វៀតណាម រកឃើញមនុស្សស្លាប់ឡើងដល់ ៨២នាក់ដោយសារព្យុះកំណាច យ៉ាកជី 

តាមការចុះផ្សាយរបស់ VN Express, គិតត្រឹមរសៀលថ្ងៃអង្គារទី១០ខែកញ្ញាឆ្នាំ២០២៤, តួលេខមនុស្សស្លាប់ដោយសារព្យុះកំណាច យ៉ាកជី នៅប្រទេសវៀតណាម បានកើនឡើងដល់៨២នាក់ហើយ ខណៈ៦៤នាក់កំពុងបាត់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះនេះវាយប្រហារពេញទំហឹងនៅខេត្តភាគខាងជើងប្រទេស ដោយបង្កភ្លៀងធ្លាក់ខ្លាំងនិងបំណាក់ដីធ្ងន់ធ្ងរ ហើយទីនោះក៏មានជនរងគ្រោះច្រើនផងដែរ។

តួលេខដែលហក់ឡើងលឿនបែបនេះ គឺបន្ទាប់ពីក្រុមជួយសង្គ្រោះរកឃើញមនុស្សស្លាប់ចំនួន៩នាក់ នៅក្នុងរថយន្តដឹកអ្នកដំណើរមួយគ្រឿង ដែលត្រូវដីបាក់សង្កត់នៅស្រុក Nguyen Binh ក្នុងខេត្ត Cao Bang។

តួលេខនេះ ត្រូវបានរាយការណ៍ត្រឹមប៉ុន្មានម៉ោងប៉ុណ្ណោះបន្ទាប់ពីរបាយការណ៍ចុងក្រោយបង្ហាញថា មានមនុស្សចំនួន៦៤នាក់ បាត់បង់ជីវិតដោយសារឥទ្ធិពលព្យុះ យ៉ាកជី។

សូមបញ្ជាក់ជាថ្មី យ៉ាកជី ដែលជាព្យុះដ៏មានឥទ្ធិពលបំផុត បានវាយប្រហារ​ភាគខាងជើងប្រទេសវៀតណាម​តាំង​ពី​​ថ្ងៃសៅរ៍​សប្ដាហ៍​មុនមក។

មិនត្រឹមតែបណ្តាលឲ្យមនុស្សស្លាប់ ព្យុះកំណាចនេះក៏បំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ផងដែរ ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

បើនិយាយពីវិស័យកសិកម្មវិញ ស្រូវជិត ១១០ ០០០ហិកតាត្រូវបានជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត៕

អត្ថបទ៖ សុខ សុវណ្ណ

ចុចអាន៖ វៀតណាម ស្លាប់មនុស្សកាន់តែច្រើន​ដោយសារ​ព្យុះ​ ​ខណៈ​ភាគ​ខាង​ជើង ប្រឈមបំណាក់ដីធ្ងន់ធ្ងរ