ព័ត៌មានអន្ដរជាតិ

រុស្ស៊ី បិទប្រព័ន្ធផ្សព្វផ្សាយឯករាជ្យ រាប់សិបរបស់អឺរ៉ុប

បានផុស

២ years មុន

នៅ

ថ្ងៃពុធ ២៦ មិថុនា ២០២៤

ដោយ

យោងតាមការចេញផ្សាយរបស់សារពត៌មាន BBC នៅថ្ងៃទី ២៦ ខែ មិថុនា វិមានក្រឹមឡាំងបានបញ្ជាក់ថាខ្លួនសម្រេចហាមឃាត់ប្រព័ន្ធផ្សព្វផ្សាយអឺរ៉ុបចំនួន ៨១ ដើម្បីសងសឹកចំពោះបម្រាមរបស់សហភាពអឺរ៉ុប លើប្រព័ន្ធផ្សព្វផ្សាយមួយចំនួនរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាវិធានការឆ្លើយតប ចំពោះសេចក្តីសម្រេចររបស់ EU ដែលបិទប្រព័ន្ធផ្សព្វផ្សាយនានាដូចជា Voice of Europe, RIA Novosti, Izvestia និង Rossiyskaya Gazeta កាលពីថ្ងៃទី ១៧ ខែឧសភា ដោយចោទថា បានឃោសនាគាំទ្ររបស់រុស្ស៊ី រឿងសង្គ្រាមនៅអ៊ុយក្រែន ។

ប្រព័ន្ធផ្សព្វផ្សាយឯករាជ្យដែលរុស្ស៊ីហាមប្រាមគឺមកពីប្រទេសចំនួន២៥ក្នុងចំណោម សមាជិក EU ទាំង២៧ ដូចនេះពួកគេនឹងមិនអាចដំណើរការនៅក្នុងប្រទេសរុស្ស៊ីទៀតនោះទេ។ ត្បិតតែមិនរៀបរាប់ឈ្មោះទាំងអស់ តែប្រព័ន្ធផ្សព្វផ្សាយដែលច្បាស់ថាជាប់ក្នុងបញ្ជីខ្មៅ រួមមាន Politico និង EU Observer, ទូរទស្សន៍សាធារណៈរបស់អៀរឡង់ RTE កាសែត Le Monde របស់បារាំង និងទស្សនាវដ្តី Der Spiegel របស់អាល្លឺម៉ង់។

លើសពីនេះ ប្រព័ន្ធផ្សព្វផ្សាយអ៊ីតាលីជាច្រើនដូចជា ទូរទស្សន៍សាធារណៈ Rai និងកាសែត La Repubblica ក៏នឹងត្រូវបានរឹតបន្តឹងផងដែរ ទើបនាំឲ្យក្រសួងការបរទេសនៅទីក្រុងរ៉ូម ចេញមុខថ្កោលទោសថា រុស្ស៊ីធ្វើនេះ គឺគ្រាន់តែដើម្បីលុបបំបាត់ពីអំពើឃោឃៅរបស់ខ្លួនក្នុងសង្គ្រាមអ៊ុយក្រែនប៉ុណ្ណោះ ខណៈអាមេរិកថា រដ្ឋាភិបាលរុស្ស៊ី ខ្លាចប្រជាជនខ្លួនស្តាប់ការពិត។

គួរបញ្ជាក់ថា ប៉ុស្តិ៍ព័ត៌មានគាំទ្រដោយរដ្ឋរបស់រុស្ស៊ី RT ដែលមានអាជ្ញាប័ណ្ណក្នុងការផ្សាយនៅសហភាពអឺរ៉ុប ត្រូវបានដកហូតភ្លាមៗបន្ទាប់ពីប្រទេសរុស្ស៊ីចាប់ផ្តើមការវាយលុកលើអ៊ុយក្រែនក្នុងខែកុម្ភៈឆ្នាំ ២០២២។ ក្នុងពេលជាមួយគ្នានោះ រុស្ស៊ីក៏បានដាក់កម្រិតការចូលមើលគេហទំព័រលោកខាងលិចមួយចំនួន រួមទាំង BBC ផងដែរដោយចោទប្រកាន់ពីបទផ្សព្វផ្សាយព័ត៌មានមិនពិត៕