ព័ត៌មានអន្ដរជាតិ

លោក ត្រាំ ចេញសេចក្តីថ្លែងការណ៍លើកដំបូង ក្រោយត្រូវបាញ់ប្រហារ

បានផុស

២ years មុន

នៅ

ថ្ងៃអាទិត្យ ១៤ កក្កដា ២០២៤

ដោយ

អតីតប្រធានាធិបតីអាមេរិក ដូណាល់ ត្រាំ បានចេញសេចក្តីថ្លែងការណ៍ ស្តីពីឧប្បត្តិហេតុបាញ់ប្រហារនៅឯការជួបជុំក្នុងរដ្ឋ Pennsylvania កាលពីថ្ងៃសៅរ៍ទី១៣ខែកក្កដា (ពេលវេលានៅអាមេរិក)។

ក្នុងសេចក្តីថ្លែងការណ៍នោះ លោក ត្រាំ និយាយថា “ខ្ញុំសូមថ្លែងអំណរគុណ ដល់សេវាសម្ងាត់សហរដ្ឋអាមេរិក និងកងកម្លាំងអនុវត្តច្បាប់ទាំងអស់ សម្រាប់ការឆ្លើយតបយ៉ាងឆាប់រហ័ស លើការបាញ់ប្រហារដែលទើបតែកើតឡើងនៅទីក្រុង Butler រដ្ឋ Pennsylvania។ សំខាន់! ខ្ញុំសូមចូលរួមរំលែកទុក្ខដល់គ្រួសារសពជនរងគ្រោះក្នុងពិធីជួបជុំ និងសូមចូលរួមរំលែកទុក្ខដល់គ្រួសារអ្នករងរបួសធ្ងន់ផងដែរ។ វាជារឿងមិនគួរឲ្យជឿ ដែលទង្វើបែបនេះអាចកើតឡើងក្នុងប្រទេសយើងបាន។ នៅពេលនេះ យើងមិនទាន់ដឹងអ្វីសោះអំពីឃាតករ ដែលបានស្លាប់ទៅហើយ។ ខ្ញុំត្រូវបានគេបាញ់ ដោយគ្រាប់កាំភ្លើងហោះទម្លុះត្រចៀកខាងស្តាំរបស់ខ្ញុំ។ ខ្ញុំដឹងភ្លាមថាមានអ្វីមិនប្រក្រតីកើតឡើងហើយ ខ្ញុំបានឮសំឡេងញ័រៗ ស្នូរគ្រាប់កាំភ្លើង ហើយភ្លាមៗខ្ញុំមានអារម្មណ៍ថា គ្រាប់កាំភ្លើងបានហោះកាត់ស្បែក។ មានឈាមហូរច្រើន ដូច្នេះខ្ញុំដឹងថាអ្វីកំពុងកើតឡើង។ សូមព្រះជាម្ចាស់ប្រទានពរដល់អាមេរិក!”។

ភ្លាមៗ បន្ទាប់ពីការប៉ុនប៉ងធ្វើឃាត ក្រុមគ្រូពេទ្យរបស់លោក ត្រាំ បញ្ជាក់ថា បេក្ខជនប្រធានាធិបតីខាងគណបក្សសាធារណរដ្ឋរូបនេះ មានសុវត្ថិភាព និងរងរបួសស្រាលប៉ុណ្ណោះ។

តាមសេចក្តីរាយការណ៍របស់ CNN, លោក ត្រាំ ទើបតែចាប់ផ្តើមថ្លែងប៉ុណ្ណោះ ស្រាប់តែស្នូរគ្រាប់កាំភ្លើងផ្ទុះឡើង ដោយបណ្តាលឲ្យអ្នកចូលរួមម្នាក់បាត់បង់ជីវិត ចំណែកខ្មាន់កាំភ្លើងក៏ត្រូវសម្លាប់ផងដែរ៕

អត្ថបទ៖ សុខ សុវណ្ណ

ចុចអាន៖ ស្ថានភាពលោក ត្រាំ យ៉ាងណាហើយ ក្រោយត្រូវគេប៉ងធ្វើឃាត?