ជប៉ុនពិចារណាប្រើសឺរ៉ាំងបូមវ៉ាក់សាំងបាន ៧ ដូសចេញពីមួយដប

លោករដ្ឋមន្រ្តីទទួលបន្ទុកយុទ្ធនាការចាក់វ៉ាក់សាំងការពារជំងឺកូវីដ ១៩ របស់ជប៉ុនបាននិយាយថា រដ្ឋាភិបាលនឹងពិចារណាក្នុងការទទួលយកសឺរ៉ាំងដែលអាចបូមវ៉ាក់សាំងបាន ៧ ដូសចេញពីមួយដប ។

រដ្ឋមន្ត្រីក្រសួងកំណែទម្រង់បទបញ្ជាលោក Kono Taro ដែលជាអ្នកត្រួតពិនិត្យការចាក់វ៉ាក់សាំងផងនោះយោងលើរបាយការណ៍ពីមន្ទីរពេទ្យមួយនៅទីក្រុង Uji City ខេត្ត Kyoto បាននិយាយថា វ៉ាក់សាំងចំនួន ៧ ដូសអាចបូមចេញពីដបវ៉ាក់សាំង Pfizer-BioNTech ប្រសិនបើប្រើសឺរ៉ាំងអាំងស៊ុយលីន ។

បច្ចុប្បន្ននេះមន្ត្រីសុខាភិបាលរបស់ប្រទេសជប៉ុនកំពុងធ្វើការដើម្បីទទួលបានសឺរ៉ាំងពិសេសដែលអាចបូមបាន ៦ ដូសចេញពីមួយដប ខណៈសឺរ៉ាំងធម្មតាអាចបូមបាន ៥ ដូស ។

លោក Kono ស្វាគមន៍ចំពោះកិច្ចខិតខំប្រឹងប្រែងដើម្បីបង្កើនកម្រិតដូសនេះ ។ ប៉ុន្តែគាត់បាននិយាយថាសឺរ៉ាំងចាក់អាំងស៊ុយលីនមានម្ជុលខ្លីដូច្នេះគាត់ចង់ធានាថារាល់ការចាក់អាចត្រូវបានអនុវត្តត្រឹមត្រូវ ។

លោកបានបន្ថែមទៀតថា សឺរ៉ាំងងគួរតែត្រូវបានផ្តល់អាទិភាពដល់អ្នកដែលត្រូវការចាក់អាំងស៊ុយលីន ប៉ុន្តែរដ្ឋាភិបាលអាចនឹងទទួលបាននូវអ្វីដែលមានកម្រិតលើសនេះ ។

ចំណែករដ្ឋមន្រ្តីក្រសួងសុខាភិបាលលោក Tamura Norihisa បាននិយាយថា ក្រុមហ៊ុន Pfizer មិនបានបដិសេធនូវលទ្ធភាពដែលសឺរ៉ាំងអាំងស៊ុយលីនអាចបូមបាន ៧ ដូសពីកូនដបនីមួយៗឡើយ ។ គាត់ក៏បាននិយាយផងដែរថា ម្ជុលសឺរ៉ាំងខ្លីដែលពួកគេត្រូវបានប្រើគឺសម្រាប់ការចាក់ក្រោមស្បែក ហើយដូច្នេះពួកគេអាចប្រើបានតែចំពោះអ្នកដែលមានខ្លាញ់តិចតួចប៉ុណ្ណោះ ព្រោះវ៉ាក់សាំងត្រូវតែចាក់ដល់សាច់ដុំ ។

លោកបាននិយាយថា លោកចង់ឲ្យស្ថាប័នវេជ្ជសាស្ត្របន្តប្រើសឺរ៉ាំងតាមលក្ខខណ្ឌដែលពួកគេអាចបញ្ជាក់បានថា ចំនួនវ៉ាក់សាំងគ្រប់គ្រាន់ឈានដល់សាច់ដុំ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ដំណឹងល្អ! កម្ពុជា ស្ថិតក្នុងចំណោមប្រទេសអាស៊ីទាំង២៤ដែលជប៉ុនផ្តល់ជំនួយឥតសំណង សម្រាប់ផ្គត់ផ្គង់វ៉ាក់សាំងកូវីដ

ចុចអាន ៖ ព្រោះ​តែ​កូវីដ សូម្បី​មេក្រុម​បង​ធំ​ល្បីល្បាញ​នៅ​ជប៉ុន ​ក៏​បាត់បង់​ចំណូល