រុស្ស៊ី វាយប្រហារអ៊ុយក្រែន ឥតដកដៃ សម្លាប់មនុស្សបន្ថែមទៀត

អ៊ុយក្រែនមិនទាន់បាត់សោកសៅចំពោះការបាញ់មីស៊ីលដ៏សាហាវនៅទីក្រុង Poltava ដែលបណ្តាលឲ្យមនុស្សស្លាប់និងរបួសជាង៣០០នាក់ផង ស្រាប់តែរុស្ស៊ី បើកការវាយប្រហារថ្មីទៀតលើទីក្រុង Lviv ភាគខាងលិច សម្លាប់មនុស្សចំនួន៧នាក់ ក្នុងនោះមានទាំងកុមារ៣នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីអភិបាលក្រុង Lviv លោក Andriy Sadovy នៅថ្ងៃពុធទី៤ខែកញ្ញាឆ្នាំ២០២៤, ការវាយប្រហារនេះ គឺរុស្ស៊ីបានប្រើដ្រូននិងមីស៊ីលល្បឿនលឿនជាងសំឡេង ខណៈសំឡេងផ្ទុះលាន់ឮដល់រដ្ឋធានីកៀវឯណោះ។

ដោយឡែកនៅទីក្រុង Kryvyy Rih វិញ, សណ្ឋាគារនិងសំណង់អគារនៅក្បែរនោះ​ក៏ត្រូវវាយប្រហារផងដែរ ដោយជាលទ្ធផលបណ្តាលឲ្យមនុស្សចំនួន៥នាក់រងរបួស។

ការវាយប្រហារនេះកើតឡើងមិនប៉ុន្មានម៉ោងផង បន្ទាប់ពីកងកម្លាំងលោកពូទីន បាញ់មីស៊ីលលើទីក្រុង Poltava ភាគកណ្តាលប្រទេសអ៊ុយក្រែន សម្លាប់មនុស្សចំនួន៥១នាក់ និងរបួស២៧១នាក់ទៀត ហើយក្នុងចំណោមអ្នកស្លាប់ក៏មានទាំងទ័ពរបស់លោក ហ្សេលេនស្គី ដែរ។

ហេតុការណ៍នេះកើតឡើងនៅម៉ោងប្រហែល៩ព្រឹក (ម៉ោងនៅអ៊ុយក្រែន) ថ្ងៃអង្គារទី៣ខែកញ្ញា ដោយរុស្ស៊ីបាញ់មីស៊ីលបាលីស្ទិកចំនួន២គ្រាប់ ចំបណ្ឌិត្យសភាយោធា និងមន្ទីរពេទ្យនៅក្បែរនោះ។

ការវាយប្រហារនេះទៀតសោត គឺជាការវាយប្រហារដែលសម្លាប់មនុស្សច្រើនបំផុតមួយដោយស្នាដៃកងកម្លាំងរុស្ស៊ី ចាប់តាំងពីសង្គ្រាមផ្ទុះឡើងកាលពីជាង៩០០ថ្ងៃមុន។

មកទល់ពេលឥឡូវ អ៊ុយក្រែន បានប្រកាសអាសន្ននៅទូទាំងប្រទេសតែម្តង ខណៈក្រុមជួយសង្គ្រោះកំពុងបន្តប្រតិបត្តិការស្វែងរកជនរងគ្រោះនៅក្រោមគំនរថ្មបាក់បែក៕

អត្ថបទ៖ សុខ សុវណ្ណ

ចុចអាន៖ រុស្ស៊ី វាយប្រហារយ៉ាងសាហាវលើអ៊ុយក្រែន, ស្លាប់និងរបួសមនុស្សជាង ៣០០នាក់