ស្ថានភាពលោក ត្រាំ យ៉ាងណាហើយ ក្រោយត្រូវគេប៉ងធ្វើឃាត?

តាមការបញ្ជាក់ពីក្រុមគ្រូពេទ្យរបស់លោក ត្រាំ, ពេលនេះ បេក្ខជនប្រធានាធិបតីខាងគណបក្សសាធារណរដ្ឋមានសុវត្ថិភាព ហើយរងរបួសស្រាលប៉ុណ្ណោះ បន្ទាប់ពីត្រូវគេប៉ងធ្វើឃាត អំឡុងពេលលោកជួបជុំជាមួយអ្នកគាំទ្រ ក្នុងយុទ្ធនាការឃោសនាបោះឆ្នោត នៅទីក្រុង Butler នៃរដ្ឋ Pennsylvania។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

CNN រាយការណ៍នៅថ្ងៃអាទិត្យទី១៤ខែកក្កដាឆ្នាំ២០២៤ថា លោក ត្រាំ ទើបតែចាប់ផ្តើមថ្លែងប៉ុណ្ណោះ ស្រាប់តែស្នូរគ្រាប់កាំភ្លើងផ្ទុះឡើង ដោយបណ្តាលឲ្យអ្នកចូលរួមម្នាក់បាត់បង់ជីវិត ចំណែកខ្មាន់កាំភ្លើងក៏ត្រូវសម្លាប់ផងដែរ។

ភ្លាមៗ កងអង្គរក្សបានចូលទៅជុំវិញលោក ត្រាំ ហើយគេឃើញលោក ត្រាំ ក្តាប់ដៃស្តាំលើកឡើងលើ ហើយមានឈាមនៅផ្ទៃមុខនិងត្រចៀកខាងស្តាំទៀតផង។

អ្នកនាំពាក្យយុទ្ធនាការលោក ត្រាំ បានប្រាប់ទៅប្រព័ន្ធផ្សព្វផ្សាយថា ស្ថានភាពអតីតប្រធានា​ធិបតីរូបនេះ គឺមានសុវត្ថិភាព ហើយកំពុងព្យាបាលរបួសនៅមន្ទីរពេទ្យជិតកន្លែងជួបជុំ ខណៈក្រុមការងារទាំងអស់ នឹងតាមដានស្ថានការណ៍ជាបន្តទៀត។

ពាក់ព័ន្ធការប៉ុនប៉ងធ្វើឃាតនេះដែរ អតីតប្រធានាធិបតី បារ៉ាក់ អូបាម៉ា បានចេញមុខថ្កោលទោស ដោយប្រកាសថា “គ្មានកន្លែងសម្រាប់អំពើហិង្សានយោបាយនៅក្នុងលទ្ធិប្រជាធិបតេយ្យរបស់យើងទេ។ ទោះបីជា យើងមិនទាន់ដឹងច្បាស់ថាមានរឿងអ្វីកើតឡើងក៏ដោយ យើងទាំងអស់គ្នាគួរតែធូរចិត្តដែលអតីតប្រធានាធិបតី ត្រាំ មិនឈឺចាប់ខ្លាំង ហើយប្រើពេលវេលានេះដើម្បីប្តេជ្ញាចិត្តខ្លួនឯងឡើងវិញ ចំពោះភាពស៊ីវិល័យ និងការគោរពនៅក្នុងនយោបាយរបស់យើង។ Michelle និងខ្ញុំសូមជូនពរឲ្យគាត់ឆាប់ជាសះស្បើយ៕

សម្រាប់ព័ត៌មានបន្ថែម កម្ពុជាថ្មី នឹងផ្សាយជូនជាបន្តបន្ទាប់!

អត្ថបទ៖ សុខ សុវណ្ណ

ចុចអាន៖ លោក បៃ ដិន ប្តេជ្ញាបន្តឈរឈ្មោះតទល់ជាមួយលោក ត្រាំ ទោះមានការអំពាវនាវឲ្យដកខ្លួន