យុវជន​​ប៉ាឡេស្ទីន​ល្បី​ក្នុង​TikTok បាត់បង់​ជីវិត​​ក្នុង​​ការ​​វាយប្រហារ​

តារា TikTok ជនជាតិប៉ាឡេស្ទីនវ័យ១៩ឆ្នាំ ដែលបានចែករំលែកព័ត៌មានលម្អិតអំពីជីវិតនៅហ្គាហ្សា ក្រោមការឡោមព័ទ្ធ ត្រូវបានសម្លាប់ដោយការវាយប្រហារតាមអាកាសរបស់អ៊ីស្រាអែល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន APនៅថ្ងៃទី៣១ខែសីហានេះ។

តារា TikTok ជនជាតិប៉ាឡេស្ទីនរូបនេះមានអាយុ១៩ឆ្នាំ ឈ្មោះ Medo Halimy ហៅថា «Tent Life»ដែលជា​គណនី TikTok របស់គាត់ដែលជាវីដេអូចែករំលែកអំពីជីវិតដែលរស់នៅក្រោមការឡោមព័ន្ធរបស់អ៊ីស្រាអែលនៅក្នុងតំបន់ហ្គាហ្សា។

នៅថ្ងៃកើតហេតុ គាត់បានជិះរថយន្ត​មួយ​គ្រឿង​នៅ​តាម​ផ្លូវ​ឆ្នេរ​ខាង​មុខ​ដែលត្រូវបានរងការវាយប្រហារឆាបឆេះ​យ៉ាង​សន្ធោសន្ធៅ ដែល​ជា​គោលដៅ​ជាក់ស្តែង​នៃ​ការ​វាយប្រហារ​តាម​អាកាស​របស់​អ៊ីស្រាអែលកាលពីថ្ងៃចន្ទសប្ដាហ៍មុន។

ខណៈវាចំណាយពេល១០នាទីដើម្បីឱ្យរថយន្តសង្គ្រោះមកដល់ ហើយប៉ុន្មានម៉ោងក្រោយមក គ្រូពេទ្យបានប្រកាសថា Halimy បានបាត់​បង់​ជីវិត​។ ទោះយ៉ាងណាយោធាអ៊ីស្រាអែល បាននិយាយថា ខ្លួនមិនបានដឹងពីការវាយប្រហារដែលបានសម្លាប់ Halimy នោះទេ។

ការស្លាប់របស់Halimyបានធ្វើឲ្យមានការភ្ញាក់ផ្អើលរួមទាំង​លោក Heba al-Saidi អ្នកសម្របសម្រួលអតីតនិស្សិតនៃកម្មវិធីផ្លាស់ប្តូរ និងសិក្សា Kennedy-Lugar Youth Exchange and Study បាននិយាយថា «Halimy គឺជាមនុស្សដែលចូលចិត្តការលេងសើច មានចិត្ត​សប្បុរស និងប្រាជ្ញា ដែលមិនអាចបំភ្លេចបាន គាត់បានបន្សល់នូវការចងចាំដ៏ល្អ ប៉ុន្តែគាត់បែរចាកចេញលឿនពេកហើយ»។

Halimy បានចាប់ផ្តើមគណនី TikTok ផ្ទាល់ខ្លួនរបស់គាត់ បន្ទាប់ពីបានជ្រកកោនជាមួយឪពុកម្តាយ បងប្អូនប្រុសស្រីបួននាក់របស់គាត់នៅ Muwasi ដែលជាតំបន់ឆ្នេរភាគខាងត្បូងដែលអ៊ីស្រាអែលបានកំណត់ជាតំបន់សុវត្ថិភាពមនុស្សធម៌។ គ្រួសារគាត់បានភៀសខ្លួនពីការលុកលុយរបស់អ៊ីស្រាអែលពីទីក្រុងហ្គាហ្សា ទៅកាន់ទីក្រុង Khan Younis ភាគខាងត្បូង មុនពេលរត់គេចពីការទម្លាក់គ្រាប់បែកម្តងទៀត។

គាត់បានថតរាល់សកម្មភាពព័ត៌មានលម្អិតនៃជីវិតរបស់គាត់នៅហ្គាហ្សា ទៅដល់អ្នកទស្សនាឆ្ងាយៗ ខណៈមនុស្សរាប់រយពាន់នាក់នៅជុំវិញពិភពលោកបានជាប់ចិត្តនិងវីដេអូរបស់គាត់ និង​បាន​ផ្ទុះ​ការ​​គាំទ្រ​ខ្លាំង​ ដោយ​ខ្លះ​មាន​អ្នក​ចូល​មើល​ជាង ២ លាន​ដង​នៅ​លើ TikTok។ នៅក្នុងវីដេអូចុងក្រោយរបស់គាត់ដែលបានបង្ហោះប៉ុន្មានម៉ោងមុនពេលគាត់ត្រូវបានគេសម្លាប់ ក្នុងវីដេអូនោះបានបង្ហាញថា​ Halimy ខ្លួនឯងកំពុងសរសេរអក្សរនៅក្នុងសៀវភៅកត់ត្រា ហើយទំព័ររបស់វាគ្របដណ្តប់ដោយរបារពណ៌ក្រហមដ៏អាថ៌កំបាំង។

គួរបញ្ជាក់ថា ការស្លាប់របស់គាត់ក៏បានជំរុញឱ្យមានការកើនឡើងនៃទុក្ខសោកនៅលើប្រព័ន្ធផ្សព្វផ្សាយសង្គមដែលអ្នកតាមដានវីដេអូរបស់គាត់បានសម្តែងការតក់ស្លុតនិងភាពសោកសៅដូចជាពួកគេបានបាត់បង់មិត្តជិតស្និទ្ធម្នាក់ផងដែរ។

ស្របពេលយុទ្ធនាការរបស់អ៊ីស្រាអែលនៅហ្គាហ្សាបានសម្លាប់ជនជាតិប៉ាឡេស្ទីនជាង ៤ម៉ឺន​នាក់ បើយោងតាមក្រសួងសុខាភិបាលរបស់ហ្គាហ្សា ដែលមិនបែងចែករវាងជនស៊ីវិល និងពួកសកម្មប្រយុទ្ធ បានបង្ករឱ្យមានមហន្តរាយមនុស្សធម៌ ហើយវាក៏បានប្រែក្លាយក្រុមក្មេងជំទង់ធម្មតា ដែលគ្មានអ្វីត្រូវធ្វើជារៀងរាល់ថ្ងៃ ទៅជាអ្នកឆ្លើយឆ្លងព័ត៌មានសង្រ្គាមដែលជាយុគសម័យប្រព័ន្ធផ្សព្វផ្សាយសង្គម៕

អត្ថបទ៖ ប៊ុន សុភាព