រុស្ស៊ី ទម្លាក់គ្រាប់បែកចំកន្លែងក្មេងលេងនៅ អ៊ុយក្រែន 

តាមសេចក្តីរាយការណ៍របស់ CNA នៅថ្ងៃសៅរ៍ទី៣១ខែសីហាឆ្នាំ២០២៤, កងទ័ពរបស់លោក ពូទីន បានទម្លាក់គ្រាប់បែកលើទីក្រុង Kharkiv ភាគឦសានប្រទេសអ៊ុយក្រែន ដោយត្រូវចំអគារលំនៅដ្ឋានកម្ពស់១២ជាន់និងកន្លែងក្មេងលេង ដោយសម្លាប់មនុស្សចំនួន៧នាក់ ក្នុងនោះរួមមានទាំងកុមារអាយុ១៤ឆ្នាំម្នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Kharkiv គឺជាទីក្រុងធំទីពីររបស់អ៊ុយក្រែន ស្ថិតនៅចម្ងាយប្រហែល៣៥គីឡូម៉ែត្រ ពីព្រំដែនរុស្ស៊ី និងក្លាយជាគោលដៅនៃការវាយប្រហារយ៉ាងញឹកញាប់ ចាប់តាំងពីលោក ពូទីន បើកប្រតិបត្តិការសឹកនៅអ៊ុយក្រែន ក្នុងខែកុម្ភៈឆ្នាំ២០២២មក។

អភិបាលក្រុងលោក Oleh Sinehubov បានបង្ហោះ Telegram ថា ក្រៅពីអ្នកស្លាប់ មនុស្សចំនួន៥៩នាក់ទៀតក្នុងនោះរួមទាំងកុមារ៩នាក់ផងដែរ​ បានរងរបួស ប៉ុន្តែ២០នាក់ស្ថិតក្នុងស្ថានភាពធ្ងន់ធ្ងរ ខណៈមនុស្សមួយចំនួនត្រូវពិការ។

តាមការបញ្ជាក់ពីលោក Sinehubov, «រុស្ស៊ីបានបើកការវាយប្រហារនេះ ចេញពីតំបន់ព្រំដែន Belgorod។ ពួកគេបាញ់ចំកន្លែងក្មេងលេង ដែលសម្បូរទៅដោយមនុស្ស ហើយទីនោះក៏ជាអគារលំនៅដ្ឋានដែរ។ នេះជាអំពើភេរវកម្មទ្រង់ទ្រាយធំ ប្រឆាំងប្រជាជនស៊ីវិលរបស់យើង»។

ការវាយប្រហារនេះកើតឡើងស្របពេលប្រធានាធិបតីអ៊ុយក្រែន Vladimir Zelensky បានបណ្តេញមេទ័ពអាកាស Nikolay Oleshchuk ចេញពីតំណែង ហើយរដ្ឋាភិបាលទីក្រុងកៀវក៏កើតជម្លោះផ្ទៃក្នុងផងដែរ បន្ទាប់ពីហេតុការណ៍ធ្លាក់យន្តហោះចម្បាំង F-16។

មេដឹកនាំអ៊ុយក្រែន មិនប្រាប់ហេតុផលជុំវិញការបណ្តេញនេះទេ ប៉ុន្តែបច្ចុប្បន្ន មានការជជែកគ្នាបែកផ្សែងក្នុងជួររដ្ឋាភិបាលលោក Zelensky ដោយអ្នកនយោបាយម្នាក់ឈ្មោះ Mariana Bezuhla នៅក្នុងគណៈកម្មការការពារសភា បានចេញមុខអះអាងថា យន្តហោះ F-16 នោះ គឺត្រូវបានបាញ់ទម្លាក់ដោយប្រព័ន្ធការពារអាកាស Patriot របស់អ៊ុយក្រែនខ្លួនឯង។

តាមសេចក្តីរាយការណ៍ យន្តហោះដែលផ្តល់ដោយអាមេរិកមួយគ្រឿង បានធ្លាក់កាលពីថ្ងៃចន្ទ ដោយសម្លាប់ទាំងពីឡុតឈ្មោះ Aleksey ‘Moonfish’ Mes ផងដែរ ប៉ុន្តែទីក្រុងកៀវ បានលាក់ព័ត៌មាននេះរហូតដល់ថ្ងៃព្រហស្បតិ៍ទើបទម្លាយ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន ផ្ទុះជម្លោះផ្ទៃក្នុង ឈានដល់បណ្តេញមេទ័ពអាកាស ក្រោយ F-16 ធ្លាក់