយពន្ធនាគារ Port-Cartier នៅទីក្រុង Quebec ត្រូវបានបិទជាបណ្ដោះអាសន្ន ខណៈដែលអ្នកទោសទាំងអស់កំពុងស្ថិតនៅក្នុងពន្ធនាគារមួយកន្លែងថ្មីផ្សេងទៀតដែលមានសុវត្ថិភាព។

ពន្ធនាគារ Port-Cartier គឺជាពន្ធនាគារសម្រាប់ទោសកម្រិតធ្ងន់បំផុត ដែលឃុំឃាំងអ្នកទោសឧក្រិដ្ឋកម្ម និងក្រុមឃាតកល្បីៗជាច្រើនប្រចាំប្រទេសកាណាដា។

ការជម្លៀសក្រុមអ្នកទោសលើកនេះ ធ្វើឡើងដំណាលគ្នាជាមួយការជម្លៀសខ្លួនប្រជាជនកាណាដាប្រមាណជាង ១០០០នាក់ផងដែរពីទីក្រុង Quebec បន្ទាប់ពីការប្រកាសអាសន្នករណីភ្លើងឆេះព្រៃ ដែលពិបាកក្នុងការទប់ស្កាត់ និងមានការគំរាមកំហែងខ្លាំងចំពោះសហគមន៍។

សូមបញ្ជាក់ថា ករណីភ្លើងឆេះព្រៃនៅក្នុងឆ្នាំ២០២៤ នេះ មិនទាន់ចាត់ទុកជាករណីធ្ងន់ធ្ងរបំផុតនោះឡើយ បើធៀបនឹងឆ្នាំ២០២៣កន្លងទៅ ដែលភ្លើងឆេះព្រៃបានកើតឡើងខ្លាំងក្លាបំផុតនៅក្នុងប្រវត្តិសាស្ត្រប្រទេសកាណាដា ហើយបានបំផ្លិចបំផ្លាញផ្ទៃដីអស់ជាង ១៦លានហិកតា ជម្លៀសប្រជាជនជាង១៥ម៉ឺននាក់ និងសម្លាប់មនុស្សយ៉ាងហោចណាស់អស់ជាង ៩០នាក់ ក្នុងនោះមានអ្នកពន្លត់អគ្គិភ័យចំនួន ៨៦នាក់៕

ដោយ៖ ឈាង

Related Topics:ប្រទេសកាណាដា