ព័ត៌មានអន្ដរជាតិ

មនុស្សស្លាប់ជិត២០នាក់ហើយនៅវៀតណាម ដោយសារគ្រោះទឹកជំនន់

បានផុស

២ years មុន

នៅ

ថ្ងៃអង្គារ ៣០ កក្កដា ២០២៤

ដោយ

Chheang

នៅក្នុងខែកក្កដាឆ្នាំ២០២៤ គ្រោះទឹកជំនន់និងការបាក់ដី បានបណ្ដាលឲ្យមានមនុស្សស្លាប់យ៉ាងហោចណាស់ចំនួន១៨នាក់នៅតាមតំបន់ភាគខាងជើងប្រទេសវៀតណាម ខណៈមានការព្យាករថានឹងមានភ្លៀងធ្លាក់ខ្លាំងបន្ថែមទៀតនៅចន្លោះពីថ្ងៃចន្ទរហូតដល់ថ្ងៃពុធដើមសប្ដាហ៍នេះ។

ទឹកជំនន់ពីតំបន់ភ្នំភាគខាងជើងប្រទេសវៀតណាម បានហូរចាក់មកដល់ច្រាំងទន្លេតំបន់ជាយក្រុងរដ្ឋធានីហាណូយ បណ្ដាលឲ្យការជន់លិចផ្ទះសម្បែងប្រជាជនជាច្រើនខ្នង។ អស់រយៈពេល១សប្ដាហ៍កន្លងមក អ្នកភូមិ Ben Voi ប្រហែល៥០០នាក់ ត្រូវធ្វើដំណើរតាមទូក ក្រោយពីផ្លូវថ្នល់របស់ពួកគេត្រូវបានជន់លិចនៅក្រោមទឹក។

លោកស្រី Tran Thi Ly ដែលជាអាជីវករមួយរូបនៅភូមិ Ben Voi បានប្រាប់សារព័ត៌មាន AFP កាលពីថ្ងៃអាទិត្យថា៖ «ខ្ញុំមិនអាចទៅណាបានទេ ហើយអ្នកជិតខាងពិបាកចូលមកដល់តូបរបស់ខ្ញុំដើម្បីទិញអីវ៉ាន់»។ ផ្ទះរបស់លោកស្រី Ly បានលិចជិតត្រឹមក្បាលជង្គង់ ហើយគ្រឿងសង្ហារិមរបស់លោកស្រីត្រូវរងការខូចខាតដោយសារទឹកជំនន់។ ចំណែកលោក Hoang Van Su អាយុ៥១ឆ្នាំ ដែលជាអ្នកភូមិម្នាក់ទៀត បាននិយាយថា៖ «យើងកំពុងធ្វើដំណើរតាមទូក។ យើងពិបាករកកន្លែងដែលស្ងួត ដើម្បីកិនស្រូវធ្វើអាហារប្រចាំថ្ងៃ»។ បន្ថែមពីនេះ លោក Su បានឲ្យដឹងថា ទឹកជំនន់នៅកន្លែងខ្លះក្នុងភូមិមានកម្ពស់ដល់ទៅ១,៥ម៉ែត្រឯណោះ។

អាជ្ញាធរក្នុងតំបន់ បានប្រាប់ថា ភូមិ Ben Voi ដែលមានចម្ងាយប្រមាណ៤០គីឡូម៉ែត្រពីហាណូយ គឺជាតំបន់ទំនាប ងាយរងគ្រោះដោយសារទឹកជំនន់ ក្រោយពីមានភ្លៀងធ្លាក់ខ្លាំង ដោយក្នុង១ឆ្នាំនៅទីនោះជាធម្មតាលិចរយៈពេល២ទៅ៣ថ្ងៃ។ កាលពីឆ្នាំ២០២៣ ភូមិ Ben Voi ក៏ធ្លាប់លិចម្ដងដែរ ក្រោយពេលមានការបើកបង្ហូរទឹកចេញពីទំនប់វារីអគ្គិសនី Hoa Binh ក្នុងខេត្តដែលនៅក្បែរនោះ។

សូមបញ្ជាក់ថា គ្រោះធម្មជាតិបានធ្វើឲ្យមនុស្សចំនួន ១៦៩នាក់បាត់បង់ជីវិត ឬបាត់ខ្លួននៅវៀតណាមកាលពីឆ្នាំ២០២៣៕

ដោយ៖ ឈាង