ឡើងកាន់តំណែងបាន២ថ្ងៃ ប្រមុខណាតូថ្មី គាំទ្រឲ្យអ៊ុយក្រែន បាញ់ចូលជ្រៅក្នុងដីរុស្ស៊ី

សម្រាប់ដំណើរទស្សនកិច្ចលើកដំបូងទៅកាន់ទីក្រុងកៀវ ក្នុងនាមជាប្រមុខអង្គការណាតូថ្មី, លោក Mark Rutte បានបង្ហាញការគាំទ្រអ៊ុយក្រែន យ៉ាងពេញទំហឹង ហើយអំពាវនាវដល់បណ្តាប្រទេសលោកខាងលិចឈប់ស្ទាក់ស្ទើរទៅ គួរតែអនុញ្ញាតឲ្យអ៊ុយក្រែន ប្រើអាវុធទំនើបៗបាញ់ចូលជ្រៅក្នុងដីរុស្ស៊ី ដើម្បីវាយប្រហារទីតាំងយោធា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Rutte ទើបឡើងកាន់តំណែងជាអគ្គលេខាធិការអង្គការណាតូបានត្រឹម៤៨ម៉ោងប៉ុណ្ណោះ ក៏ស្រាប់តែបង្ហាញវត្តមានយ៉ាងភ្ញាក់ផ្អើលនៅទីក្រុងកៀវតែម្តង ហើយក្នុងអំឡុងដំណើរទស្សនកិច្ចនោះ លោកបានប្រាប់ទៅប្រធានធិបតីអ៊ុយក្រែន Volodymyr Zelenskyy ​ថា «ជាក់ស្តែង! អ៊ុយក្រែនមានសិទ្ធិការពារខ្លួន ហើយច្បាប់អន្តរជាតិនៅខាងអ៊ុយក្រែនជានិច្ច។ សិទ្ធិការពារខ្លួនរបស់អ៊ុយក្រែន មិនមែនមានត្រឹមព្រំដែនទេ ហើយរុស្ស៊ីកំពុងបន្តសង្រ្គាមខុសច្បាប់។ នោះមានន័យថា ការកំណត់គោលដៅលើយន្តហោះចម្បាំងនិងមីស៊ីលរបស់រុស្ស៊ី មុនពេលពួកគេប្រើប្រឆាំងហេដ្ឋារចនាសម្ព័ន្ធស៊ីវិលអ៊ុយក្រែន ពិតជាអាចជួយសង្រ្គោះជីវិតមនុស្សបាន»។

ជាយូរមកហើយ អ៊ុយក្រែនតែងទទូចសុំ​លោក​ខាង​លិច ឲ្យ​អនុញ្ញាតដល់ខ្លួនបើកការវាយប្រហារចូលជ្រៅក្នុងប្រទេសរុស្ស៊ី។ ប៉ុន្តែបញ្ហានេះត្រូវបានសហរដ្ឋអាមេរិក អាល្លឺម៉ង់ និងបណ្តាប្រទេសអឺរ៉ុបមួយចំនួនជំទាស់ ដោយបារម្ភថា វាធ្វើឲ្យជម្លោះជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន កាន់តែរីកធំ គាប់ជួនថ្មីៗនេះ ទីក្រុងមូស្គូថែមទាំងកែប្រែគោលការណ៍បាញ់នុយក្លេអ៊ែររបស់ខ្លួនទៅទៀត។

សូមបញ្ជាក់ថា មតិគាំទ្ររបស់លោក Rutte កើតឡើងមុនកិច្ចប្រជុំកំពូលដ៏សំខាន់មួយ ដឹកនាំដោយប្រធានាធិបតីសហរដ្ឋអាមេរិក Joe Biden នៅថ្ងៃទី១២ខែតុលា ដែលនឹងមានការចូលរួមពីសំណាក់មេដឹកនាំគាំទ្រអ៊ុយក្រែនជាច្រើនរូបនៅក្នុងទម្រង់ដែលហៅថា Ramstein៕

ក្នុងកិច្ចប្រជុំនោះ គេសង្ឃឹមថា មេដឹកនាំទាំងឡាយនឹងប្រមែប្រមូលបានការគាំទ្រនិងជំនួយយោធាបន្ថែមទៀត ដើម្បីជួយអ៊ុយក្រែន យកទៅតទាំងជាមួយរុស្ស៊ី៕

អត្ថបទ៖ សុខ សុវណ្ណ

ចុចអាន៖ សម្ព័ន្ធមិត្តរុស្ស៊ី គំរាមឲ្យណាតូត្រៀមទទួលនុយក្លេអ៊ែរ បើហ៊ានវាយប្រហារទឹកដីរបស់ខ្លួន