អាមេរិក-ចិន ចូលរួមធ្វើសមយុទ្ធរួមគ្នាលើកដំបូង នៅប្រេស៊ីល

សារព័ត៌មាន RT ដោយដកស្រង់ប្រភពពី South China Morning Post បានរាយការណ៍នៅថ្ងៃពុធទី១១ខែកញ្ញាឆ្នាំ២០២៤ថា នេះជាលើកទីមួយហើយ ដែលកងនាវាចរអាមេរិកនិងចិន ចូលរួមក្នុងសមយុទ្ធយោធារួមគ្នា ដឹកនាំដោយកងកម្លាំងប្រដាប់អាវុធប្រេស៊ីល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«Operation Formosa» គឺជាសមយុទ្ធយោធាដ៏ធំបំផុតមួយនៅតំបន់អាមេរិកឡាទីន ហើយវាត្រូវបានធ្វើជាលើកដំបូងតាំងពីឆ្នាំ១៩៨៨មកម្ល៉េះ នៅជិតទីក្រុង Formosa នៃប្រទេសប្រេស៊ីល ខណៈឆ្នាំនេះ Operation Formosa បានចាប់ផ្តើមឡើងកាលពីសប្តាហ៍មុន ហើយបញ្ចប់នៅថ្ងៃទី១៧ខែកញ្ញា។

អ្នកនាំពាក្យកងកម្លាំងប្រដាប់អាវុធប្រេស៊ីលបានប្រាប់ South China Morning Post  ថា សមយុទ្ធឆ្នាំនេះ មានការចូលរួមពីកងទ័ពជើងទឹកចិន៣៣នាក់ និងកងទ័ពជើងទឹកអាមេរិក៥៤នាក់។

តាមការអះអាងពីកងទ័ពជើងទឹកប្រេស៊ីល, នេះជាទម្លាប់ទៅហើយក្នុងការអញ្ជើញប្រទេសជាមិត្តឲ្យចូលរួមក្នុងសមយុទ្ធ។ សារៈសំខាន់នៃការអញ្ជើញបែបនេះ គឺត្រូវបានភ្ជាប់ដោយផ្ទាល់ទៅនឹងឱកាសដើម្បីលើកកម្ពស់ការធ្វើសមាហរណកម្មកាន់តែខ្លាំងរវាងកងទ័ពជើងទឹកប្រេស៊ីល និងកងកម្លាំងនៃប្រទេសជាមិត្ត។

មិនត្រឹមប៉ុណ្ណឹង កងទ័ពប្រហែល ៣ ០០០នាក់មកពីប្រទេសអាហ្សង់ទីន បារាំង អ៊ីតាលី ម៉ិកស៊ិក នីហ្សេរីយ៉ា ប៉ាគីស្ថាន សាធារណរដ្ឋកុងហ្គោ និងអាហ្វ្រិកខាងត្បូង ក៏បានចូលរួមក្នុងសមយុទ្ធនេះដែរ។

សូមបញ្ជាក់ថា យោធាចិននិងអាមេរិក មិនបានធ្វើសមយុទ្ធយោធារួមគ្នាទេចាប់តាំងពីឆ្នាំ២០១៦មក នៅពេលទីក្រុងវ៉ាស៊ីនតោនអញ្ជើញទីក្រុងប៉េកាំងឲ្យចូលរួមក្នុងសមយុទ្ធ Rim of the Pacific ដែលកាលនោះ ចិន​បាន​បញ្ជូន​នាវា​ចម្បាំង​៥​គ្រឿង និង​ទាហាន​ប្រហែល​១ ២០០​នាក់​។

ទោះជាយ៉ាងណាក៏ដោយ ក្រោយមក មន្ទីរបញ្ចកោណក៏លែងអញ្ជើញទីក្រុងប៉េកាំងឲ្យចូលរួមក្នុងសមយុទ្ធនានាដែរ ដោយសារតែបញ្ហាជម្លោះនៅក្នុងសមុទ្រចិនខាងត្បូង៕

អត្ថបទ៖ សុខ សុវណ្ណ

ចុចអាន៖ ចិន រុស្ស៊ី ត្រៀម​ធ្វើ​សមយុទ្ធ​រួម​គ្នា​នៅ​ក្នុង​ខែ​កញ្ញា​នេះ