មេបក្សប្រឆាំងវ៉េណេស៊ុយអេឡា ចាកចេញពីប្រទេស ទៅជ្រកកោននៅ អេស្ប៉ាញ

តាមការបញ្ជាក់ពីរដ្ឋាភិបាល​វ៉េណេស៊ុយអេឡានៅថ្ងៃអាទិត្យទី៨ខែកញ្ញាឆ្នាំ២០២៤, ​បេក្ខជន​ប្រធានាធិបតីគណ​បក្ស​ប្រឆាំង​លោក Edmundo González បាន​ចាក​ចេញ​ពីមាតុភូមិ​ហើយ រួច​ទៅ​ស្វែង​រក​សិទ្ធិ​ជ្រកកោន​ក្នុង​ប្រទេស​អេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនរត់ចេញពីប្រទេស លោក González បានពួនសំងំគេចពីដីកាចាប់ខ្លួនដែលចេញដោយតុលាការ បន្ទាប់ពីគណបក្សប្រឆាំងមិនទទួលស្គាល់លទ្ធផលឆ្នោតប្រធានាធិបតីខែកក្កដា ដែលក្រុមប្រឹក្សាបោះឆ្នោតជាតិ (CNE) ប្រកាសថា លោក Nicolás Maduro ជាអ្នកឈ្នះ។

ជុំវិញរឿងនេះ អ្នកស្រី Delcy Rodríguez អនុប្រធានាធិបតីវ៉េណេស៊ុយអេឡា បានបង្ហោះសារលើប្រព័ន្ធផ្សព្វផ្សាយសង្គមថា «ក្រោយជ្រកកោនដោយស្ម័គ្រចិត្តក្នុងស្ថានទូតអេស្ប៉ាញនៅទីក្រុងការ៉ាកាសកាលពីប៉ុន្មានថ្ងៃមុន លោក Edmundo Gonzalez Urrutia បានស្នើសុំសិទ្ធិជ្រកកោននយោបាយ ហើយរដ្ឋាភិបាលទីក្រុងការ៉ាកាស បាន​យល់​ព្រមឲ្យគាត់ធ្វើដំណើរ​ដោយ​សុវត្ថិភាព។ ពេលនេះ ​គាត់​បាន​ចាកចេញ​ទៅ​ហើយ»។

ស្របពេលជាមួយគ្នានោះ រដ្ឋមន្ត្រីការបរទេសអេស្ប៉ាញលោក José Manuel Albares បញ្ជាក់ថា លោក González បានចាកចេញពីប្រទេសតាមសំណើផ្ទាល់ខ្លួន និងជិះតាមយន្តហោះរបស់កងទ័ពអាកាសអេស្ប៉ាញ។ រដ្ឋាភិបាលទីក្រុងម៉ាឌ្រីដ ​ប្តេជ្ញា​ចំពោះ​សិទ្ធិ​នយោបាយ​របស់​ប្រជាជន​វ៉េណេស៊ុយអេឡា​ទាំងអស់។

ប្រទេសវ៉េណេស៊ុយអេឡា បានធ្លាក់ចូលក្នុងវិបត្តិនយោបាយ ចាប់តាំងពីលោក Maduro ត្រូវប្រកាសជាអ្នកឈ្នះឆ្នោតថ្ងៃទី២៨ខែកក្កដា ប៉ុន្តែមានប្រទេសមួយចំនួន រួមទាំងសហរដ្ឋអាមេរិក សហភាពអឺរ៉ុប និងរដ្ឋខ្លះនៅអាមេរិកឡាទីនផងដែរ បានបដិសេធទទួលជ័យជម្នះរបស់លោក Maduro ដោយចោទថា ទីក្រុងការ៉ាកាស មិនបញ្ចេញទិន្នន័យបោះឆ្នោតលម្អិត។

ក្រោយមក រដ្ឋាភិបាលរបស់លោកប្រធានាធិបតី Maduro បានបើកប្រតិបត្តិការបង្ក្រាបក្រុមប្រឆាំង ដោយឃុំខ្លួនមនុស្សជាង ២ ៤០០នាក់៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ ថ្កោលទោស​អាមេរិក​ ក្រោយ​រឹបអូស​យន្តហោះរបស់​ប្រធានាធិបតី​វ៉េណេស៊ុយអេឡា