ចិន បើកពិព័រណ៍យន្តហោះធំបំផុត បង្អួតសព្វាវុធដល់អតិថិជន និងកម្លាសត្រូវ

នៅថ្ងៃអង្គារទី១២ខែវិច្ឆិកាឆ្នាំ២០២៤ ប្រទេសចិន បានបើកពិព័រណ៍យន្តហោះធំបំផុតរបស់ខ្លួន ជាផ្លូវការហើយ ដោយក្នុងនោះទីក្រុងប៉េកាំង បានតាំងបង្ហាញសព្វាវុធក៏ដូចជាយន្តហោះស៊េរីទំនើបៗដើម្បីបង្អួតដល់អតិថិជន និងកម្លាសត្រូវរបស់ខ្លួន។

ព្រឹត្តិការណ៍នេះតែងរៀបចំឡើង២ឆ្នាំម្តង ហើយក្នុងឆ្នាំ២០២៤ វាប្រព្រឹត្តទៅនៅទីក្រុង Zhuhai ភាគខាងត្បូង។ មានយន្តហោះនិងដ្រូនច្រើនប្រភេទណាស់ ដែលត្រូវបានតាំងបង្ហាញ ប៉ុន្តែអ្វីដែលលេចធ្លោធ្វើឲ្យគេចាប់អារម្មណ៍បំផុតគឺយន្តហោះចម្បាំងបំបាំងកាយស៊េរីថ្មី J-35A។

J-35A គឺស្រាលជាងម៉ូដែល J20 ដែលមានស្រាប់របស់ចិន ហើយមើលទៅស្រដៀងនឹង F-35 របស់អាមេរិកដែរ។

ទីភ្នាក់ងារសារព័ត៌មានរដ្ឋ Xinhua បានដកស្រង់សម្តីអ្នកជំនាញយោធាលោក Wang Mingzhi ដែលនិយាយថា យន្តហោះទាំងពីរប្រភេទនេះ ធ្វើឲ្យចិន កាន់តែមានសមត្ថភាពធ្វើប្រតិបត្តិការវាយលុកនៅក្នុងបរិយាកាស ខ្លាំងនិងសាហាវជាងមុន។

ក្រៅពីយន្តហោះនេះ ក៏មានវត្តមានយន្តហោះទ័ពជើងទឹក J-15T ក្នុងពិព័រណ៍នេះជាលើកដំបូងដែរ ហើយការរចនារបស់វា ត្រូវគេជឿថា គឺដើម្បីប្រើប្រាស់លើនាវាផ្ទុកយន្តហោះថ្មីបំផុតរបស់ចិន ឈ្មោះ Fujian។

ចំណែក សព្វាវុធមួយដែលក៏បង្ហាញខ្លួនលើកដំបូងក្នុងពិព័រណ៍នេះដែរនោះគឺ ប្រព័ន្ធមីស៊ីលបាញ់ពីដីទៅអាកាស HQ-19 ដែលផលិតឡើង ដើម្បីស្ទាក់ចាប់មីស៊ីលផ្លោង និងយានល្បឿនលឿនជាងសំឡេង។

សូមបញ្ជាក់ថា ក្នុងរយៈពេលមួយទសវត្សរ៍ចុងក្រោយនេះ ទីក្រុងប៉េកាំងបានជះលុយយ៉ាងច្រើនសន្ធឹកសន្ធាប់ ចូលទៅក្នុងកម្មវិធីអវកាសរបស់ខ្លួន ដើម្បីធ្វើយ៉ាងណា តាមឲ្យទាន់មហាអំណាចអវកាសគឺសហរដ្ឋអាមេរិក និងរុស្ស៊ី៕

អត្ថបទ៖ សុខ សុវណ្ណ