​ប៉ាឡេស្ទីន​បដិសេធ​ទទួល​យក​កុងតឺន័រដឹកសាក​សព​៨៨​នាក់ពីអ៊ីស្រាអែល​​​ទៅហ្គាហ្សា

ក្រសួងសុខាភិបាលតំបន់ហ្គាហ្សាបានបដិសេធមិនទទួលកុងតឺន័រដែលដឹកសាកសពជនជាតិប៉ាឡេស្ទីនចំនួន៨៨នាក់ដែលបញ្ជូនពីអ៊ីស្រាអែលដោយគ្មានការសម្របសម្រួលជាមុន ឬព័ត៌មានអំពីអត្តសញ្ញាណរបស់សាកសព។ នេះ​បើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៦ខែកញ្ញានេះ។

ក្រសួងសុខាភិបាលប៉ាឡេស្ទីន បានផ្អាកទទួលកុងតឺន័ររហូតដល់អ៊ីស្រាអែលផ្តល់ទិន្នន័យពេញលេញជាមួយនឹងឈ្មោះ​ជនរងគ្រោះ ពេលវេលានៃការស្លាប់ និងទីតាំងដែលបានយកអ្នកស្លាប់ចេញមក។ បើយោងតាម ការិយាល័យប្រព័ន្ធផ្សព្វផ្សាយរបស់រដ្ឋបាល​តំបន់​ហ្គាហ្សា បានហៅការដឹកជញ្ជូនសាកសពដែលមិនអាចកំណត់អត្តសញ្ញាណនេះថា ជា «ទង្វើអមនុស្សធម៌ និងឧក្រិដ្ឋកម្ម» ។

បើយោងតាមទីភ្នាក់ងាររបស់ Al Jazeera ដែលបានរាយការណ៍ពីតំបន់ Deir el-Balah បានឲ្យដឹងថា៖​«សាកសពមិនអាចកំណត់អត្តសញ្ញាណបានទេ ព្រោះសាកសពភាគច្រើនបានរលួយ ខណៈក្រសួង​សុខាភិបាល​ប៉ាឡេស្ទីន​បាន​និយាយ​ថា យោធា​អ៊ីស្រាអែល​បាន​លាក់​បាំង​អត្តសញ្ញាណ​របស់​ប្រជាជន​ប៉ាឡេស្ទីន​ទាំង​នោះ និងមិនមានព័ត៌មានអំពីឈ្មោះ ភេទ និងទីតាំង ដែលពួកគេត្រូវបានគេចាប់ពង្រត់នោះទេ និងមាន​សញ្ញា​ថា ​សាកសព​ទាំងនោះ​មាន​នៅ​ក្នុង​ប្រទេស​អ៊ីស្រាអែល​ជា​យូរ​មក​ហើយ​»។

គួរបញ្ជាក់ថា ការសម្លាប់ថ្មីៗបន្តកើនឡើង ដោយយោងតាមក្រសួងការពារជនស៊ីវិលប៉ាឡេស្ទីន​ដែល​បាន​លើក​ឡើង​កាលពីថ្ងៃពុធថា យ៉ាងហោចណាស់ជនជាតិប៉ាឡេស្ទីនចំនួន៥៣នាក់ត្រូវបានសម្លាប់នៅទូទាំងតំបន់ហ្គាហ្សាក្នុងការវាយប្រហាររបស់អ៊ីស្រាអែលលើផ្ទះនិងជម្រករបស់ពួកគេក្នុងរយៈពេល២៤ម៉ោងចុងក្រោយនេះ។

បើទោះបីជាមានកិច្ទខិតខំ​ជាអន្តរជាតិព្យាយាមជួយសម្របសម្រួលឲ្យមានបទឈប់បាញ់ក៏ដោយ ប៉ុន្តែ​​នៅ​តែ​​មាន​ការ​បរាជ័យ​ជាបន្តបន្ទាប់​ក្នុងការចរចារ ហើយប្រទេសទាំងពីរនេះនៅតែមានការបាញ់ប្រហារជាបន្តបន្ទាប់សម្លាប់ជនស៊ិវិលរាប់ពាន់នាក់ និងជម្លៀសមនុស្សរាប់ម៉ឺននាក់៕

អត្ថបទ៖ ប៊ុន សុភាព