បង់ក្លាដែស ​ស្ដារសេវាអ៊ីនធឺណិតឡើងវិញ បន្ទាប់ពីផ្ដាច់១១ថ្ងៃ ដើម្បីទប់ស្កាត់ការតវ៉ា

ប្រទេសបង់ក្លាដែសបាន​ដាក់​ឱ្យ​ដំណើរការ​ឡើញវិញ​នូវ​សេវាអ៊ីនធឺណិតតាមទូរស័ព្ទក្រោយ​កាត់​ផ្តាច់​នៅ​ទូទាំំង​ប្រទេស​រយៈ​ពេល​​១១ថ្ងៃ ដើម្បីទប់ស្កាត់ការតវ៉ាដ៏សាហាវលើប្រព័ន្ធកូតាការងារក្នុងរដ្ឋាភិបាលដែលបន្តអូសបន្លាយបង្កឲ្យមានភាពច្របូកច្របល់ពេញប្រទេស។ យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៩ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេវាអ៊ីនធឺណិតតាមទូរស័ព្ទចល័ត4G របស់ប្រទេសបង់ក្លាដែស បានដំណើរការឡើងវិញកាលពីថ្ងៃអាទិត្យប៉ុន្មានម៉ោងបន្ទាប់ពីលោក Zunaid Ahmed Palak រដ្ឋមន្ត្រីក្រសួងទូរគមនាគមន៍ និងបច្ចេកវិទ្យាទំនាក់ទំនងព័ត៌មានបានចេញ​សេចក្តីប្រកាសមួយ​ថា រដ្ឋាភិបាលបានសម្រេចចិត្តស្តារសេវាអ៊ីនធឺណិតចាប់ពីម៉ោង៣​រសៀលឡើងវិញ បន្ទាប់បានផ្ដាច់រយៈពេល១១ថ្ងៃ ជាផ្នែកមួយដើម្បីទប់ស្គាត់ការតវ៉ា ប៉ុន្តែប្រព័ន្ធផ្សព្វផ្សាយបណ្តាញ​សង្គម ដូចជា WhatsApp Facebook TikTok និង YouTube នៅតែដាក់កម្រិតនៅឡើយ។

កាលពីថ្ងៃទី១៧ ខែកក្កដា រដ្ឋាភិបាលរបស់ នាយករដ្ឋមន្ត្រី Sheikh Hasina បានផ្អាកសេវាអ៊ីនធឺណិតតាមទូរសព្ទចល័ត ពង្រាយកងទ័ព និងដាក់បម្រាមគោចរបន្ទាប់ពីសិស្សនិសិត្សរាប់ម៉ឺននាក់ តវ៉ាទាមទារឱ្យមានកំណែទម្រង់ប្រព័ន្ធកូតាការងារដែលបម្រុងទុក៣០ភាគរយនៃការងាររដ្ឋាភិបាលសម្រាប់សាច់ញាតិអតីតយុទ្ធជនបានប្រយុទ្ធនៅក្នុងសង្គ្រាមឯករាជ្យឆ្នាំ១៩៧១ ប្រឆាំងនឹងប៉ាគីស្ថាន។

ក្នុងការតវ៉ាដ៏ធំនេះបណ្ដាលឲ្យមនុស្សយ៉ាងហោចណាស់១៤៧ នាក់ត្រូវបានសម្លាប់ ខណៈការប៉ាន់ស្មានថា អ្នក​ស្លាប់​អាចនឹងកើន​ដល់​ជាង២០០​នាក់។ អ្នកស្លាប់រួមមានសិស្ស ប៉ូលិស សកម្មជន និងមនុស្សមកពីស្ថាប័នវិជ្ជាជីវៈផ្សេងៗ ខណៈការស៊ើបអង្កេតបន្ថែមទៀតកំពុងដំណើរការដើម្បីកំណត់ចំនួនអ្នកស្លាប់សរុប។

សិស្សដែលប្រឆាំងនឹងប្រព័ន្ធកូតានេះបានហៅ ការដាក់ប្រព័ន្ធនេះ របស់រដ្ឋាភិបាលថាជាការរើសអើង និងលំអៀងទៅលើអ្នកស្មោះត្រង់ចំពោះគណបក្ស Awami League ដែលកំពុងកាន់អំណាច។ យ៉ាងណា ចំពេលមានការតវ៉ា តុលាការកំពូលរបស់ប្រទេសនេះបានកាត់បន្ថយប្រព័ន្ធកូតាការងារ៣០ភាគរយសម្រាប់កូនចៅអតីតយុទ្ធជនមកត្រឹម៥ភាគរយ​វិញ ហើយកូតាសម្រាប់ជនជាតិភាគតិច អ្នកកែភេទ និងជនពិការមកត្រឹម២ភាគរយ ប៉ុន្តែ​ទោះបីជាយ៉ាងណា តុលាការ​កំពូល​នៅតែ​បដិសេធចំពោះ​ការ​ទាមទារ​ឲ្យដក​ប្រព័ន្ធកូតា​ទាំង​ស្រុងបស់​ក្រុម​បាតុករ​៕

អត្ថបទ៖ ប៊ុន សុភាព