លោក បៃដិន ព្រមានថា ត្រាំ ជាមនុស្សគ្រោះថ្នាក់ មិនអាចឲ្យកាន់តំណែងអាណត្តិទី២បានឡើយ

តាមការចុះផ្សាយរបស់ CNN នៅថ្ងៃអង្គារទី២ខែកក្កដា, លោក ចូ បៃដិន បានរិះគន់សេចក្តីសម្រេចរបស់តុលាការកំពូលស្តីពីអភ័យឯកសិទ្ធិប្រធានាធិបតីចំពោះលោក ដូណាល់ ត្រាំ ថាជាគំរូដ៏អាក្រក់ដែលធ្វើឲ្យខូចដល់នីតិរដ្ឋ ហើយថែមទាំងចេញការព្រមានខ្លាំងៗថា លោក ត្រាំ គឺជាមនុស្សគ្រោះថ្នាក់ មិនអាចឲ្យឡើងកាន់តំណែងអាណត្តិទី២បានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរិះគន់របស់លោក បៃដិន កើតឡើងបន្ទាប់ពីតុលាការកំពូលអាមេរិក បោះឆ្នោតជាមួយសំឡេង ៦ទល់នឹង៣ សម្រេចថា លោក ត្រាំ មានអភ័យឯកសិទ្ធិទាំងស្រុង សម្រាប់សកម្មភា​ពផ្លូវការរបស់គាត់ពាក់ព័ន្ធសំណុំរឿងព្រហ្មទណ្ឌសហព័ន្ធឆ្នាំ២០២០ ដែលកាលនោះ គាត់ត្រូវរងការចោទប្រកាន់ពីបទធ្វើសកម្មភាពជាមួយការប៉ុនប៉ងលុបចោលលទ្ធផលបោះឆ្នោត និងការបះបោរថ្ងៃទី៦ខែមករា។

តុលាការនិយាយថា “នៅក្រោមរចនាសម្ព័ន្ធរដ្ឋធម្មនុញ្ញរបស់យើង, អំណាចប្រធានាធិបតី គឺផ្តល់សិទ្ធិឲ្យអតីតប្រធានាធិបតីមានអភ័យឯកសិទ្ធិទាំងស្រុងពីការកាត់ទោសព្រហ្មទណ្ឌសម្រាប់សកម្មភាពនៅក្នុងអំណាចផ្តាច់មុខនិងរដ្ឋធម្មនុញ្ញរបស់គាត់។ គាត់មានអភ័យឯកសិទ្ធិ ពីការកាត់ទោសចំពោះទង្វើផ្លូវការរបស់គាត់ទាំងអស់ ប៉ុន្តែគ្មាន​អភ័យឯកសិទ្ធិ​សម្រាប់​អំពើ​ក្រៅ​ផ្លូវ​ការ​ទេ”។

ទោះបីជាយ៉ាងណាក៏ដោយ លោក បៃដិន បានប្រតិកម្មភ្លាមៗចំពោះសេចក្តីសម្រេចនេះ ដោយប្រកាសចេញពីសេតវិមានថា “គ្មានស្តេចនៅអាមេរិកទេ! យើងម្នាក់ៗគឺស្មើភាពគ្នាចំពោះមុខច្បាប់។ ជាមួយសេចក្តីសម្រេចរបស់តុលាការកំពូលថ្ងៃនេះ ស្តីពីអភ័យឯកសិទ្ធិប្រធានាធិបតី វាគឺ​ជា​គោលការណ៍​ថ្មី​ជា​មូលដ្ឋាន ហើយ​វា​ជា​គំរូ​ដ៏​គ្រោះថ្នាក់ ព្រោះ​ថាបើអ្នកណាកាន់តំណែងហើយនោះ ច្បាប់នឹង​លែងធ្វើអ្វីពួកគេបានហើយ សូម្បី​តែ​តុលាការ​កំពូល​របស់​សហរដ្ឋ​អាមេរិក​ក៏មិនអាចធ្វើអ្វីបានដែរ”។

ស្របពេលជាមួយគ្នានោះដែរ លោក បៃដិន បានព្រមានម្តងហើយម្តងទៀតថា អ៊ីចឹងឥឡូវ បើប្រធានាធិបតីរូបណាកាន់តំណែង ប្រធានាធិបតីនោះពិតជាក្តោបក្តាប់អំណាចទាំងស្រុងហើយ។ ដូចនេះ លោក ត្រាំ នឹងក្លាយជាមនុស្សគ្រោះថ្នាក់ ប្រសិនបើបានអំណាចអាណត្តិទី២មែន។

រឿងរ៉ាវដ៏ក្តៅគគុកនេះ កើតឡើងមិនប៉ុន្មានថ្ងៃឡើយ ក្រោយពេលលោក ត្រាំ ធ្វើឲ្យលោក បៃដិន បាក់មុខក្នុងការជជែកដេញដោលគ្នាយ៉ាងបែកផ្សែង នៅទីក្រុង Atlanta នៃរដ្ឋ Georgia។

ក្រោយការជជែកដេញដោលរយៈពេល៩០នាទី ដែលមានការសម្របសម្រួលដោយ CNN, អ្នកគាំទ្រគណបក្សប្រជាធិបតេយ្យមួយចំនួន បានជំរុញឲ្យដកឈ្មោះលោកបៃដិនចេញ ប្តូរវិញជាមួយបេក្ខជនថ្មីដែលក្មេងជាងនេះ ដើម្បីទៅប្រជែងជាមួយ អ្នកខាងគណបក្សសាធារណរដ្ឋក្នុងការបោះឆ្នោតនៅខែវិច្ឆិកា ព្រោះមើលឃើញថា លោក បៃដិន មានឱកាសឈ្នះលោក ត្រាំ តិចតួចណាស់។

កុំថាឡើយអ្នកគាំទ្រ សូម្បីប្រព័ន្ធផ្សព្វផ្សាយធំៗមួយចំនួន ក៏បានចុះផ្សាយព័ត៌មាននិយាយអំពីអនាគតរបស់លោក បៃដិន ផងដែរ ដោយពួកគេជឿថា បើប្រធានាធិបតីរូបនេះ មិនមានអ្វីដែលទាក់ទាញនិងថ្មី ដើម្បីវាយបកទៅលោក ត្រាំ ឬអ្វីដែលពិសេសជាងនេះ ក្នុងការជជែកដេញដោលគ្នាលើកទីពីរទេនោះ គណបក្សប្រជាធិបតេយ្យ ប្រហែលបាត់តំណែងសេតវិមាន ទៅដៃគណបក្សសាធារណរដ្ឋហើយ។

សូមបញ្ជាក់ជាថ្មី ការបោះឆ្នោតជ្រើសរើសប្រធានាធិបតីអាមេរិក នឹងប្រព្រឹត្តទៅនៅថ្ងៃទី៥ ខែវិច្ឆិកា ឆ្នាំ២០២៤ ខណៈការជជែកដេញដោលលើកក្រោយ នឹងប្រព្រឹត្តទៅនៅថ្ងៃទី១០ខែកញ្ញា ដោយមានការសម្របសម្រួលពីសំណាក់ទូរទស្សន៍ ABC៕

អត្ថបទ៖ សុខ សុវណ្ណ

ចុចអាន៖ តើលោក បៃដិន ពិតជាត្រូវដកបេក្ខភាព មិនឲ្យទៅប្រកួតជាមួយលោក ត្រាំ មែនឬ?