ព័ត៌មានអន្ដរជាតិ

អ៊ុយក្រែន កម្ទេចស្ពានយុទ្ធសាស្រ្តទី២ ក្នុងដីរុស្ស៊ី

បានផុស

២ years មុន

នៅ

ថ្ងៃចន្ទ ១៩ សីហា ២០២៤

ដោយ

តាមការចុះផ្សាយរបស់ BBC កាលពីថ្ងៃអាទិត្យទី១៨ខែសីហាឆ្នាំ២០២៤ កងទ័ពអ៊ុយក្រែន ប្រកាសថា ក្នុងប្រតិបត្តិការវាយលុកចូលទៅតំបន់ Kursk ខ្លួនបានកម្ទេចស្ពានយុទ្ធសាស្រ្តទី២របស់រុស្ស៊ី ហើយថែមទាំងបង្ហាញវីដេអូនៃការវាយប្រហារនោះទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវីដេអូនោះ គេបានឃើញផ្សែងហុយចេញពីការកម្ទេចស្ពាន ប៉ុន្តែអ៊ុយក្រែន មិនបញ្ជាក់ច្បាស់ឡើយថាតើការវាយប្រហារនោះ ធ្វើឡើងនៅពេលណាឲ្យប្រាកដ។

នេះគឺជាស្ពានឆ្លងទន្លេ Seym ដែលទីក្រុងមូស្គូ ប្រើដើម្បីបញ្ជូនគ្រឿងសឹកនិងស្បៀងទៅឲ្យកងទ័ពរបស់ខ្លួន ហើយកាលពីដើមឡើយ អ្នកវិភាគយោធា អះអាងថា មានស្ពានចំនួន៣នៅក្នុងតំបន់នេះដែលរុស្ស៊ីប្រើដើម្បីដឹកគ្រឿងផ្គត់ផ្គង់ទៅកងទ័ពរបស់ខ្លួន ខណៈស្ពាន២ទៀត មួយត្រូវបានកម្ទេចទាំងស្រុង និងមួយទៀតត្រូវខូចខាតយ៉ាងដំណំ។

ប៉ុន្មានម៉ោងប៉ុណ្ណោះ ក្រោយការប្រកាសដំណឹងនេះ ប្រធានាធិបតីអ៊ុយក្រែន លោក Volodymyr Zelensky បានចេញមុខនិយាយថា ការបង្កើតតំបន់ទ្រនាប់ដើម្បីបញ្ឈប់ការវាយប្រហាររបស់រុស្ស៊ី គឺជាគោលដៅមួយក្នុងចំណោមគោលដៅផ្សេងទៀតនៃការវាយលុកចូលតំបន់ Kursk។

ប្រធានាធិបតីអ៊ុយក្រែន លោក Volodymyr Zelensky (រូបថត៖ AP)

សូមបញ្ជាក់ថា គិតត្រឹមពេលនេះ គឺមានរយៈពេលជិតពីរសប្តាហ៍ហើយ ដែលកងកម្លាំងរបស់លោក Zelensky បើកការវាយប្រហារទ្រង់ទ្រាយធំបំផុតឆ្លងដែនចូលលើទឹកដីរុស្ស៊ី ចាប់តាំងពីទីក្រុងមូស្គូ បើកប្រតិបត្តិការសឹកពេញទំហឹងលើប្រទេសអ៊ុយក្រែនក្នុងឆ្នាំ២០២២។

ទោះបីជាយ៉ាងណាក៏ដោយ ទីក្រុងមូស្គូ ចាត់ទុកការវាយលុកឆ្លងដែននោះថា ជាការបង្ករឿងដ៏ធំ ហើយប្តេជ្ញាសងសឹកដោយឥតប្រណីដៃ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែនព្យាយាមបង្កើតតំបន់ការពារនៅក្នុងទឹកដីរុស្ស៊ី