ត្រីសមុទ្ររាប់រយក្បាល ផ្អើលឡើងគោកនៅឆ្នេរសមុទ្រវៀតណាម ដោយសារព្យុះ យ៉ាកជី

ត្រីសមុទ្ររាប់រយក្បាល បានផ្អើលឡើងគោក នៅឆ្នេរសមុទ្រខេត្ត Quang Ninh ដោយសារឥទ្ធិពលព្យុះ យ៉ាកជី ខណៈអ្នកស្រុកនាំគ្នារើសយកទៅលក់ ខ្លះទៀតយកទៅចម្អិនធ្វើម្ហូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តភាគខាងជើងប្រទេសវៀតណាមមួយនេះ ស្ថិតក្នុងចំណោមតំបន់មួយចំនួនដែលត្រូវព្យុះ យ៉ាកជី វាយប្រហារខ្លាំង ធ្វើឲ្យប្រជាពលរដ្ឋមិនហ៊ានចេញក្រៅឡើយពេលព្យុះមកដល់។

យ៉ាងណាក្រោយពេលឥទ្ធិពលព្យុះថមថយ ពួកគេក៏បានចេញក្រៅ ហើយស្រាប់តែប្រទះឃើញទិដ្ឋភាពនឹកស្មានមិនដល់ ដោយមានត្រីសមុទ្ររាប់រយក្បាល មកទើរលើឆ្នេរ Tra Co ហើយនោះគឺជាត្រីចាបសមុទ្រ ដែលមានរសជាតិឆ្ងាញ់និងមានតម្លៃថ្លៃគួសម។

និយាយពីព្យុះយ៉ាកជី ព្យុះទីហ្វុងនេះ បានវាយប្រហារខ្លាំងចំខេត្ត Hai Phong និង Quang Ninh ដោយឆក់យកជីវិតមនុស្សចំនួន៤នាក់និងរបួស៧៨នាក់ ជាមួយនឹងល្បឿនខ្យល់២០៣គីឡូម៉ែត្រក្នុងមួយម៉ោង។

យោងតាមការចុះផ្សាយរបស់ VN Express កាលពីថ្ងៃសៅរ៍ទី៧ខែកញ្ញាឆ្នាំ២០២៤, មនុស្ស៣នាក់បានស្លាប់នៅខេត្ត Quang Ninh និងម្នាក់ទៀតបាត់បង់ជីវិតក្នុងទីក្រុងកំពង់ផែ Hai Phong។

ក្រោពីបណ្តាលឲ្យមនុស្សស្លាប់ ព្យុះទីហ្វុង យ៉ាកជី ក៏បង្កការបំផ្លិចបំផ្លាញនៅទូទាំងតំបន់ឆ្នេរសមុទ្រភាគខាងជើងផងដែរ ជាពិសេសវាយប្រហារកប៉ាល់ចំនួន៦គ្រឿងនៅខេត្ត Quang Ninh និង១គ្រឿងនៅខេត្ត Hai Phong ខណៈមានការដាច់ចរន្តអគ្គិសនីទ្រង់ទ្រាយធំ ក្នុងខេត្ត Quang Ninh, Hai Phong, Thai Binh និង Hai Duong។

សូមបញ្ជាក់ថា Yagi គឺជាព្យុះទីហ្វុងកាចសាហាវលំដាប់ទីពីរក្នុងឆ្នាំ២០២៤ ហើយបានវិវឌ្ឍខ្លួនឲ្យខ្លាំងទ្វេដង ចាប់តាំងវាយប្រហារភាគខាងជើងប្រទេសហ្វីលីពីនកាលពីដើមសប្តាហ៍នេះ៕

អត្ថបទ៖ សុខ សុវណ្ណ

ចុចអាន៖ វៀតណាម មានមនុស្សស្លាប់និងរបួសសរុប ៨២នាក់ ដោយឥទ្ធិពលព្យុះ យ៉ាកជី