ព័ត៌មានអន្ដរជាតិ

NATO ប្រាប់ថា ការលុកលុយរបស់អ៊ុយក្រែនចូលតំបន់ Kursk របស់រុស្ស៊ីជារឿងស្របច្បាប់

បានផុស

២ years មុន

នៅ

ថ្ងៃអាទិត្យ ១ កញ្ញា ២០២៤

ដោយ

Chheang

អគ្គលេខាធិការអង្គការណាតូ (NATO) លោក Jens Stoltenberg បានប្រកាសកាលពីថ្ងៃទី៣១ខែសីហាថា ការលុកលុយរបស់អ៊ុយក្រែនចូលទៅក្នុងតំបន់ Kursk របស់រុស្ស៊ីគឺស្របច្បាប់ ហើយនេះគឺជាសិទ្ធិការពារខ្លួនរបស់ទីក្រុងកៀវ។

អគ្គលេខាធិការអង្គការណាតូ លោក Jens Stoltenberg (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយថា៖ «អ៊ុយក្រែនមានសិទ្ធិការពារខ្លួន។ ហើយបើយោងតាមច្បាប់អន្តរជាតិ សិទ្ធិនេះមិនកំណត់តែនៅត្រឹមព្រំដែននោះទេ» ដោយបន្ថែមថា NATO មិនត្រូវបានជូនដំណឹងមុនអំពីផែនការរបស់អ៊ុយក្រែន ហើយក៏មិនជាប់ពាក់ព័ន្ធនឹងការវាយលុកនេះដែរ។

ប្រមុខ NATO បានរៀបរាប់ទៀតថា៖ «ប្រធានាធិបតី Zelenskiy បានបញ្ជាក់យ៉ាងច្បាស់ថា ប្រតិបត្តិការនេះមានគោលបំណងបង្កើតតំបន់ការពារ ដើម្បីការពារការវាយប្រហាររបស់រុស្ស៊ីបន្ថែមទៀតពីការឆ្លងកាត់ព្រំដែន។ ដូចប្រតិបត្តិការយោធាទាំងអស់ វាមានហានិភ័យ។ ប៉ុន្តែវាគឺជាការសម្រេចចិត្តរបស់អ៊ុយក្រែនពីរបៀបការពារខ្លួន»។

ទីក្រុងកៀវ បានបើកការលុកលុយឆ្លងព្រំដែនដ៏ធំមួយចូលទៅក្នុងតំបន់ Kursk កាលពីថ្ងៃទី៦ខែសីហា ខណៈពេលដែលកងទ័ពរបស់ទីក្រុងមូស្គូបន្តវាយទៅកាន់តំបន់យុទ្ធសាស្ត្រ Pokrovsk នៅភាគខាងកើតរបស់អ៊ុយក្រែន។

រដ្ឋាភិបាលក្រុងកៀវ បាននិយាយថា ខ្លួនមិនមានចេតនាក្នុងការកាត់យកដីដែលខ្លួនបានកាន់កាប់នោះទេ តែទាហានអ៊ុយក្រែនកំពុងរៀបចំខ្សែបន្ទាត់ការពារខ្លួន ដោយមានគោលបំណងកាន់កាប់ទីនោះក្នុងរយៈពេលជាក់លាក់មួយប៉ុណ្ណោះ។

សូមបញ្ជាក់ថា កាលពីថ្ងៃទី២៧ខែសីហា ប្រធានាធិបតីអ៊ុយក្រែន លោក Volodymyr Zelenskiy បាននិយាយថា សង្គ្រាមជាមួយរុស្ស៊ី នៅទីបំផុតនឹងបញ្ចប់ដោយការសន្ទនា ប៉ុន្តែទីក្រុងកៀវត្រូវតែស្ថិតក្នុងជំហររឹងមាំ ហើយថាលោកនឹងបង្ហាញផែនការដល់ប្រធានាធិបតីអាមេរិក លោក ចូ បៃដិន (Joe Biden) និងបេក្ខភាពប្រធានាធិបតីអាមេរិក២រូបគឺលោកស្រី កាម៉ាឡា ហារីស (Kamala Harris) និងលោក ដូណាល់ ត្រាំ (Donald Trump)។

យ៉ាងណា លោក ពូទីន ធ្លាប់បានលើកឡើងថា កិច្ចព្រមព្រៀងអាចត្រូវចាប់ផ្តើម លុះត្រាណាតែអ៊ុយក្រែនយល់ព្រមឲ្យរុស្ស៊ីគ្រប់គ្រងផ្នែកសំខាន់ៗនៃខេត្តចំនួន៤ ដែលមានដូចជា Donetsk, Kherson, Luhansk និង Zaporizhzhia ព្រមទាំងតំបន់គ្រីមៀ៕

ដោយ៖ ឈាង