ចូ បៃដិន ប្រាប់ច្បាស់ពីមូលហេតុ ដកបេក្ខភាពមិនឈរឈ្មោះបោះឆ្នោតអាណត្តិថ្មី

ក្នុងសុន្ទរកថាទៅកាន់ជនរួមជាតិ ថ្លែងចេញពីការិយាល័យ Oval ដោយមានក្រុមគ្រួសារនៅក្បែរ, ប្រធានាធិបតីសហរដ្ឋអាមេរិក ចូ បៃដិន បានបញ្ជាក់ច្បាស់ៗថា មូលហេតុដែលលោកសម្រេចចិត្តដកបេក្ខភាព មិនបន្តឈរឈ្មោះបោះឆ្នោតអាណត្តិថ្មីប្រជែងជាមួយលោក ដូណាល់ ត្រាំ នាខែវិច្ឆិកាខាងមុខ គឺដើម្បីបង្រួបបង្រួមគណបក្សប្រជាធិបតេយ្យនិងប្រទេសជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ថា តាមពិតទៅគ្មានអ្នកមានអំណាចណា អាចធ្វើឲ្យលោកប្តូរចិត្តពីការឈរឈ្មោះអាណត្តិថ្មីទេ ប៉ុន្តែលោកខ្លួនឯង ជាអ្នកសម្រេចចិត្តបញ្ឈប់ ដោយសារតែលេចឮដំណឹងថា គណបក្សប្រជាធិបតេយ្យ ត្រូវប្រឈមហានិភ័យបាត់បង់អាសនៈសភា នៅក្នុងខែវិច្ឆិកា បើលោកមិនដកបេក្ខភាពទេនោះ។ 

លោក​​ថ្លែង​ថា “​​ប៉ុន្មាន​សប្តាហ៍​ថ្មីៗ​នេះ ខ្ញុំ​កាន់តែយល់ច្បាស់ថា ខ្ញុំ​ចាំបាច់ត្រូវតែ​បង្រួបបង្រួម​គណបក្ស​របស់​ខ្ញុំ​ ក្នុងពេលវេលា​ដ៏​សំខាន់​នេះ​។ ប្រហែលជាគ្មានវិធីអាចសង្គ្រោះលទ្ធិប្រជាធិបតេយ្យរបស់យើងបាននោះទេ ដូច្នេះ ខ្ញុំ​ក៏សម្រេច​ចិត្ត​ថា មធ្យោបាយ​ដ៏​ល្អ​បំផុត​ឆ្ពោះ​ទៅ​មុខ​គឺត្រូវប្រគល់ភ្លើងបំភ្លឺដល់​មនុស្ស​ជំនាន់​ថ្មី។ នេះជាមធ្យោបាយដ៏ល្អបំផុត ក្នុងការបង្រួបបង្រួមប្រទេសជាតិរបស់យើង”។

សូមបញ្ជាក់ថា នេះគឺជាសុន្ទរកថាបើកចំហលើកដំបូងរបស់ប្រធានាធិបតីអាមេរិក ចាប់តាំងពីលោកប្រកាសដកបេក្ខភាពឈរឈ្មោះបោះឆ្នោតកាលពីសប្តាហ៍មុន ហើយបង្ហាញការគាំទ្រពេញទំហឹងទៅលើលោកស្រីអនុប្រធានាធិបតី កាម៉ាឡា ហារីស។

តាមការស្ទង់មតិចុងក្រោយបំផុតរបស់ Reuters និង Ipsos បានបង្ហាញថា ពេលនេះ លោកស្រី ហារីស កំពុងមានសំឡេងនាំមុខលោក ត្រាំ បន្តិចវិញហើយ ក្នុងឱកាសក្លាយជាប្រធានាធិបតីអាមេរិក អាណត្តិថ្មី។

តាមលទ្ធផលនៃការស្ទង់មតិថ្មីនេះ លោកស្រី ហារីស កំពុងនាំមុខលោក ត្រាំ យ៉ាងប្រកៀកប្រកិតបំផុត ពោលគឺអ្នកខាងគណបក្សប្រជាធិបតេយ្យ មានសំឡេង៤៤% ទល់នឹងអ្នកខាងគណបក្សសាធារណរដ្ឋ មានសំឡេង ៤២%៕

អត្ថបទ៖ សុខ សុវណ្ណ

ចុចអាន៖ មុនលោក បៃដិន ប្រធានាធិបតី​អាមេរិក២​រូប​ក៏ធ្លាប់​មិន​ឈរ​ឈ្មោះ​​សម្រាប់អាណត្តិបន្តដែរ