ចិន​​​ល្បាត​យោធា​​ជិត​ព្រំដែន​មី​យ៉ាន់​ម៉ា ខណៈ​បារម្ភ​​ដួល​រលំ​រដ្ឋបាល​យោធា​តំបន់​

យោធារបស់ប្រទេសចិនកំពុងធ្វើការល្បាតប្រដាប់អាវុធនៅជិតព្រំដែនមីយ៉ាន់ម៉ាក្នុងសប្តាហ៍នេះ ចំពេលរដ្ឋាភិបាលចិនមានការព្រួយបារម្ភអំពីការដួលរលំ​រដ្ឋាបាល​​របស់​តំបន់​​​គ្រប់​គ្រងដោយ​យោធា​​និងភាពចលាចលដែលអាចកើតមានពីការប្រយុទ្ធគ្នាយ៉ាងខ្លាំងក្លាក្នុងសង្គ្រាមស៊ីវិលនៅប្រទេសមីយ៉ាន់ម៉ា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៧ខែសីហានេះ។

ការល្បាត​របស់​យោធា​ចិន​រួមមានការពង្រាយកងទ័ពនៅក្នុងខេត្តយូណាន ភាគនិរតីនៃប្រទេសចិនដើម្បីសាកល្បងសមត្ថភាពរបស់ពួកគេក្នុងការថែរក្សាសន្តិសុខនៅក្នុងតំបន់ព្រំដែន។ ជាមួយគ្នានេះ យោធាចិន​បាន​​​ធ្វើ​លំហាត់​សមយុទ្ធ​យោធា​បាញ់គ្រាប់ពិតពីថ្ងៃអង្គារដល់ថ្ងៃព្រហស្បតិ៍នៅក្នុងទីតាំងចំនួនបួននៅក្នុងខេត្ត យូណាន រួមទាំង​ទីក្រុង Ruili​ផងដែរ​។

លើសពីនេះទីបញ្ជាការភាគខាងត្បូងបានឲ្យដឹងថា អង្គភាពនឹងអនុវត្តការល្បាតប្រដាប់អាវុធ និងការល្បាតជើងអាកាសរួមគ្នា ដើម្បីសាកល្បងសមត្ថភាពរបស់ពួកគេក្នុងការប្រមូលផ្តុំយ៉ាងឆាប់រហ័ស ទប់ស្កាត់ និងគ្រប់គ្រងវាយប្រហាររួមគ្នា ខណៈដែលយោធាចិនពីមុនធ្លាប់បានធ្វើសមយុទ្ធបាញ់គ្រាប់ពិតនៅជិតព្រំដែនមីយ៉ាន់ម៉ាក្នុងខែវិច្ឆិការួចមកហើយ។

​នាពេល​ថ្មីៗ​នេះ លោក Min Aung Hlaing មេដឹកនាំរដ្ឋាភិបាលយោធាមីយ៉ាន់ម៉ា បានចោទប្រកាន់ថា​​ បរទេស​មួយ​ចំនួន​កំពុងគាំទ្រក្រុមជីវពលជនជាតិភាគតិច ដែលទំនងជាសំដៅទៅលើប្រទេសចិន ខណៈចិនមានទំនាក់ទំនងជាយូរណាស់មកហើយជាមួយក្រុមទាំងនោះ។

ជាការឆ្លើយតបរដ្ឋមន្ត្រីការបរទេសចិន លោក Wang Yi បាននិយាយកាលពីដើមខែនេះថា ប្រទេសរបស់លោក «ប្រឆាំងនឹងភាពចលាចល និងសង្គ្រាមនៅក្នុងប្រទេសមីយ៉ាន់ម៉ា»។​ អំឡុងពេលលោក Wang បំពេញទស្សនកិច្ចនៅមីយ៉ាន់ម៉ា លោកក៏បានប្រាប់លោក Min Aung Hlaing ថាប្រទេសចិនប្រឆាំងនឹងការវាយប្រហារនៅក្នុងរដ្ឋ Shan។

យ៉ាងណាមិញ អ្នកការទូតកំពូលរបស់ចិនរូបនេះក៏បានសម្តែងក្តីសង្ឃឹមថា មីយ៉ានម៉ា «នឹងការពារសុវត្ថិភាពបុគ្គលិក និងគម្រោងរបស់ចិនប្រកបដោយប្រសិទ្ធភាព» នៅក្នុងប្រទេសមីយ៉ាន់ម៉ា។ ស្ថានទូតចិនប្រចាំប្រទេសមីយ៉ាន់ម៉ាក៏បានចេញការក្រើនរំលឹកក្នុងខែនេះដល់ប្រជាពលរដ្ឋចិនក្នុងរដ្ឋ Shan ឱ្យពង្រឹងការប្រុងប្រយ័ត្នផ្នែកសន្តិសុខរបស់ពួកគេ និងនៅឱ្យឆ្ងាយពីតំបន់ជម្លោះ ឬត្រឡប់ទៅប្រទេសចិនវិញ៕

អត្ថបទ៖ ប៊ុន សុភាព