ធុងឆ្នោតនៅអាមេរិកត្រូវគេលួចដុត ឆេះខ្ទេចសន្លឹកឆ្នោតរាប់រយសន្លឹក 

តាមសេចក្តីរាយការណ៍របស់ Aljazeera នៅថ្ងៃអង្គារទី២៩ខែតុលាឆ្នាំ២០២៤ ហេតុការណ៍ដ៏ភ្ញាក់ផ្អើលបានកើតឡើងនៅសហរដ្ឋអាមេរិក ដោយធុងឆ្នោតសម្រាប់ការបោះឆ្នោតមុនតាមប្រៃសណីយ៍ ត្រូវគេលួចដុត បំផ្លាញសន្លឹកឆ្នោតរាប់រយសន្លឹកនៅក្នុងរដ្ឋ Oregon និង Washington។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដំបូងកើតឡើងនៅព្រឹកថ្ងៃចន្ទទី២៨ខែតុលា (ពេលវេលានៅសហរដ្ឋអាមេរិក) ដែលធុងឆ្នោតសម្រាប់ការបោះឆ្នោតមុន ក្នុងទីក្រុង Portland នៃរដ្ឋ Oregon ត្រូវគេលួចដុតប៉ុន្តែជាសំណាងល្អដែលប្រព័ន្ធពន្លត់អគ្គិភ័យស្វ័យប្រវត្តិ ធ្វើការទាន់ពេល ហើយដោយមានជំនួយពីសន្តិសុខនៅក្បែរនោះផង, មានធុងឆ្នោតចំនួន៣ត្រូវខូចខាត ប៉ុន្តែមិនប៉ះពាល់ដល់សន្លឹកឆ្នោតនៅខាងក្នុងឡើយ។

ប៉ុន្មានម៉ោងក្រោយមក ហេតុការណ៍ស្រដៀងគ្នានេះក៏កើតឡើងនៅទីក្រុង Vancouver នៃរដ្ឋ Washington ប៉ុន្តែដោយសារប្រព័ន្ធពន្លត់អគ្គិភ័យនៅទីនោះគាំង ទើបបណ្តាលឲ្យសន្លឹកឆ្នោតរាប់រយសន្លឹកត្រូវឆេះខ្ទេច។

ត្បិតតែមិនដឹងថានរណានៅពីក្រោយរឿងនេះ ប៉ុន្តែលោក Greg Kimsey មន្ត្រីរៀបចំការបោះឆ្នោតនៅតំបន់ Clark បានសង្កត់ធ្ងន់ថា «នេះគឺជាការវាយប្រហារដោយផ្ទាល់ទៅលើលទ្ធិប្រជាធិបតេយ្យ»។

ស្របពេលជាមួយគ្នានោះដែរ FBI កំពុងបើកការស៊ើបអង្កេត ដោយចង្អុលទៅករណីនេះថាជាការលួចដុត ហើយក៏មើលឃើញទំនាក់ទំនងនៃការវាយប្រហារនេះ ទៅករណីដូចគ្នាក្នុងទីក្រុង Vancouver កាលពីថ្ងៃទី៨ខែតុលាផងដែរ។

ចំណែកតំណាងរាស្រ្តគណបក្សប្រជាធិបតេយ្យប្រចាំរដ្ឋ Washington លោកស្រី Marie Gluesenkamp Perez បានចាត់ទុករឿងនេះថាជាការញុះញង់ផ្នែកនយោបាយ ហើយសំណូមពរឲ្យប៉ូលិសបង្កើនការការពារប្រអប់ឆ្នោត រហូតដល់ថ្ងៃបោះឆ្នោត ៥វិច្ឆិកា។

សូមបញ្ជាក់ថា ការបោះឆ្នោតជាមុនតាមប្រៃសណីយ៍ គឺសម្រាប់អ្នកបោះឆ្នោតទាំងឡាយណា ដែលមិនអាចទៅកន្លែងបោះឆ្នោតជាមុនដោយផ្ទាល់ ឬមិនអាចទៅបោះឆ្នោតនៅថ្ងៃបោះឆ្នោតជាតិ។

យ៉ាងណាក្តី វិធីបោះឆ្នោតតាមមធ្យោបាយនេះគឺទទួលរងការរិះគន់ជាយូរមកហើយ ថាវាងាយនឹងត្រូវក្លែងបន្លំសន្លឹកឆ្នោតណាស់ ជាក់ស្តែងដូចកាលពីឆ្នាំ២០២០អ៊ីចឹង ដែលកាលនោះលោក ដូណាល់ ត្រាំ ចោទថា សំឡេងឆ្នោតរបស់លោកត្រូវគេលួច តាមរយៈការបោះឆ្នោតបែបនេះ៕

អត្ថបទ៖ សុខ សុវណ្ណ

ចុចអាន៖ គណបក្សសាធារណរដ្ឋ រៀបផែនការរួចហើយ ពីអ្វីដែល ត្រាំ ត្រូវធ្វើ ពេលឡើងកាន់តំណែង ១០០ថ្ងៃដំបូង