មីស៊ីលដែលកូរ៉េខាងជើង ទើបបាញ់បង្ហោះ ជាមីស៊ីលឆ្លងទ្វីប មានសមត្ថភាពអស្ចារ្យ

តាមការបញ្ជាក់ពីកូរ៉េខាងត្បូងនិងជប៉ុន, នៅព្រឹកព្រលឹមថ្ងៃព្រហស្បតិ៍ទី៣១ខែតុលាឆ្នាំ២០២៤ ប្រទេសកូរ៉េខាងជើង បានបាញ់សាកល្បងមីស៊ីលមួយគ្រាប់ ដែលមានសមត្ថភាពដ៏អស្ចារ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

BBC ចុះផ្សាយថា នេះគឺជាមីស៊ីលមានកម្លាំងខ្លាំងបំផុត ដោយហោះបានរយៈពេលរហូតដល់៨៦នាទី ក្នុងចម្ងាយជាង ១០០០គីឡូម៉ែត្រ ហើយកម្ពស់របស់មីស៊ីលគឺឈានដល់ទៅ ៧ ០០០គីឡូម៉ែត្រឯណោះ នៅពេលវាឡើងដល់ចំណុចកំពូល។

មីស៊ីលនេះជាប្រភេទមីស៊ីលអន្តរទ្វីប ICBM ហើយក្រុមអ្នកវិភាគអះអាង បើមីស៊ីលមិនបាញ់បង្ហោះរាងកោងបែបនេះទេនោះ វាប្រហែលជាហោះបានឆ្ងាយជាងនេះទៀត។

ការធ្វើតេស្តនេះ កើតឡើង ក្រោយពេលកូរ៉េខាងត្បូង ​ព្រមាន​ថា កូរ៉េខាងជើង​កំពុង​រៀបចំ​បាញ់ ICBM មុនការបោះឆ្នោត​ប្រធានាធិបតី​អាមេរិក​ថ្ងៃទី ៥ ខែវិច្ឆិកា​ និងចំពេលទំនាក់ទំនងកូរ៉េទាំងពីរ ធ្លាក់ចុះដល់កម្រិតទាប និងសង្គ្រាមពាក្យសម្តីដ៏ក្តៅគគុកពីសំណាក់ទីក្រុងព្យុងយ៉ាង ទៅលើទីក្រុងសេអ៊ូល។

ម្យ៉ាងវិញទៀត ការបាញ់សាកល្បងនេះ ធ្វើឡើងស្របពេលស្ថានការណ៍កំពុងតានតឹងខ្លាំង ជុំវិញការចោទប្រកាន់ថា កូរ៉េខាងជើង បានបញ្ជូនកងទ័ពរាប់ម៉ឺននាក់ទៅជួយរុស្ស៊ី។

យ៉ាងណា ​ក្រសួង​ការពារ​ជាតិ​អាមេរិក និង​​កូរ៉េ​ខាង​ត្បូង បាន​រួម​គ្នា​​អំពាវនាវរួចហើយ ​ឲ្យ​កូរ៉េ​ខាង​ជើង​​ដក​កង​កម្លាំង​របស់​ខ្លួន​ចេញ​ពី​ទឹក​ដី​រុស្ស៊ី ខណៈ​របាយការណ៍​ពី​​ក្រុង​វ៉ាស៊ីតោន​បង្ហាញ​ថា ទាហាន​ប្រមាណ​១​ម៉ឺន​នាក់​​របស់​ក្រុង​ព្យុងយ៉ាង​ត្រូវ​បាន​ដាក់​ពង្រាយ​ត្រៀម​ធ្វើ​សកម្មភាព​ប្រឆាំង​នឹង​អ៊ុយក្រែន។

សូមបញ្ជាក់ជាថ្មី ទីក្រុងព្យុងយ៉ាងបានបាញ់ ICBM លើកចុងក្រោយបំផុតនៅខែធ្នូឆ្នាំ២០២៣ ផ្គើនទៅនឹងការដាក់ទណ្ឌកម្មរបស់អង្គការសហប្រជាជាតិ។ មីស៊ីល​នោះធ្វើ​ដំណើរបាន៧៣នាទី និង​ហោះ​ហើរក្នុងរយៈ​ចម្ងាយ​ប្រហែល ១ ០០០ គីឡូម៉ែត្រ៕

អត្ថបទ៖ សុខ សុវណ្ណ

ចុចអាន៖ មីស៊ីលដែលកូរ៉េខាងជើង ទើបបាញ់បង្ហោះ ជាមីស៊ីលឆ្លងទ្វីប មានសមត្ថភាពអស្ចារ្យ