ព័ត៌មានអន្ដរជាតិ

លោក ពូទីន៖ សង្គ្រាមហ្គាហ្សាត្រូវតែបញ្ចប់ ដោយការបង្កើតរដ្ឋប៉ាឡេស្ទីន

បានផុស

២ years មុន

នៅ

ថ្ងៃសៅរ៍ ១៩ តុលា ២០២៤

ដោយ

Chheang

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃសុក្រថា សង្រ្គាមនៅតំបន់ហ្គាហ្សាស្ទ្រីប ត្រូវតែបញ្ចប់ដោយការបង្កើតរដ្ឋប៉ាឡេស្ទីន «ពេញលេញ» មួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បាននិយាយនៅក្នុងកិច្ចប្រជុំជាមួយប្រព័ន្ធផ្សព្វផ្សាយរបស់ក្រុមប្រទេស BRICS នៅទីក្រុងមូស្គូ ថា៖ «ដំណោះស្រាយចម្បងចំពោះបញ្ហាប៉ាឡេស្ទីន គឺការបង្កើតរដ្ឋប៉ាឡេស្ទីនពេញលេញ។ ភាគីរុស្ស៊ីបានរក្សាជំហរនេះតាំងពីសម័យសូវៀតមកម៉្លេះ»។

បន្ថែមពីនេះ លោកក៏បានសង្កត់ធ្ងន់លើការបង្កើតឡើងវិញនូវក្រុមប្រទេស Middle East Quartet ដែលជាក្រុមនៃអង្គការអន្តរជាតិ ដែលរួមមានអង្គការសហប្រជាជាតិ សហភាពអឺរ៉ុប សហរដ្ឋអាមេរិក និងរុស្ស៊ី ដើម្បីបន្តកិច្ចខិតខំប្រឹងប្រែងសម្របសម្រួលជម្លោះអ៊ីស្រាអែល និងប៉ាឡេស្ទីន និងផ្តួចផ្តើមដំណើរការសន្តិភាព។

មេដឹកនាំរុស្ស៊ី បានរៀបរាប់ថា៖ «វាជាកំហុសរបស់សហរដ្ឋអាមេរិកក្នុងការរំខានដល់ការងាររបស់ Quartet។ វាគួរតែងាយស្រួលជាងមុនក្នុងការសម្របសម្រួលបានគ្រប់ជ្រុងជ្រោយ។ សហរដ្ឋអាមេរិកបានកាន់កាប់ ផ្តាច់មុខលើកិច្ចប្រឹងប្រែងសន្តិភាព ដោយសន្មត់ការទទួលខុសត្រូវទាំងស្រុង ហើយនៅទីបញ្ចប់ ខ្លួនបានបរាជ័យ»។

លោកបានបញ្ជាក់ទៀតថា ប៉ាឡេស្ទីន «នឹងមិនចាកចេញពី» តំបន់ហ្គាហ្សាស្ទ្រីប ដោយព្រមានថា វិបត្តិមនុស្សធម៌ក្នុងតំបន់នឹងកើនឡើងទៅលើអ្នកដែលព្យាយាម «ការពារផលប្រយោជន៍របស់ពួកគេ» តែប៉ុណ្ណោះ។

លោកបានបន្ថែមថា កិច្ចប្រជុំកំពូល BRICS នាពេលខាងមុខនៅទីក្រុង Kazan ចាប់ពីថ្ងៃទី២២ដល់ថ្ងៃទី២៤ខែតុលា នឹងរួមបញ្ចូលការពិភាក្សាអំពីជម្លោះអ៊ីស្រាអែល និងប៉ាឡេស្ទីន ព្រោះវានៅតែជាបញ្ហាសកលដ៏សំខាន់៕

ដោយ៖ ឈាង