ព័ត៌មានអន្ដរជាតិ

អគ្គិភ័យដ៏ធំបង្ខំឲ្យជម្លៀសមនុស្សចេញពីផ្ទះ ៧០០ខ្នង នៅរដ្ឋ Colorado សហរដ្ឋអាមេរិក

បានផុស

១ ខែ មុន

នៅ

ថ្ងៃពុធ ៣០ តុលា ២០២៤

ដោយ

អគ្គិភ័យឆាបឆេះបំផ្លាញផ្ទះនៅរដ្ឋ Colorado និងបន្តឆេះរាលដាលដោយសារខ្យល់បក់ខ្លាំងបណ្ដាលឲ្យផ្ទះជិត ៧០០ ខ្នងផ្សេងទៀត ត្រូវបានជម្លៀសចេញ។ នេះបើយោងតាមការចេញផ្សាយទីភ្នាក់ងារព័ត៌មាន AP នៅថ្ងៃទី៣០ ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គិភ័យបានឆាបឆេះរាលដាលលើផ្ទៃដី ១៦៦ ហិចតា បន្ទាប់ពីវាបានចាប់ផ្តើមឆេះលើផ្ទះមួយនៅរសៀលថ្ងៃចន្ទ ខណៈក្រុមអ្នកពន្លត់បានព្យាយាមទម្លាក់ទឹកពន្លត់ភ្លើង ជាពិសេសនៅ Highland Lakes ភាគពាយព្យ នៃទីប្រជុំជន Divide ភាគពាយ័ព្យ នៃរដ្ឋ Colorado Springs។ ទោះបីជាយ៉ាងណាប៉ូលិសលោក Jason Marksell នៅក្រុង Teller County បាននិយាយថា ភ្លៀងមួយចំនួនបានធ្លាក់នៅព្រឹកថ្ងៃអង្គារ ដែលជួយសម្រាលអណ្តាតភ្លើងបន្តិចផងដែរ។

ឧទ្ធម្ភាគចក្រពន្លត់អគ្គិភ័យក៏ត្រូវបានបញ្ជូនឲ្យចូលរួមក្នុងប្រតិបត្តិការជួយពន្លត់នេះផងដែរ។ វាមិនច្បាស់ទេថា តើនៅពេលណាដែលអ្នកស្រុកនឹងត្រូវបានអនុញ្ញាតឲ្យត្រឡប់ទៅផ្ទះរបស់ពួកគេវិញ ដោយសារភាពមិនច្បាស់លាស់ នៃខ្យល់បក់ដែលប្តូរទិសដៅភ្លើង ស្របពេលដែលការបោះឆ្នោតប្រធានាធិបតីអាមេរិកជិតមកដល់ហើយនោះ។

សមត្ថកិច្ចកំពុងស្រាវជ្រាវរកមូលហេតុ នៃការឆេះនេះនៅឡើយ។ យោងតាមលោក Marksell បាននិយាយថា៖ «យើងកំពុងចាត់ទុកនេះជាអំពើឧក្រិដ្ឋកម្ម»។ លោកបានបដិសេធមិនបញ្ចេញព័ត៌មានបន្ថែមទៀតថា តើអគ្គិភ័យនេះជារឿងចៃដន្យ ឬដោយចេតនា ខណៈតម្លៃសរុប នៃផ្ទះដែលត្រូវបានជម្លៀសចេញគឺប្រហែល ៣០០លានដុល្លារ៕