យន្តហោះដឹកមនុស្ស ២៧៦នាក់ ខូចហ្វ្រាំងនិងឆេះម៉ាស៊ីន ពេលចុះចតនៅ ជប៉ុន

តាមសេចក្តីរាយការណ៍របស់ CNA នៅថ្ងៃចន្ទទី១២ខែសីហាឆ្នាំ២០២៤, យន្តហោះមួយគ្រឿងប្រភេទ Boeing 787-10 របស់ក្រុមហ៊ុន Singapore Airlines (SIA) ដែលដឹកអ្នកដំណើរនិងអាកាសយានិកសរុប ២៧៦នាក់ មានបញ្ហាខូចហ្វ្រាំង និងឆេះម៉ាស៊ីន ពេលចុះចតនៅអាកាសយានដ្ឋានអន្តរជាតិ​ Narita នៃប្រទេសជប៉ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ គេក៏បានឃើញផ្សែងហុយចេញពីម៉ាស៊ីនខាងឆ្វេងរបស់យន្តហោះផងដែរ ហើយនាយកដ្ឋានពន្លត់អគ្គិភ័យទីក្រុង បានបញ្ជូនក្រុមពន្លត់ភ្លើងទៅកាន់ផ្លូវរត់ B (Runway B) នៃព្រលានយន្តហោះ ដើម្បីគ្រប់គ្រងស្ថានការណ៍។

លើសពីនេះ យោងតាមការិយាល័យអាកាសយានដ្ឋានក្រោមក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន បានឲ្យដឹងថា បំណែកសម្បកកង់យន្តហោះ ក៏ត្រូវបានគេឃើញនៅលើផ្លូវរត់ផងដែរ។

ទោះបីជាយ៉ាងណាក៏ដោយ មិនមានសេចក្តីរាយការណ៍អំពីមនុស្សរងរបួសនោះទេ។

បញ្ហានេះបណ្តាលឲ្យមានការពន្យារពេលជើងហោះហើរ SQ638 មួយនេះជាងពីរម៉ោង ហើយក្រុមហ៊ុន ក៏សូមអភ័យទោសដល់អតិថិជនទាំងអស់ ចំពោះភាពរអាក់រអួលនេះផងដែរ៕

អត្ថបទ៖ សុខ សុវណ្ណ

ចុចអាន៖ យន្តហោះបើកធ្លាក់ផ្លូវរត់នៅនេប៉ាល់ ផ្ទុះឆេះស្លាប់មនុស្ស ១៨នាក់