ព័ត៌មានអន្ដរជាតិ

អត្តពលិកចិនឈ្នះមេដាយមាសអូឡាំពិក មានការរើសអើងខ្លាំងលើបណ្តាញសង្គមចិន «Weibo»

បានផុស

២ years មុន

នៅ

ថ្ងៃពុធ ៧ សីហា ២០២៤

ដោយ

ប្រព័ន្ធផ្សព្វផ្សាយបណ្តាញសង្គមចិន Weibo បានផ្អាកគណនីជាង៣០០ដែលរកឃើញមានសារ«ញុះញង់ឱ្យមានជម្លោះ» បន្ទាប់ពីអ្នកប្រើប្រាស់បណ្តាញសង្គមក្នុងប្រទេស បានសម្តែងការខកចិត្តលើជ័យជម្នះរបស់ Chen Meng លើមិត្តរួមជាតិ Sun Yingsha ក្នុងការប្រកួតវិញ្ញាសាវាយកូនបាល់លើតុ(Tennis)ផ្នែកនារីក្នុងទីក្រុងប៉ារីសកាលពីថ្ងៃសៅរ៍។ នេះបើយោងតាមការចេញផ្សាយរបស់សារព័ត៌មាន South China Morning Postនៅថ្ងៃទី៧ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការប្រកួតនោះ កីឡាការិនី Chen Meng បានយកឈ្នះ Sun Yingsha ក្នុងលទ្ធផល ៤-២នៅឯ Paris Expo Porte de Versailles ដើម្បីរក្សាតំណែងជើងឯកអូឡាំពិករបស់នាង នៅក្នុងវគ្គផ្តាច់ព្រ័ត្រ ដែលនេះជាការប្រកួតម្តងទៀតរវាងអ្នកទាំងពីរ បន្ទាប់ពីការប្រកួតគ្នាម្តងក្នុងទីក្រុងតូក្យូកាលពីបីឆ្នាំមុន។

Sun គឺជាវីរនារីរបស់ជាតិនៅក្នុងប្រទេសចិន បើទោះបីជា Chen បានឈ្នះមេដាយមាសអូឡាំពិកចំនួនបីក៏ដោយក៏ Chen ហាក់មិនទទួលបានការគាំទ្រនៅក្នុងការប្រកួតនោះទេ ហើយនោះគឺជាភស្តុតាងជាក់ស្តែងនៅលើបណ្តាញអ៊ីនធឺណិត និងនៅក្នុងគាំទ្រអំឡុងពេលការប្រកួតកាលពីថ្ងៃសៅរ៍។ ពេលដែល Sun ត្រូវបានលើកទឹកចិត្តអំឡុងពេលប្រកួត ប៉ុន្តែពេលខ្លះ Chen ត្រូវបានជេរប្រមាថ និងទទួលរងវាយប្រហារលើអ៊ីនធឺណិតទៅវិញ។

ជាមួយគ្នានេះ Weibo បានប្រកាសជាផ្លូវការថា «ក្នុងអំឡុងពេលប្រកួត អាកប្បកិរិយាអ្នកគាំទ្រមិនសមរម្យមួយចំនួនបានបង្កឱ្យមានភាពចម្រូងចម្រាសលើអ៊ីនធឺណិត» ។ ជាមួយគ្នានេះ«អ្នកប្រើប្រាស់មួយចំនួនបានទាញយកប្រយោជន៍ពីវាដើម្បីផ្សព្វផ្សាយការប្រមាថ ញុះញង់ឱ្យមានជម្លោះ និងថែមទាំងបានបង្ហោះការលើកឡើងមិនសមហេតុផលដែលវាយប្រហារអត្តពលិក និងបុគ្គលិកដែលជាគ្រូបង្វឹក»។

យ៉ាងណាមានជាង ១២,០០០នៃការបញ្ចេញមតិមានខ្លឹមសារ«ខុសច្បាប់» រួមទាំងការវាយប្រហារ ការបង្កហេតុ និងការប្រមាថដែលទាក់ទងនឹងការពិភាក្សាជុំវិញការប្រកួតរវាង Sun និង Chen ត្រូវបានដោះស្រាយ ហើយ Weibo ថែមទាំងដាក់ឈ្មោះ និងគណនីមួយចំនួនដែលត្រូវបានហាមឃាត់ឲ្យអាម៉ាស់ផងដែរ។

ទោះជាយ៉ាងណាក៏ដោយ អ្នកប្រើប្រាស់ជាច្រើនបានសម្តែងការខកចិត្តចំពោះអាកប្បកិរិយារបស់អ្នកគាំទ្រទាំងនោះនៅក្នុងការប្រកួតដែលមិនព្រមលើកទឹកចិត្ត Chen។ អ្នកគាំទ្រម្នាក់បានបញ្ចេញមតិនៅលើ Weibo ថា «ខ្ញុំមិនយល់ទេ រាល់ពេលដែល Sun បានវាយបញ្ចូលទី មានការទះដៃផ្គរលាន់ពេញកន្លែងប្រកួត ខណៈដែលពិន្ទុរបស់ Chen មិនទទួលបានការអបអរសាទរនោះទេ សូម្បីតែពេលដែល Chen ឈ្នះក៏ដោយ ស្ទើរតែគ្មានការលើកទឹកចិត្ត ហើយប្រតិកម្មរបស់អ្នកគាំទ្រមានតិចតួច។ ហេតុអ្វីបានជាមានភាពខុសគ្នាខ្លាំងបែបនេះ ឬដោយសារពួកគេទាំងពីរជាកីឡាករចិន?»។

មហាជនមួយចំនួនបានសម្ដែងការអាណិតអាសូរចំពោះ Chen ដោយថាម្ចាស់មេដាយមាសទទួលបានការអបអរតិចពេកហើយ។

ពាក់ព័ន្ធនឹងករណីនេះយោងតាមការចេញផ្សាយរបស់សារព័ត៌មាន CNA ទីក្រុងប៉េកាំងបានចាប់ខ្លួនស្ត្រីម្នាក់ដែលជាប់សង្ស័យពីបទបរិហារកេរ្តិ៍កីឡាករវាយកូនបាល់លើតុនៅអូឡាំពិកនេះផងដែ។ ប៉ូលិសនៅស្រុក Daxing បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា ជនសង្ស័យមានឈ្មោះថា He អាយុ២៩ឆ្នាំ «បានប្រឌិតព័ត៌មានប្រមាថ និងបង្ខូចកេរ្តិ៍ឈ្មោះអ្នកដទៃ បណ្តាលឱ្យមានផលប៉ះពាល់អវិជ្ជមានដល់សង្គម»។ ករណីនេះកំពុងត្រូវបានប៉ូលីសស៊ើបអង្កេត បើទោះបីជាព័ត៌មានលម្អិតជាក់លាក់អំពីការបញ្ចេញមតិប្រមាថមិនត្រូវបានបង្ហាញក៏ដោយ៕