បេក្ខភាពប្រលងបវរកញ្ញា Miss Grand ពីររូបតេស្តវិជ្ជមានកូវីដ

បេក្ខភាព ២ រូបមកពីប្រទេសនីហ្សេរីយ៉ា និងកេនយ៉ាដែលស្ថិតនៅក្នុងប្រទេសថៃសម្រាប់ការប្រកួតបវរកញ្ញា Miss Grand International (MGI) បានធ្វើតេស្តវិជ្ជមានជំងឺកូវីដ ១៩ ហើយឥឡូវនេះកំពុងត្រូវបានសម្រាកព្យាបាលនៅមន្ទីរពេទ្យ Piyavate ក្នុងទីក្រុងបាងកក ។

ទំព័រហ្វេសប៊ុករបស់គណៈកម្មាធិការរៀបចំកម្មវិធីប្រកួតបានរាយការណ៍កាលពីថ្ងៃសុក្រថា បេក្ខភាពទាំងអស់ត្រូវឆ្លងកាត់ការធ្វើតម្បារច្រមុះ និងបំពង់ក និងធ្វើចត្តាឡីស័កក្នុងសណ្ឋាគាររយៈពេល ១៤ ថ្ងៃ ហើយជាលទ្ធផលអ្នកចូលរួមប្រកួតមកពីប្រទេសនីហ្សេរីយ៉ា និងកេនយ៉ា ឆ្លងវីរុសនេះ ។

គណៈកម្មាធិការក៏បាននិយាយផងដែរថា សណ្ឋាគារដែលត្រូវបានគេប្រើជាកន្លែងធ្វើចត្តាឡីស័កសម្រាប់បវរកញ្ញាត្រូវបានគេបាញ់ថ្នាំកម្ចាត់មេរោគផងដែរ ។

គួរបញ្ជាក់ថា បេក្ខភាពមកពីជាង ៦០ ប្រទេសបានចូលរួមប្រលងបវរកញ្ញា MGI ក្នុងនោះក៏មានប្រទេសកម្ពុជាផងដែរដែលគ្រោងនឹងចាប់ផ្តើមនៅថ្ងៃទី ២៧ ខែមីនា បន្ទាប់ពីបញ្ចប់រយៈពេលធ្វើចត្តាឡីស័ក ៕

ប្រែសម្រួលដោយ ៖ ជីវ័ន្ត

ប្រភព ៖ Pattaya Mail

ចុចអាន ៖ ដំណឹងល្អ! វ៉ាក់សាំងកូវីដរបស់អង់គ្លេសចាក់តែមួយដូសមានប្រសិទ្ធភាពមិនធម្មតាការពារមនុស្សចាស់

ចុចអាន ៖ WHO បង្ហាញចំនួនដូស និងប្រទេសទទួលបានវ៉ាក់សាំងតាមរយៈកម្មវិធី COVAX