វៀតណាម ចាប់ខ្លួនជនជាតិចិនមួយក្រុម បម្រុងចូលកម្ពុជា ធ្វើការជាមួយបណ្តាញឆបោកតាមអនឡាញ

តាមការចុះផ្សាយរបស់ VN Express កាលពីថ្ងៃអង្គារទី៦ខែសីហាឆ្នាំ២០២៤ ឆ្មាំព្រំដែនវៀតណាម បានឃាត់ខ្លួនបុរសជនជាតិចិនមួយក្រុមមានគ្នា៦នាក់ ដែលចូលប្រទេសនេះដោយខុសច្បាប់ ហើយបម្រុងនឹងបន្តដំណើរចូលប្រទេសកម្ពុជា ដើម្បីចូលធ្វើការឲ្យបណ្តាញឆបោកតាមអនឡាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាការឆ្មាំព្រំដែនខេត្ត Quang Tri បាននិយាយថា ជនជាតិចិនទាំង៦នាក់នេះ បានចូលវៀតណាមតាមច្រកតូចមួយ ក្បែរច្រកព្រំដែនអន្តរជាតិ Lao Bao ក្នុងស្រុក Huong Hoa ជាប់ព្រំដែនឡាវ ហើយបច្ចុប្បន្ន ជនជាតិចិនទាំង៦នាក់នេះ ត្រូវបានភាគីវៀតណាម ឃុំខ្លួនជាបណ្តោះអាសន្នសិន។

នេះមិនមែនជាលើកដំបូងឡើយដែលវៀតណាម ចាប់បានជនជាតិចិន ដែលចូលមកដោយខុសច្បាប់ ពោលគឺថា​ កាលពីមុនវៀតណាម ក៏ចាប់បានដូចករណីនេះដែរ។ មានព័ត៌មានថា ជនជាតិចិន បានចូលប្រទេសវៀតណាម ដោយមានជំនួយពីសំណាក់ម្ចាស់សណ្ឋាគារមួយដែលគេមិនទាន់បញ្ចេញឈ្មោះ នៅតំបន់ត្រីកោណមាស។

ជនជាតិចិនទាំងនេះ បានរៀនចំណេះជំនាញនិងបច្ចេកទេសឆបោកតាមអនឡាញនៅក្នុងតំបន់ត្រីកោណមាស ហើយបម្រុងចេញពីវៀតណាម ចូលកម្ពុជា​ ដើម្បីធ្វើការជាមួយក្រុមឧក្រិដ្ឋជន។

តំបន់ត្រីកោណមាស ជាទីតាំងល្បីល្បាញចំពោះការផលិត ព្រមទាំងជួញដូរអាភៀន និងហេរ៉ូអ៊ីន។ ទីតាំងភូមិសាស្រ្តរបស់វា គឺគ្របដណ្តប់ពីភាគខាងជើងប្រទេសថៃ ភាគខាងលិចឡាវ និងភាគខាងកើតប្រទេសមីយ៉ាន់ម៉ា ហើយទីនោះជាតំបន់ភ្នំនិងដាច់ស្រយាល ធ្វើឲ្យរដ្ឋាភិបាលនានាពិបាកគ្រប់គ្រង៕

អត្ថបទ៖ សុខ សុវណ្ណ

ចុចអាន៖ កម្ពុជាបណ្ដេញជនជាតិចិនម្នាក់ចេញពីប្រទេស ក្រោយសិង្ហបុរីផ្តន្ទាទោសដាក់ពន្ធនាគារពីបទសម្អាតប្រាក់