ព័ត៌មានអន្ដរជាតិ

រលកកម្ដៅនៅម៉ិកស៊ិក សម្លាប់សត្វស្វាអស់ជាង ២០០ក្បាល

បានផុស

៩ ខែ មុន

នៅ

ថ្ងៃអង្គារ ២៥ មិថុនា ២០២៤

ដោយ

Chheang

នៅក្នុងខែមិថុនា ឆ្នាំ២០២៤ នេះ រលកកម្ដៅនៅក្នុងតំបន់ព្រៃត្រូពិច រដ្ឋ Tabasco ប្រទេសម៉ិកស៊ិក បានប្រល័យជីវិតសត្វស្វាអស់យ៉ាងហោចណាស់ ២៣៤ក្បាល ដែលតួលេខនេះច្រើនជាង៣ដង បើធៀបនឹងចំនួនសត្វស្វាដែលបានងាប់កាលពីខែឧសភាកន្លងទៅ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៥ ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមការងារអង្គការ Cobius ដែលជាអង្គការសត្វព្រៃក្រៅរដ្ឋាភិបាលនៅម៉ិកស៊ិក បានឲ្យដឹងថា ស្វាដែលបានងាប់ គឺជាពូជស្វា Howler ដែលកំពុងស្ថិតនៅក្នុងអម្បូរពូជស្វារងការគំរាមកំហែងរបស់សហភាពអន្តរជាតិសម្រាប់ការអភិរក្សធម្មជាតិ IUCN។ អង្គការ Cobius បានបញ្ជាក់ទៀតថា របាយការណ៍នេះ ធ្វើឡើងនៅក្នុងតំបន់អភិរក្សសត្វព្រៃម៉ិកស៊ិកតែប៉ុណ្ណោះ ដោយតួលេខពិតប្រាកដនៃសត្វស្វាដែលងាប់អាចមានច្រើនជាងនេះទៅទៀត។ មូលហេតុចម្បងនៃការងាប់របស់ស្វា Howler បណ្ដាលមកពីការហើមសួត ដោយសារតែករណីភ្លើងឆេះព្រៃ ព្រោះរលកកម្ដៅ។

កាលពីខែឧសភាកន្លងទៅ សត្វស្វា Howler បានងាប់យ៉ាងហោចណាស់ ៨៥ក្បាល ខណៈដែលកាលណោះកម្ដៅបានកើនឡើងដល់ ៤៥អង្សាសេ ហើយបានបង្កជាគ្រោះរាំងស្ងួត ដែលពិបាកឲ្យសត្វស្វាស្វែងរកប្រភពទឹកផឹក។

អង្គការ Cobius បានសង្កត់ធ្ងន់ថា ក្រៅតែពីរលកកម្ដៅ សត្វស្វា Howler ក៏រងគ្រោះផងដែរពីការតាមប្រមាញ់របស់មនុស្ស ការកាប់បំផ្លាញព្រៃឈើ និងការឆ្លងជំងឺរាតត្បាត ជាដើម៕